http://nextplus.nextmedia.com/news/latest/20161210/458576鄧達智，五十八歲，香港著名時裝設計師；他也是屏山鄧氏第二十六代，家中長子。八十年代浸完鹹水回港，愛上鄉郊生活，屢為保存圍村文化和環境發聲；與其提倡發展鄉村的同父異母細佬鄧達善大唱反調。鄧達智透露，今年立法會票投朱凱廸。不過城鄉難再共生，他已決意出走，寄望尋找回憶中的淨土。

魚塘已變貨櫃場

到我八十年代中由歐洲回流香港，政府開始發展天水圍新市鎮，半片魚塘變成一幢幢公屋，我就見證住屏山慢慢惡變。近年環境已經唔再幽雅，田野變晒停車場、貨櫃場，一模一樣嘅丁屋夾雜喺中間，每一寸地都拎嚟開發，生活空間愈來愈少，呼吸愈來愈壓迫。亦有更多村外人甚至大陸人變成鄰居，撞口撞面都叫唔出個名。大半同村兄弟走嘅走，移民嘅移民，春秋二祭都未必會再返嚟，同屏山故鄉最後嘅關係，就只剩祖堂塊地。鄉情消失，只剩利益。

我伯娘以前喺村嘅北面有間平房小屋，有自己一片花樹、果園，生活比村內更安靜寫意，一住幾十年。後來周邊開始大肆發展，大貨車日日「隆隆隆」經過家門。伯娘年紀大，耳仔唔靈，幾年前有日諗住出門買餸，貨車駛過響按都聽唔到，就咁撞死咗。嗰時成條村無人敢為佢發聲，無人肯做「爛頭卒」指控政府亂規劃。而家間屋同農地已經被夷平，變成超巨型貨倉。

八年前政府突然打破慣例，話要喺正祠堂門口對出起幾十層樓，竟然有人偷偷哋簽字同意，村民都懵然不知，無人肯走出嚟認數。嗰次算係近來最團結，有二百人去區議會抗議。遊行完，有村中人就話咁做太傻：「你哋愈嘈，只係幫個中間人收更多錢做嘢。」結果個個就阿Q上身：「橫掂本身都做咗貨櫃場好多年，非常醜樣，仲爭咩？」而家嗰幾幢居屋就快落成，由祠堂遠望，已經見唔到青山藍天。三十年前，成村人拎起斧頭、鋤頭去阻止政府徵用魚塘起輕鐵嘅場面，亦都唔會再出現。

呢兩年我細佬達善牽涉入泥頭山同橫洲事件，被記者追問時又粗聲粗氣，鬧人「瘌痢」，所以大家將矛頭指向佢。其實佢只係祖堂入面其中一個司理啫，鄧氏每個人，包括我，都要負責任：祖堂開會，我怕嘈無去開；開完會貼文告喺祠堂又無去關心，等件事發生咗先醒覺。所以我唔怪佢，對錯，等其他人去評定。

今次做訪問嘅呢塊農地，已經係成個屏山最後一個，保存到我細個時風味嘅地方，每日我都會嚟散步、做運動。頭先同農夫傾偈先知，原來塊地係我祖堂嘅「V-Zone地（鄉村式發展用地）」。我祖堂成班都係「發展達人」，恐怕呢度都凶多吉少，好快變晒丁屋。到時就真係無地方值得留戀。

今年立法會，我投咗俾朱凱廸，但願我出走前，有把新聲音，可以為呢片土地帶來新希望。