最近，世界末日㗎喇，慘無人道呀。話說，方太一向頂《愛．回家》唔順；又嫌棄《射鵰英雄傳》入面，黃蓉唔夠嬌俏，穆念慈太靚，洪七公唔係劉丹；仲九年前已經睇晒成套《蘭花劫》；搞到晚晚六點未夠已經想睡眠。我勸方太追看《詭探》，她又怪責畫面太黑。身為兒子的，無能為力，感到很心痛。

只有星期一，方太才找到少少生存意義。十幾年前，她曾經瘋狂迷戀美劇《逃》（Prison Break），粵語配音，大佬Lincoln Burrows叫布利恒，細佬Michael Scofield叫施米高，四季劇終後，念念不忘。就算明珠台其後播出的《心計》（The Mentalist）、賈神探（Castle），或者《醫神》（House），如何出色，也無法取代逃獄兩兄弟的地位。何況，以上劇集未播到大結局，明珠台已經取消雙語廣播。叫方太閱讀字幕？是有點強人所難吧。

直到去年，收到消息落實拍攝《逃》的延續篇，我立即向方太報喜。方太即時興奮怪叫，就似梁振英宣佈放棄角逐連任時，香港人的反應。隨即，眉頭一皺：「施米高都死咗啦，仲可以拍落去？」「你使乜擔心吖？總有方法解得通㗎啦。」活在香港，再荒謬的說法，你也會接受吧。真正令方太難過的，其實是明珠台已放棄為美劇配音。就似搭長途客機，鄰座乘客點了一客合味道杯麵，香氣襲來，到你忍不住想落order，才發現所有杯麵已經派清。那種感覺，的確比死更難受。柳暗花明。明珠台竟然破例，肯為《逃》配上粵語對白。你想像到方太的心情嗎？原來是痛苦的開端。以下劇透，還有興趣煲劇的，請翻開不看。

要令男主角死而復生，新故事設定有個CIA高層，七年前威脅施米高拋妻棄子，隱藏身份，前往世界各地劫獄，帶走不同恐怖分子，意圖改變世界現狀。點知，個高層睇中施米高老婆，於是四年前靠害，屈施米高殺死CIA副局長，施米高流落也門監獄，直到第一集開場。講到CIA無法無天又腐敗，我信；講到施米高狠心到連親生仔都唔望一眼，我算；講到施米高大戰ISIS，我佩服。讓我無法忍耐的，是講到施米高幾乎蠢過佢大佬。我就眼火爆。

在也門逃難的前六、七集，施米高能夠全身而退，全靠好彩，或者靠布利恒的蠻力。唔係啩？《逃》的第一季獲得大成功，就係橋段扭得有心思，施米高一早擬定大計，幾個天才型罪犯再不斷運用頭腦逢凶化吉，而觀眾係吹唔脹。來到十幾年後，退步到變成一般TVB連續劇，一槍戰就熄燈走人的層次？還是符合現實，plan好plan A、plan B、 plan C，還不如一拳直接打過去實際？去到尾兩集，幾位主角好好彩地又好順理成章地重返美國，橋段開始有點設計了。然後，短短四十分鐘，所有所謂的伏線，便全部揭曉了。不用落雨收柴的話，也不知還可以用甚麼形容詞。

也不是說那些設計有甚麼過人之處。你應該有看過王晶導演的《賭俠大戰拉斯維加斯》，去年《非常盜2》（Now You See Me2)已經試過向這齣港產片致敬，估不到連《逃》的創作團隊，也是王晶粉絲。施米高的終極大計，根本就要畀返顧問費用阿King哥啦；看到那個模型專家的打扮，不可能沒有參考專拍AV的Handsome Wu。最後，大團圓結局，施米高固然一家三口樂也融融，再夾硬塞個女友畀布利恒，齊齊坐在草地呼吸新鮮空氣，只欠一個BBQ爐和幾支燒烤叉。大懷舊也不用這樣公式化吧。我憤怒到火速熄了電視，就當自己從來沒有看過這九集。在寧靜之中，我偷望到方太一臉茫然，若有所失。或者，她已經頓悟到一點：有些回憶，埋藏在心底，偶爾會浮現出來，雖然會帶點心傷，也心甜。你又何必刻意挖掘出來，徹底破壞，還要自誇圓滿了缺失，做了一件大好事呢？

Profile：方俊傑
觀塘長大，壹仔打滾，偏愛西片、西劇、中日韓美女。利物浦悲慘球迷，非西人一個。

編輯：馮秀珍
美術：黃創泰

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
唔係呀