1648年三十年戰爭結束 歐洲各國同神聖羅馬帝國簽訂西伐里亞和約 但和平並冇因此降臨
係西伐里亞和約後法國同西班牙仍然繼續佢地兩國間既私鬥
為左維持戰爭法國政府同班大媽沙借左大筆錢但又唔知點還

咁簡單啦 首相馬薩林批准班大媽沙係各地親自收稅
咁就出事啦
平民就嘈啦:我平時已經要交稅比班貴族地主啦而家仲要養埋班大媽沙!?我邊到黎錢啊!?
而貴族亦同樣不滿喎:喂我領地入面既人係我既私產黎家嘛 佢地有錢都係比我啦 幾時到你黎收稅啊!?

呢個政策塞住左班大媽沙把口 但亦代表政府失去稅收
馬薩林又諗到第招啦 唔出糧比法官咪得囉

而家馬薩林已經得罪晒全法國人 相信大家都會想像到佢最後會點樣死無全屍
1648年8月20日憤怒既暴民用投石器(係SLING唔係CATAPULT)襲擊馬薩林屋企 投石黨亂開始

10月22日馬薩林帶住十歲既小國王路易十四逃出巴黎
比佢地逃出巴黎又點呢?全法國通街都係暴徒摑緊呢對婚君讒臣
馬薩林同路易十四係自己國家入面過住流亡既生活到1月30日終於收到個好消息
對面海既英國...佢地既國王查理一世...比佢自己既人民...推翻...然後...處死!!!!!?!?!?!!!!??!?!
唔好話屎佢地兩個當堂嚇到連成個消化系統都痾埋出黎

法國既戰爭英雄 當年個個二世祖昂基安公爵路易二世·德·波旁係1646年繼承佢啊爸孔代親王既稱號
成為第四代孔代親王路易二世·德·波旁
法國對神聖羅馬帝國既戰爭結束令佢可以係前線帶住佢既軍隊返黎鎮壓投石黨亂 馬薩林同路易十四返回巴黎
1649年 革命既時代同歐洲人擦身而過

然後直到1653年投石黨亂先完全結束 呢年路易十四十五歲
小國王路易十四就係呢種環境之下長大成人
長大後佢決心要成為獨攬大權既絕對君主"一個國王 一個法律 一個上帝"冇人再可以挑戰佢既地位
1661年路易十四既最佳助手法國人民眼中既暴君馬薩林壽終正寢 廿三歲既路易十四開始親政

路易十四

有日路易十四去佢財政大臣屋企玩 點知一入到去
哇屌你仲靚過我屋企 當官既夠膽有錢過國王!?去死啦!!
路易十四斬左財政大臣之後就買左塊爛地 請起財政大臣屋企個建築師幫自己起過座新王宮
塊爛地叫凡爾賽

雖然西班牙係三十年戰爭中被打殘左 而西伐里亞和約之後神聖羅馬帝國亦被打散成一堆小國唔再對法國構成威脅
但對法國而言西班牙依然係佢最大既威脅
法國西面係西班牙本土 東北係西屬尼德蘭 東南係弗朗什孔泰
要擺脫西班牙既包圍首先向東擴展
1659年三十年戰爭既法西戰線以比利牛斯條約結束
路易十四娶西班牙公主瑪麗·泰蕾莎 另外西班牙係加泰隆尼亞同西屬尼德蘭到割左忽比法國
未得 仲未夠 好快第一個機會就黎啦

1665年9月17日西班牙國王菲利普四世死左 路易十四靠佢老婆既血緣要求繼承西屬尼德蘭
1667年法國入侵西屬尼德蘭 權力轉移戰爭爆發 西班牙軍節節敗退
孔代親王路易二世帶住佢表弟盧森堡公爵弗朗索瓦·亨利·德·蒙莫朗西-布特維爾攻佔弗朗什孔泰

盧森堡公爵弗朗索瓦·亨利·德·蒙莫朗西-布特維爾

只要踩平西班牙歐洲再冇人可以阻止法國佬 法國將會取代哈布斯堡成為歐洲霸主
明眼人都睇得出路易十四既野心 1668年英國瑞典荷蘭加入戰爭支援西班牙
隻抽就夠抽姐圍抽就唔掂啦 法國佬頂唔順同西班牙簽訂亞琛條約結束戰爭
法國放棄西屬尼德蘭繼承權 交還弗朗什孔泰 然後西班牙又係西屬尼德蘭割多幾忽比法國
雖然目標未達到 不過都叫不過不失 仲有機會既

第二個機會好快又黎啦
1670年5月22日路易十四同英王查理二世簽訂多佛密約
查理二世以王儲詹士改宗大公教換取法國支持英國出兵荷蘭
雖然條約就簽左啦但要點履行呢?英國絕大大大大大大大大大大大大大部份人都係聖公會教徒
查理二世諗到條好橋啦 查理二世發表信仰自由宣言放寬對大公教徒既限制
拿 我冇話改國教啊 我只係搞宗教自由姐 對面海個荷蘭都係咁啦 又唔見佢變成大公教國家?大家應該要理性包容D如果唔係我地會比歐洲大陸邊沿化架
話口未完1672年3月英國對荷蘭宣戰 4月法國連同瑞典進攻荷蘭

比三十年戰爭三大戰勝國圍毆既第四大戰勝國荷蘭節節敗退
荷蘭人推舉奧良治親王威廉三世做聯省執政帶領荷蘭共同對抗敵人
同樣為抑制法國既擴張 今次連荷蘭立國既死敵西班牙同神聖羅馬帝國都企埋佢個邊
1679年雙方簽訂奈梅亨條約 今次法國終於攞到自勃根地公國冧檔以黎一直想要既弗朗什孔泰

對於法國係法荷戰爭既擴張路易十四緊係高興啦 但法國既勝利為佢既盟友查理二世惹黎大麻煩
因為王儲詹士改宗大公教同查理二世幫助大公教法國入侵更正教荷蘭令英國出現又再大量大公教陰謀論
當然英國人唔知道多佛密約既存在 如果唔係反應一定會更大
英國社會氣氛就好似返到內戰前夕一樣
而當時既國會亦分成兩派
一班係堅決反對詹士繼承王位既"狂熱蘇格蘭長老會教徒"人稱輝格黨
另一班係為避免內戰重臨只要王室願意妥協就咩都有得傾既"反王室愛爾蘭人"人稱托利黨
對於兩派既爭論查理二世用左種非常查理式既方法回應
1681年國會解散

又返返去歐洲大陸 為壓止鄂圖曼係東歐既擴張 1683年奧地利加入大土耳其戰爭
對路易十四黎講第三個機會又從天而降
因為奧地利 西班牙 部分神聖羅馬帝國諸侯既軍隊都調左去東面參加1683年既維也納之圍
1683年9月1日法國乘機入侵西屬尼德蘭 1684年西班牙同法國簽訂拉蒂斯邦條約休戰20年
到而家國際秩序已經企係法國個邊
西班牙廿年停戰 奧地利同神聖羅馬帝國受困於東歐 英國係自己既親密好友
路易十四首先調轉槍頭對付自己既人民

1682年路易十四搬入凡爾賽宮
吸收左當年投石黨亂既經驗 唔只路易十四佢自己 佢仲拖埋全國既貴族跟佢一齊搬埋入凡爾賽宮
法國既貴族從此就日日係凡爾賽宮入面飲飲食食不問政事
而佢地自己既封地就由路易十四派遣既公務員去管理

興建初期既凡爾賽宮

搞掂左班貴族之後 下個對付既係平民
自雨格諾戰爭以黎雨格諾宗偶然都會做下反 威脅國王既權力同國家既穩定
1685年10月18日路易十四發表楓丹白露敕令 廢除自雨格諾戰爭南特敕令以黎既宗教自由 以羅馬大公教會為唯一信仰
全國二十萬雨格諾宗教徒被驅逐出國
而佢地首選既目的地就係全歐洲宗教最自由既荷蘭

自八十年戰爭獨立以黎荷蘭一個小國夾係英國西班牙神聖羅馬帝國中間 好彩呢三大國中間仲有個同病相憐既法國
荷蘭一直利用法國黎平衡三國既勢力 除左係法荷戰爭時無端百事比法國佬塞左鑊之外 荷蘭外交政策上都係個親法國家黎
但自法荷戰爭奧良治親王威廉三世成為聯省執政以黎佢就開始擔憂法國對荷蘭既威脅已經超越另外三國
特別係權力轉移戰爭西班牙冇左弗朗什孔泰同半個西屬尼德蘭之後係西歐既影響力已變得無足輕重
不過長期既親法政策令荷蘭無論平民定貴族係法國都有大量投資 佢地普遍唔願意改變對法態度
但突然十幾萬既雨格諾宗教徒湧入荷蘭之後情況就改變啦

1685年5月26日普法爾茨選侯卡爾二世冇仔生就死左
不過好彩佢仲有個細佬腓力·威廉海姆 而且唔只有個細佬 佢仲有個妹添
佢個妹伊麗莎白·夏綠蒂就嫁左比法國國王路易十四個細佬奧爾良公爵腓力一世
路易十四就以伊麗莎白·夏綠蒂年紀大過腓力·威廉海姆主張伊麗莎白·夏綠蒂繼承普法爾茨選侯
而家法國佬終於惡到踩上神聖羅馬帝國頭頂啦

神聖羅馬帝國現任皇帝係結束三十年戰爭既斐迪南三世個二仔利奧波德一世
係鄂圖曼帝國身上泥足深陷既利奧波德一世主導下奧地利 巴伐利亞 勃蘭登堡 薩克森 西班牙結成大同盟抑制法國既擴張
民意已經轉向威廉三世支持荷蘭加入大同盟對付法國
然後威廉三世就將目光轉向英國啦...

利奧波德一世

1685年2月6日英王查理二世過身
對於佢既王位繼承人問題係佢解散國會之後再冇任何正式既討論直到佢去世為止
最終佢既大公教徒佢細佬詹士成為英王詹士二世 1685年5月詹士二世重開國會
岩岩重開以托利黨為多數既國會為表達將來談判既試意 佢地批左筆比平時多既生活費比詹士二世
然後當輝格黨同托利黨準備就詹士二世既信仰問題開刀既時候
有個人靜應應從對面海既荷蘭登陸英國啦...
個個人係邊個?
冇錯就係個個人
大家一齊黎嗌個個人既名啦!!

蒙默斯公爵詹士·史葛!!
邊撚個詹士啊!?你邊撚到詹士啊睇過!?哇屌你真係占到成身都係屎喎

蒙默斯公爵詹士·史葛 聖公會教徒 查理二世最大既私生子 係詹士二世繼位前一直都係取代詹士二世最有力既人選
當詹士二世真係繼位時 係荷蘭當緊兵既詹士·史葛即刻游水返英國
1685年6月11日詹士·史葛登陸英國宣佈自己先係合法既王位繼承人得到唔少英國人既支持
佢地攞住鐮刀鋤頭跟住詹士·史葛操向倫敦
就係佢地行到半路就比個名不經傳既低級貴族約翰·丘吉爾搞掂左

約翰·丘吉爾

事後蒙默斯公爵詹士·史葛係倫敦塔被處死 仲有千幾個陪佢做反既人同佢墊屍底
詹士二世係蒙默斯叛亂中既表現轉移左英國人民既視線
佢既信仰問題已經無關重要 係而家既英國人眼中詹士二世只係個暴君
係蒙默斯叛亂之後詹士二世希望成立支由大公教徒組成向自己負責既軍隊去保護自己
國會當然唔會比啦 就係大家拗緊既時候 最致命既事發生啦
詹士二世第一個仔詹士·弗朗西斯·愛德華·斯圖亞特出生

蒙默斯公爵詹士·史葛處決

係詹士·弗朗西斯·愛德華·斯圖亞特出生前詹士二世得兩個女湊得大
一個叫瑪麗 荷蘭聯省執政奧良治親王威廉三世個老婆 一個叫安妮 嫁左比丹麥王子
因為佢兩個係女如無意外都冇機會繼承王位 所以為順應民意佢兩個都係受聖公會教育大既
但而家生左個仔出黎又唔同講法囉喎
為左體現我既宗教自由政策 我個仔要接受大公教教育!!

為阻止再黎多個大公教國王 國會討論禁止非聖公會教徒繼承王位
就咁開返一年都未夠既國會到11月又被解散

瑪麗 安妮

以上呢一切荷蘭聯省執政奧良治親王威廉三世都看在眼內
長此發展落去英國會變成一個更穩定既親法國家 荷蘭將有可能受到水陸兩路圍攻
威廉三世秘密搭上左英國議員 係佢地身上得知"佢地唔介意詹士二世個女繼承王位"
得到英國議員既暗示同默許後威廉三世開始秘密組織一支艦隊

1688年又死多個選侯
科隆大主教西伐里亞公爵馬克西米連·海因里希死左 路易十四希望插個自己既親信落去
呢個任命對荷蘭黎講絕對不能接受 如果法國得到科隆主教區 咁法國可以兜過西屬尼德蘭同荷蘭直接接壤
荷蘭會受到法國直接威脅
最後係教宗同神聖羅馬帝國皇帝支持下 巴伐利亞選侯馬克西米連·伊曼紐爾個細佬約瑟夫·克萊孟當選科隆大主教
9月路易十四以回收佢啊妹伊麗莎白·夏綠蒂既領土出兵神聖羅馬帝國
大同盟向法國宣戰

而家威廉三世要加快行動啦
如果法軍係神聖羅馬帝國既軍事行動進展順利既 佢將有可能介入英國王位既鬥爭
但心急都冇用 9月既北海係吹西南風 威廉三世只好日日匿係教堂求神拜耶轉吹東風

11月11日終於借到東風 威廉三世留底佢老婆英國公主瑪莉係荷蘭帶住萬五人出發前往英國
突然收到荷蘭軍登陸布告既詹士二世即刻下令支軍隊去迎戰
結果支軍隊直接向荷蘭軍投誠
約翰·丘吉爾!!今次得你救得到我啦!!就好似當年鎮壓咁蒙默斯叛亂對付班荷蘭人啦!!

陛下我應承你 三百年後我既子孫會返黎拯救英國 但家陣已經冇人救得到你啦
最後連約翰·丘吉爾帶埋佢支軍隊投靠威廉三世
12月21日詹士二世係倫敦一片反大公教騷亂中逃離英國流亡法國 而威廉三世就係一片橙色既絲帶同歡呼聲中進入倫敦

威廉三世登陸英國

威廉三世進入倫敦後重開國會
國會重開後既第一個議題係詹士二世同威廉三世既地位問題
威廉三世既盟友輝格黨認為既然詹士二世自行放棄王位咁國王當然係威廉三世啦
咁托利黨又會問啦 首先就當詹士二世死左咁都只係佢個大女瑪麗做國王姐 更何況詹士二世仲生勾勾ON99係法國喎 不如瑪麗做國王威廉三世做攝政啦
呢鋪又到威廉三世唔制囉喎
到最後得出既結論係瑪麗同威廉三世做共治國王 英國國王必稱威廉三世&瑪麗二世
其後國會通過1689年權利法案宣佈:
國王不得干涉法律 和平時期未經議會同意國王不得維持常備軍 冇議會同意國王不得徵稅 人民有向國王請願既權利
人民有配帶武器用以自衛既權利 人民有選舉議會議員既權利 國王不得干涉議會既言論自由
人民有不受酷刑既自由 人民有係未經審判既情況下不被罰款既自由 國王必須定期召開議會
因詹士二世已經違反上述約定所以佢係非法既 而逃離英國既詹士二世已經宣布退位
大公教徒不得成為英國國王 威廉三世同瑪麗二世係詹士二世既繼承人

1689年權利法案

其實關於威廉三世密謀搶奪英國王位既計畫路易十四早就收到情報
但佢認為威廉三世會陷入英荷間長期既戰爭中 只要佢快速解決神聖羅馬帝國就可以一次過執晒兩隻死雞
而佢而家面對既情況係威廉三世帶住英荷兩國加入大同盟向法國宣戰 法國陷入被全歐洲圍毆既劣勢中

路易十四只好放棄主動出擊速戰速決既戰略 改為同大同盟打場"逆焦土戰"
法軍清掃整個萊茵蘭地區既城鎮村莊同設施 阻止大同盟軍建立前進基地
但當威廉三世穩定左英國局勢之後由約翰·丘吉爾帶領既荷蘭陸軍就開入戰場啦
荷蘭同勃蘭登堡收復萊茵河下游 巴伐利亞亦將佢係東線大土耳其戰爭中既軍隊調返西線連同洛林公國收復萊茵河上游
開戰年零法軍就已經退守本國
為突破困局路易十四決定資助走難黎自己屋企既詹士二世去搶返佢既王位

1690年6月詹士二世帶住幾千法軍登陸愛爾蘭
係大公教徒為多數既愛爾蘭 詹士二世好快就號召到二萬幾人準備反攻英國
然後又好快係博恩河戰役比威廉三世帶住萬六人打返轉頭 詹士二世又走難返法國

當年跟住孔代親王路易二世打仗既新兵盧森堡公爵弗朗索瓦·亨利·德·蒙莫朗西-布特維爾而家已經係獨當一面既軍官
因為萊茵河下游戰線失利盧森堡公爵弗朗索瓦被任命為新既指揮官
為舒緩神聖羅馬同法國邊境既壓力 盧森堡公爵弗朗索瓦帶兵進攻西屬尼德蘭既交通要道弗勒呂
法軍有三萬人 大同盟軍有三萬八
戰術依然係自三十年戰爭古斯塔夫二世·阿道夫流傳落黎個套
兩軍步兵以戰列排列 大炮擺前後 騎兵擺左右或後方
以大炮掃射開幕 然後步兵前進 然後...
然後係戰況未有任何一方顯出優勢下盧森堡公爵弗朗索瓦就突然下令騎兵進攻
法軍騎兵係大同盟軍嚴密既炮火下強行衝鋒死傷慘重 但係法軍槍炮既掃射下同經騎兵多輪衝鋒後大同盟軍士氣潰散
最終法軍死傷六千 大同盟軍死傷萬一 八千被俘
呢種唔要命打法就係盧森堡公爵弗朗索瓦最大特色
自己人死得多又點?打贏就得啦

弗勒呂戰役

靠盧森堡公爵弗朗索瓦令法軍係萊茵河下游戰線有少少進展 但係萊茵河上游同西班牙戰線都陷入膠著
而家仲要再開多條戰線
薩伏伊公國加入大同盟

自開戰以黎法國係義大利既傳統盟友薩伏伊公國一直保持中立
法國同大同盟雙方都希望可以拉攏薩伏伊公國為戰線打開缺口
當路易十四覺得薩伏伊公國受大同盟行得愈黎愈近既時候 佢係兩國邊境駐重兵要脅
結果薩伏伊公國直接加入大同盟向法國宣戰

而家法國所有鄰居都成為自己既敵人 路易十四目標以大同盟兩條最弱既戰線萊茵河下游同義大利為突破口
法軍趕係大同盟軍援兵到達前戰勝薩伏伊 但未能趕及冬天前爬過亞爾卑斯山 冬天過後義大利戰線亦陷入彊持
而係北面既萊茵河下游1691年4月路易十四帶住九萬二人御駕親征攻陷西屬尼德蘭既蒙斯
然後係1692年5月更進一步帶十二萬大軍進攻默茲河同桑布爾河中間既那慕爾城
只要攻陷那慕爾法軍就可以控制西屬尼德蘭同直入布魯塞爾 路易十四希望可以以此逼使荷蘭投降
6月30日那慕爾陷城
陷城後盧森堡公爵弗朗索瓦帶八萬人向東進攻列日 如果順利既唔只係荷蘭 對成個大同盟軍都非常不利
為此岩岩返到荷蘭既威廉三世亦親自帶八萬人去迎戰 大同盟戰爭中最大會戰以法軍死傷八千荷軍死傷一萬告終
雙方又退守各自據點

第一次那慕爾之圍

戰爭一路拖到1694年 最初路易十四只係準備打場短期細範圍既戰爭
但而家自己成為全歐洲既公敵 戰場遍佈全國邊境 每條戰線都有十幾萬人服役
以當時歐洲既生產力同人口密度黎講已經係極限
1649年年尾法國爆發全國性饑荒 餓死二百萬人
而自己手下得力猛將盧森堡公爵弗朗索瓦·亨利·德·蒙莫朗西-布特維爾亦係1695年1月15日病死

失去強敵威脅既荷蘭軍反攻那慕爾 法軍就以轟炸布魯塞爾作回應
結果荷蘭收復那慕爾 而布魯塞爾就被夷為平地
然後戰況就一直保持停滯
冇人有能力發動進攻 冇人有條件發起和談 冇人知道點結束呢場仗

炸成廢墟既布魯塞爾大廣場

1696年薩伏伊公國同法國展開秘密談判 薩伏伊公國脫離大同盟宣佈中立
法軍得以抽調義大利戰線既軍隊作最後既反攻 1697年法軍攻陷荷蘭既阿德同西班牙既巴塞隆那
法國同大同盟各國係荷蘭簽訂萊斯威克條約
法國承認威廉三世英國王位 停止對詹士二世既資助 恢復奈梅亨條約時既邊界 交還洛林公國
但得到聖多明哥 本地治里 新斯科舍

西伐利亞條約（1648）
比利牛斯條約（1659）
1661~1662年間獲得的土地
亞琛條約（1668）
奈梅亨條約（1678-1679）
吞並夏洛萊（1684）
賴斯韋克條約（1697）

路易十四廿幾年既擴張野心一鋪清袋
而家路易十四又死返返入佢既凡爾賽宮日日對住張世界地圖睇下邊到又有得比佢扇風點火
好快第四個機會就黎啦
1700年佢收到一篇訃聞

下集西班牙王位繼承戰爭

留明支持
巴打之前個d集數都好好睇

留名支持

你應該唔認得我

雖然我次次都幫你推POST

再係咁, 我要做契弟了

羅拔巴打

pish

先回覆再睇
契爺!

Thank you brother and please keep writing.

lm

估唔到路易十四咁勁,同全歐洲開拖

支持巴打

估唔到路易十四咁勁,同全歐洲開拖

支持巴打

定係太蠢?

估唔到路易十四咁勁,同全歐洲開拖

支持巴打

定係太蠢?

法國佬無壓倒性既實力
咁既情況下其實笨柒

估唔到路易十四咁勁,同全歐洲開拖

支持巴打

定係太蠢?

法國佬無壓倒性既實力
咁既情況下其實笨柒

講過路易14冇諗過場仗會打到咁大
佢認為英荷會為王位打返幾年結果一開拖荷蘭就帶住英國加入戰爭
佢又睇死西班牙唔敢同佢開拖結果一開拖西班牙軍就爬過庇利牛斯山
佢又睇死巴伐利亞唔會抽兵返黎結果一開拖成僝萊茵河上游通街都係巴伐利亞軍
佢唯一估得中既就係奧地利會集中對付鄂圖曼唔會加入戰爭
佢比全歐洲人圍毆都係打成平手都算係咁啦