http://video.appledaily.com.hk/mcp/encode/2017/02/10/3274218/20170211_VVVsub656_clean_w.mp4


藍剔害人，拆散佳侶，比比皆是。用即時通訊工具談天其實有股無形壓力，記者寧願用筆友app。

5d5d5d，快啲快啲快啲，世界唔畀你慢。訊息覆遲三秒，事情已有三個大轉折，六項新可能。發訊息，沒深思，零熟慮。速度VS深度，前者大比數拋離。80後黃浩賢（Kevin）開發交筆友app SLOWLY，連結八十多個國家的人，收信發信不再即時，美國寄香港、香港寄阿塞拜疆，要等兩至三日。信件太短寄不出去，深度終於贏番場。

慢，喺呢個年代係奢侈品。有人開宗明義提倡「慢」，溝通交流不再即時。在SLOWLY的國度，長篇大論先係王道，等兩三日先收到「回信」都係等閒，模擬交筆友的真實經驗。程式會按兩人實際身處位置，計算距離，釐定信件派送時間，等收信，令人想大叫：「好期待喔！」程式設計師Kevin說：「?家用即時通訊工具傾偈好大壓力，你會在意人哋有冇睇，見到已讀不回會嬲。工作message，你凌晨一點send過來，我應該即覆定等明天朝早呢？」輸入中不敢輸太慢，一於求其按個笑面，是但打個ok，連發兩則，貌似care，思考時間卻少於0.003秒。Kevin特別為此交筆友app設限，第一封發出去的信不能太短。記者親身試用，寫兩行想發送，程式提醒我以一封信來講，好似有啲短。好，加多一行，都係得到「短」評。我認認真真，思前想後，寫咗洋洋數百字，終於發送成功。「如果畀大家打句hello就send，對方都唔知可以回乜。我特登設計到介面似一封封信，唔係一個個對話框，想大家有深度交流。」只求快速交友的，肯定自動調頭走。


全新交筆友平台「SLOWLY」以交流需要時間為概念。系統根據用戶共同語言與話題配對筆友。


筆友app用家Hidy以往很想交筆友，得知有這個程式便立刻下載。


程式設計師黃浩賢稱如程式能引發大家重執筆桿寫信，他覺得相當成功。

不以貌取人　只准選用公仔頭像
開發前，佢特意下載多個交友app參考，就係為咗避開嗰種your face your fate的模式。筆友程式只准你選用公仔頭像，閣下執到阿媽都唔認得的美圖、加了味精filter的靚相，通通無用武之地。「以往交筆友其實好多幻想，想知佢同自己諗嘅似唔似。唔以貌取人，反而有更多樂趣。我甚至唔知佢年紀。我用呢個app交咗個筆友，通咗幾封信對方先話我知佢得14歲，如果我一早知佢係小妹妹，我可能唔會同佢傾，但佢思想好成熟，其實令我有啟發。」

下載程式後可點選有興趣聊的項目及書寫語言，程式會為你配對「啱嘴形」的人。程式上架幾日，已有來自八十多個國家的人寄信收信。「有很多國家我根本不認識，例如阿塞拜疆，立即要睇地圖先知喺邊度。」他提到有移民到其他國家的朋友，利用程式在當地找母語相同的同鄉聊天。「佢哋都話傾多幾轉，真係會想約出來見面。」

程式上架首天已下載來玩的用家Hidy認為概念有趣，會緊張得經常按進程式，看有沒有信傳來。「生活節奏太快，好似冇乜嘢值得期待咁。我之前寫咗幾行字發送出去，然後就後悔，哎呀，佢響美國咁遠，好耐先收到，我應該寫多啲嘢。」她交了一個自稱來自未來的筆友，相當搞笑。「佢話『我來自未來，我知道你係會回信畀我嘅』，然後我覆佢我來自火星，?家好期待他又會點覆。」用時間經營的交流可以好有趣，興奮地等一個人回信，你又幾耐無試過？


用戶毋須用真名，沒有相片，每封書信都可暢所欲言，抒發最真實的感受。


程式有「集郵功能」，結識海外筆友，就能收藏過百枚有不同國家地標的郵票，設計頗精美。


用戶只能選用公仔頭像，令溝通變得純粹且富神秘感。

記者：葉青霞
攝影：劉永發
編輯：梁浩維
美術：利英豪


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
咁白痴