http://hk.apple.nextmedia.com/enews/realtime/20161121/55934665你嘅Grad Trip（畢業旅行）去咗邊？當人人都去日韓血拼，偏偏有個香港女生唔跟大隊，「冇人識嘅地方我就最想去o架喇！你問人哋中亞係咩，佢哋都唔知咩嚟，但嗰度其實有好輝煌嘅歷史，例如奧斯曼帝國、波斯王朝等，我好有興趣去探索。」就係呢份好奇心，令23歲嘅嘉嘉（KaKa）喺今年暑假，用127日踏遍三大洲，獨遊南非、中亞四國、伊朗、波羅的海三國、俄羅斯等13個國家。

旅行超過四個月，啲人都會話：「屋企實好有錢啦！」嘉嘉即刻耍手擰頭，話自己係窮遊一族，成個旅行埋單唔使港幣兩萬蚊。喺公屋成長嘅嘉嘉，儲埋大學四年攞到嘅獎學金做旅費，做沙發客、截順風車，慳錢之餘順道識吓當地朋友。
大學主修社會學嘅嘉嘉視旅行為認識世界，唔少人對發展中國家有刻板印象和偏見，但嘉嘉拒絕盲目盡信媒體或網上資訊，希望透過親身遊歷，了解各地文化同社會生態。旅行初期，嘉嘉仲會跟Lonely Planet指南到訪唔同景點，後來索性將旅遊書送畀其他人，因為佢相信惟有當地人先可以帶佢體會真正地道生活。佢開始主動出擊同當地人傾計，練成搭訕絕技，「喺吉爾吉斯，我喺旅舍識到個reception staff，佢請我去佢婆婆嘅生日派對！」於是嘉嘉喺冇計劃下，上山住喺氈房五日，40人一齊飲馬奶酒、唱歌慶祝嘅場面，令佢非常深刻，「呢啲咁local嘅生活，就係我旅行最想要嘅經歷，係畀錢買唔到嘅！」
想識朋友，唔怕雞同鴨講。嘉嘉喺立陶宛識咗一個沙發主嘅媽媽，佢只係識講俄語，「我哋溝通嘅方式就係用奇怪發聲同body language，譬如要食飯，我就話KaKa yum yum。」呢位媽媽非常熱情，一日煮足六餐，仲織咗一對粉紅灰間長襪畀嘉嘉做禮物，「我好感動，因為我阿媽都未試過織襪畀我！」
旅行有快樂也有驚險時！嘉嘉坦言呢幾個月遇過唔少性騷擾事件，「有一次喺塔吉克酒店，有個男人突然入咗shared bathroom，喺我面前除褲！我即刻衝入浴室鎖門，佢就係咁拍門。旅行學咗啲乜？冷靜，一定搵到解決方法！所以我就沖返個涼先，哈哈。」最後等個男人入咗另一格浴室沖涼，佢就即刻衝出去求救，都咪話唔得人驚。一個女仔周圍去，唔怕危險咩？嘉嘉承認獨遊有風險，不過再熟識嘅地方都未必安全，最緊要保持警覺，如果旅途中打聽到某地點唔安全，就唔好再以身犯險喇！
曾經有人同嘉嘉講：「咁窮嘅國家，你去嚟做乜，文化咁差。佢哋啲文化唔係差，點會咁窮呀？」嘉嘉聽完嬲到喊，「文化無分貴賤，窮嘅國家，我都可以從佢哋身上學習。」好似佢見過吉爾吉斯人禮讓嘅一面，「如果一個婆婆上車，全車人即刻起晒身，係自然反應嚟。」
獨自旅行亦係重新檢視自己嘅機會。以前嘉嘉性格內向，喺香港連問路都唔敢，同學問佢借課堂筆記都要諗過度過，不過旅行經歷改變咗佢，「最大改變係樂於助人同分享。」有次嘉嘉喺亞美尼亞，因交通問題而搵唔切地方住，街上有當地人叫佢去附近無花果工場，結果成功留宿，做咗一晚看更。嘉嘉話，當地人不求回報去幫助萍水相逢嘅異鄉人，令佢非常感動，「呢段係好珍貴嘅回憶同友誼，返到香港，我都想做呢樣嘢。」如果再有人問嘉嘉借筆記，相信佢一定唔會「托手踭」。
嘉嘉身邊有啲朋友覺得佢去旅行去到「走火入魔」，甚至以為佢嫁咗過去，至親亦非常反對，「媽咪絕對唔支持！人哋畢業就即刻搵工，去咩鬼旅行呀？」不過佢堅持實現小小嘅夢想，「阿媽，我只係用人生百分之一嘅時間，去做我自己真係好想做嘅嘢。」看似落後喺搵工起跑線，不過呢次旅行令嘉嘉搵到興趣同日後方向，「我想開一個(網上)服裝生意。」佢發現自己對民族服裝情有獨鍾，計劃創業分享自家製民族衫，更希望將部分收益回饋當地社福機構。
旅行有時唔只玩樂，如果諗多一步，或者可以為旅程增添一份特別意義。人生只有一次，嘉嘉鼓勵大家唔好因為別人眼光而埋沒自己心聲，「跳出自己嘅comfort zone，你會搵到新嘅自己！」