http://video.appledaily.com.hk/mcp/encode/2017/01/11/3251926/20170112_Vsub337AD_clean_w.mp4


「無膠」袋除了通過美國及歐盟的檢定，可分解堆肥，也經香港生產力促進局測試證實並無石油提煉塑膠物料。（$150/150個）

乜嘢係宇宙最頑強之物？膠袋！真係隨時我哋投胎轉世三幾次，佢仲膠膠興興安居堆填區。最近有香港公司推出「無膠」袋（Green Bag），以粟米澱粉取代石油提煉物製袋，更申請了認證保證能完全分解堆肥，個袋功成身退後可以回歸自然，化作春泥。

我們每日傾倒在堆填區的膠製品超過二千公噸，用膠無罪，但脫膠有理。幾分鐘的方便，帶來幾百年的污染，物輕破壞重。「無膠」袋係吸引嘅，環保而不失方便。摸上手，它跟普通膠袋的觸感差無幾，放入盒裝飲品、罐頭等重物，再揈呀揈，無穿無爛。利用澱粉製袋，外國十年前已有技術，可是投資入場費高昂，回報又唔高，無乜公司願意「倒錢落海」，幾環保都無用。後來技術好咗，機器平咗，地球又病到儍咗，終於有公司願意改良研發。製造「無膠」袋並於網上銷售的輝捷製造有限公司創辦人張美鳳（May）說：「製造『無膠』袋以往成本是造膠袋嘅十倍，?家大約減低到兩倍半啦！」無錯，「無膠」袋的售價比膠袋高幾倍，但只要把生態災難打埋落算盤，點樣計，都係贏在生產線。



「無膠」袋公司負責人張美鳳


Eco-Greenergy綠行俠譚沛楹


「習慣×自然」天台耕作發起人陳家儀


植物澱粉製造　180天內分解
袋的主要成份為植物澱粉，製成類似塑膠的顆粒後，再用塑膠的吹塑方法吹出，能夠短時間被微生物分解，化為水、二氧化碳及無機化合物，滋養泥土。另外，May提到生產此天然降解原料的碳排放只是生產石油提煉膠料的25%，不論產前產後都比較環保。產品經歐盟認證機構DIN CERTCO檢驗，達到美國及歐盟的標準，產品九成物料能在180天內分解，也不會釋出有毒物質。

產品除了購物用的膠袋，另還有垃圾袋、膠枱布、培苗杯、狗狗便便袋及即棄餐具。其中垃圾袋更可一併放入廚餘機處理，化作肥料。May說：「大家儲廚餘一般都係放入桶，處理廚餘後就要洗桶，浪費時間又唔係太衞生。」向連鎖咖啡店及酒店回收咖啡渣作肥料的環保組織Eco-Greenergy綠行俠試用了「無膠」袋大約一個月，共同創辦人譚沛楹說：「咖啡店通常用普通垃圾膠袋裝起咖啡渣，回收後膠袋都會變成廢物。『無膠』袋可一併放進廚餘機，減少額外的垃圾。」她認為袋分解效果理想，放進廚餘機內一兩天便碎開，一周後碎片更小，三四周後看到它進一步分解，並與咖啡渣肥料慢慢混合。

大部份培苗杯都是塑膠製，「習慣×自然」天台耕作發起人陳家儀認為天然澱粉培苗杯概念不錯。「我哋移苗嗰陣成杯放入泥土，如果杯可以被微生物吸收，回歸自然，係好事。」不過她就提醒大家善用城市內的過剩資源。「當然唔想大家突然將所有花盆掉咗，轉晒用呢啲生物降解培苗杯，變成另一種虛耗。」


「無膠」袋可訂做成各種款式、厚薄及大小。


狗狗便便袋防水方便，也免卻大家被報紙油墨弄污手。（$120/300個）


「無膠」粟米澱粉即棄餐具。刀匙叉各10件約$30


即場燃燒叉子沒有黑煙，反而飄出淡淡的焦糖爆穀味。

泥土降解狀況


第26天


第55天


第74天

查詢：http://www.green-bag.com.hk

記者：葉青霞
攝影：劉永發、鄧鴻欣
編輯：梁浩維
美術：利英豪


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
個問題咪就係分解囉，點存倉呀