我今日黎，係想影響更加多既人。

當我地用手指指向我地既上一代，話佢地無做啲乜，令香港今時今日變成咁；我地既下一代都會指向我地，問我地做過啲乜，點解香港2047變成咁？
有呢個自覺，我地就知道唔係有用定無用既問題；而係生於當下，我地有啲咩應該做，而又未做。

今日個遊行好似係無用，聽日個社會一樣係如常，今日坐緊監既人到聽日依然係受苦。
我今日點解要出黎呢個集會，係希望更加多人關注過往一班被主流傳媒忽略的示威者、抗爭者。

因為旺角初一已經有五個十幾至二十幾歲既示威者坐緊三年監，有一個坐緊四年九個月。因為過往反對網絡廿三條有一位而家坐緊兩年監，法庭唔比佢保釋。
呢啲就係主流鎂光燈下一直忽略的一班無名士抗爭者。

我相信佢地既付出唔係為左搞散運動，佢地唔係鬼，佢地係香港命運共同體既一分子。
只要呢個共同體有人受到迫害，就係我受到迫害，只要有人受苦，就係我受苦。
我就要走出黎反抗呢一切，為佢地發聲

呢個就係生於當下慢慢向專制過渡既香港，我仍然可以做既唯一一件事。
我地而家咩住日暴動罪，咁多支cam返到去會話我地係暴徒。
我想同大家講一個故事

五十年前既今日，有一對小姊弟在北角看見汽車車頭蓋上有一個鐵罐，佢地覺得好靚，拎起黎玩，結果這對小姐弟被炸到腸穿肚爛。
六七年既果場暴動，當日既*真*暴*徒*今日成為左當權者。

當日治佢地既果條暴動罪，今日佢地成為當權者後，用黎治我地呢班靚仔。
我無任何價值觀既判斷，我只係平鋪直敘曾經發生的歷史。

點解我地會知道呢段歷史，同我地今日香港比較？點解我會知道呢一切，係因為有一個人係佢自己既崗位、盡佢自己既本份，就係<消失的檔案>既導演。
或者有好多人係佢自己既崗位能夠走出黎衝，唔能夠參與群眾運動，但只要佢係自己既本份，做好自己應做的份內事，社會係因為咁而改變。

如果唔係佢，我地唔會知道呢一班真暴徒，今日既當權者，佢地當初做過啲咩野，佢地今日做緊啲乜。

所以，最後，我講唔出啲乜野大道理，亦無辦法好好咁鼓勵大家，為大家充權。

因為好老實講，我連我自己都未鼓勵得到，我無辦法鼓勵更加多人。我連我自己既人生規劃都未規
劃得到，我無法規劃香港社會運動既將來。
但係，做好自己，盡好本份；過得到自己，過得到人；對得住自己良心。知道將來我地既下一代回望返我地既時候，我地係可以堂堂正正抬起頭同佢地講：我當年有付出過。就係咁簡單。多謝你地。

https://www.facebook.com/astrophel.lim/posts/1446495278790791