【文化籽：影評】
特務最好係好似《國產凌凌漆》嘅阿漆，一個街市搵到幾件同款嘅豬肉佬，冇台型唔顯眼零特點，可以喺唔同環境隱身行事，即係你大聲話你係特工，會被街坊圍住取笑，方為上品。西片特工硬係個個西裝筆挺，凍時仲要加件長褸；一係修身皮褸，曬時仲要加副黑超，用衣着同人講：「我好型我好型，望我望我。」慌死出街冇人留意咁。

《原子殺姬》的女主角查理絲花朗係英國軍情六處首席女特務，冷戰尾聲被派去柏林，搵一份洩漏咗隨時觸發第三次世界大戰嘅間諜名單。佢明明帶咗個鬼咁細嘅篋去柏林，點解會裝到咁多套靚衫同長boots？次次有行動，啲衫都鬼咁搶眼，超模骨架嘅佢行路行到catwalk咁，隨時吸引時裝精厚住面皮衝埋去問：「你件褸喺邊度買？你副黑超係咪乜乜牌子？」講呢啲，係因為套戲開頭真係幾悶。文戲煩到煩死，鋪排長過長城，對白故弄玄虛blah blah blah，拖到人分晒心。後來睇到多場佢以1敵N的快狠埋身打鬥，稍稍振奮，可是緊接拖拉冗長盤問情節又將扯行神經拉鬆。你係好難怪我留意咗佢啲跌膊衫同斗零踭嘅。

查理絲花朗失驚無神同阿法國女特工攤着，而阿法國女特工啲舉止反應實在太冇特工相，睇到人充滿黑人式問號。黛芬拉薩兒個樣明明係好烈好嗆喉嗰種烈女，扮甜美純真癡女有少少格格不入。電子風格配樂同故事幾夾，但有時太大聲，over咗。去到近結尾嗰場護送特務嘅重頭戲終於有番睇頭，極刺激緊張。七分幾鐘一shot落（有一個半個拼接位嘅）連環血腥打鬥，唔係你死就係我亡嗰種為生存本能式狂打喪砌，見嘢就擸來當武器實感極重，戰爭民族壯漢一個個瞓低，又再有一個個擁上，查理絲花朗真身演出，由樓梯打到入屋，會喘氣會企唔穩會有嗰種「X，唔L係啩，仲有？」的細緻反應，戥佢痛呀真係。結尾個twist估到，但動作場面搭夠。可惜反派太蠢太易對付，反派蠢，真係幾無癮的！


打鬥場面的精采，被冗長文戲溝淡晒。


淺色金髮已經好搶眼，仲要戴晒超，咁惹人注目跟蹤真係話咁易。

《原子殺姬》（Atomic Blonde）
導演：大衞雷奇
演員：查理絲花朗、占士麥艾禾、蘇菲亞寶堤拉
評分：75分
現已上映

記者：葉青霞
編輯：馮秀珍
美術：孔文彬

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
剛剛睇完比想象中差