【池袋「國際機場」正式啟用！】平坐頭等飛紐約不是夢！？

對於長期徘徊喺貧窮線邊緣嘅小編嚟講，坐頭等去遠啲簡直同中六合彩一樣難......不過如果只係用一餐飯嘅價錢就可以換到同真係坐頭等有差唔多一樣嘅模擬飛行體驗，雖然知道唔係真，都會心郁郁想去試吓！



可以坐住頭等座位歎美食嘅就係開喺呢棟極不起眼嘅大廈入面嘅「FIRST AIRLINES」，齋睇個名真係會俾佢呃到，以為日本又有新嘅航空公司，其實呢度只係可以畀你坐喺模擬機艙入面用餐嘅餐廳，由於目的地有紐約、羅馬同巴黎3條國際航線可以揀，所以FIRST AIRLINES亦自稱為「池袋國際機場」。



FIRST AIRLINES嘅地理位置都幾方便，由池袋西口出發大概都只係5分鐘左右，但係行咗入大廈，莫講話機場，連一丁點飛機嘅感覺都冇！



不過一出?就開始有驚喜，FIRST AIRLINES嘅接待處已經出現喺眼前喇！



仲有埋個牌顯示每班航班出發嘅時間同目的地，開始感覺到佢地製作嘅認真態度啦！提返大家，如果想嚟呢度食返餐感受嚇，記得一定要預約，仲要喺起飛前15分鐘到達辦理Check-in手續。