古有「螳臂擋車」，今日都有「阿伯擋車」。尋日有市民影到一個男人企喺九巴車頭前面，令巴士開唔到車，結果搞到逼滿車廂嘅乘客只可以苦等。就咁睇相，大家可能覺得阿伯只係一個搞事嘅麻煩乘客，但換個角度睇，你可能會另有睇法。

有聲稱當時身在現場嘅網民指，阿伯本來排緊頭位，但等咗幾架巴士都冇位上車；而相中嘅巴士未埋到站就開門落客，結果一堆人打尖衝上車，搞到阿伯反而冇位上。有人撐阿伯為自己權益企出嚟，但都有人話阿伯始終係阻住成車人，你又點睇？