「蔣家天下陳家黨，宋家姊妹孔家財」，响國民政府掌政年代，就有所謂「四大家族」嘅講法。四大家族，即係蔣宋孔陳四個家族，呢四個家族掌控咗國民政府黨政軍財四方面，可以話係控制咗成個國民政權。

蔣宋孔陳四大家族，蔣家就係指蔣介石同佢家人；宋家就係宋家三姐妹同宋子文宋子良等人；孔家就係以孔祥熙為首；陳家就係陳果夫、陳立夫兄弟家族。簡單而講，蔣家掌握當時嘅軍政大權，宋孔兩家就掌財政大權，陳家就係掌黨政大權，四個家族關係千絲萬縷，好似蔣介石老婆就係宋美齡，孔祥熙老婆就係宋藹齡，陳果夫陳立夫係蔣介石結拜兄弟陳其美個姪。

亦因為呢四個家族咁大權，所以成為國民政府貪污腐敗嘅象徵。之但係，四大家族嘅惡名更大程度上係國民政府嘅敵人所製造出嚟嘅。最先係由中共早期重要成員瞿秋白响1923年提出，佢响《論中國之資產階級的發展》一文中明確提出幾大家族控制當時嘅官僚資本，後嚟就演變四大家族呢個講法。而响國共內戰期間，中共文人陳伯達就完成咗《中國四大家族》一書，寫話四大家族殘民自肥，當時估算佢哋有成200億美元財產。除咗中共，有美國學者話日本响中日戰爭期間就製造過國民政府高層財富嘅謠言。

不過咁，對於四大家族係咪真係斂財至極就一直有爭議。美國史丹佛大學胡佛研究所研究員郭岱君就認為蔣介石一生清廉，孔宋家本來就好有錢，陳家根本唔算係大家族，四大家族講法根本唔成立。
之但係，有一點係無可否認嘅，就係中共成功呢個「四大家族」，將國民政府標籤為貪污腐敗，成為贏得民心嘅一個關鍵。https://www.facebook.com/shifiles/photos/a.1447237618879778.1073741828.1446506852286188/1842414506028752/?type=3