http://centralmarket.tumblr.com/post/157050539835/美國矽谷-有公司電腦自己炒股-電腦可以做棋王做股王又得唔得得美國矽谷 有公司電腦自己炒股

電腦可以做棋王，做股王又得唔得？得。

美國矽谷一間公司，叫Sentient Technologies Inc.，原來，佢已經將一隻自家對沖基金，全權交咗畀人工智能自己炒作（AI-focused hedge funds），唔使再理會什麼專家⋯

呢隻全名叫AI-focused hedge funds，同其他用電腦幫手炒股（電腦只畀投資建議）嘅fund唔同，Sentient並唔係要員工做「Excel股神」，而係電腦真正靠自己「意志」營運，再無人為參與。

據了解，Sentient早前研發咗一個由幾千部電腦組成嘅人工智能系統，勁到自己識得喺幾分鐘之內模擬1800日嘅交易量，分析歷史數據，再自行決策交易，過程中，唔好嘅因子會被剔除，好嘅基因會被保留。

根據報導，呢個fund，只有兩名員工，負責監察電腦，平日set下時間、回報率、風險指數等等，就可以收工；創辦人Babak Hodjat話，員工需要時可按緊急製阻止電腦：

「嗰度就有個紅色按鈕。」（there is a red button.）

雖然，Sentient未肯透露確實回報數字，但創辦人講，現時人工智能每天完成數以百單deal，持倉由幾日到幾星期不等，盈利表現，一早已經超出咗內部指標。小編作為散戶，不禁質疑，到電腦都變成莊家識得夾人嘅時候，散戶仲有無肉食？

備注：現時AI-focused hedge funds炒緊自己啲錢，初始資金來自過去5年矽谷嘅風險投資，包括印度塔塔集團，同埋香港嘅李嘉誠。