http://video.appledaily.com.hk/mcp/encode/2017/10/09/3458947/20171010_sub703newAD_clean_w.mp4


雞仔仍是隻好奇的小貓，整天跳來跳去，找貓大姐打架。

大家好，我是糯米雞（雞仔）啊！我的媽媽是面書專頁「低能診所奇觀」的版主「寶豬姑娘」，佢話佢怕被認出所以唔肯出鏡。九月初的時候，她妹妹在屯門公園撿到我。那天的我剛洗了澡，乾淨企理，飄着淡淡花香，萌度爆錶，身旁落下一封信，說我的病太嚴重，前主人自顧不暇無力照顧，望有心人領養。從此，我來到這個三喵一狗一奴婢的新家，做小霸王。

回家後寶豬姑娘發現我大小二便失禁，尿是滴出來的，拉的是灰色的泥漿屎，有時還突然噴出，時濃時淡，嚇得她一陣陣，看醫生，才知道所謂曼島貓症候群，是種基因疾病。我沒尾巴，有一節脊椎骨很鬆，有些卻沒長出來。一輩子巨腸症，大小二便失禁，惡化到最嚴重時會癱瘓。西醫問寶豬有冇想清楚，要一針送我一程，還是照顧我一世。回到家她反而問我：「你想唔想繼續喺度呀？」我喵一聲以示想食「罐罐」。罐罐一來，我紮行馬搏命食，怕這幸福隨時消失，轉個頭就把碗洗得立立令。寶豬望住隻碟吟噚：「你估佢想咁㗎？你估佢想日日屙到屎眼㷫，日日俾我㩒膀胱放尿呀？有得揀，邊個唔想做香菊靚仔？食得咁乾淨，即係唔想死……」

每日按摩放尿五次　周末做針灸
就這樣，我又眼睩睩地回家。她給我穿尿片，但常穿，本來又濕又紅的屁股又會悶出皮膚炎。屋裏其他貓姐姐投訴我滴到四處屎迹，寶豬索性辭了工作喺屋企抹地，「現在我沒工作的，牠的屎太麻煩了！貓咪性格敏感，衞生情況不好，會令牠有壓力，惟有等牠穩定了才再找工作。」她每早起來先吸塵抹地，給我洗澡，「好狼狽呀！洗完不夠兩小時牠可能又瀨屎，又要再做一次。」每日定時幫我按摩放尿五次，怕累積了會變尿結石，便便就任我滴在尿布上。「那時屙到有肛門脫出的情況，紅了一嚿嚿，腸子都出來了，試過幫牠推回去。我房間都飄着淡淡的屎味！」她已成了我的專屬按摩聖手，每次笑着跟人講，邊扮惡兇我，但似乎挺開心啊。

現在每周六，她都帶我到元朗的動物診所做針灸，紓緩因為姿勢不佳，而拉緊的肌肉與神經，讓我大小便可以排得更乾淨，每次大概要一千蚊。林顯全醫生回憶說首次見我，我肚子塞滿大小便超脹大，而一隻貓咪廿四小時不排尿，已有可能急性腎衰竭，「其實牠的神經有點錯亂，應該放鬆的時候不放鬆，收緊時又不收緊，所以小便排不出來，大便就不停漏。」近年他都接過好些來自繁殖場的動物。不是說購買名種貓就一定是罪，但過度繁殖，沒好好配種，或只為靚樣而配種，會令動物的腎元氣大傷，生出各種病，「我們中醫角度腎是主骨，腎不好，好多時都會影響骨骼的生長。」病雖然麻煩，像我兔仔跳式的跑姿不好，令骨頭磨損，可能很早會出現關節炎，但在醫生角度，既然我仍活潑求生，只要能減輕痛楚延緩病變，就該盡力做。

病足一世　無人願意領養決定「封盤」
網頁上，她盡貼了我在家咬貓、搶吃、周圍跑的黑材料，「牠真的好活潑，及真的好喜歡吃東西。初來報到時讓我發現牠便便裏有貓砂，可能牠以前肚餓到要吃貓砂，小朋友的陰影，讓牠求生意慾更強吧。」賣萌賣得太落力，每日，都有人發訊息給寶豬說要領養我，寶豬每次都耐心解說我的病情。個個問：「醫唔好㗎？」「一世㗎。」訊息就靜咗，然後沉底。於是，寶豬決定封盤，我永遠都是這家的孩子。個個問她點頂，她總大剌剌答：「一世㗎啦！佢都嚟咗屋企，盡做囉！」她好像從沒問過醫生我有多長命，佢個思前想後樣，似在逃避，又似問來冇用。她說我教了她好多，例如：「不是所有貓咪都天生健康，即使不完美，都可以有不同的生活、飲食方法，不是說丟就丟。」如林醫生所講，「每個動物都有使命，教會我們一些課題，牠就會安樂離開。而不是藉着一支針夾硬送牠走。」然後寶豬抱起我一路按摩放尿一路講：「我真係個仆街嚟㗎！唔係今世點解喺度幫你揦屎揦尿還債呀！雞仔！」寶豬把聲好溫柔，脹悶的肚仔慢慢輕鬆起來，爽呀媽媽，等陣係咪可以食罐罐呀？


寶豬姑娘在面書另一個page「珍寶豬」分享糯米雞的霸王事，包尿布的萌樣，迷倒不少粉絲。


最麻煩是朝朝要沖涼。


雞仔的生活倒是挺舒服疏肝。


雞仔的尾椎骨生長不全，肚子裏常塞滿排不出的尿與便便。


在撿到雞仔時，身邊有上一位主人忍痛留下的信。




「木森林動物整全療法中心」的註冊獸醫林顯全幫雞仔針灸，排解筋骨及神經累積的壓力。

facebook：低能診所奇觀、珍寶豬

記者：陳慧敏
攝影：徐振國（部份圖片由受訪者提供）
編輯：陳慧玲

source : http://hk.apple.nextmedia.com/supplement/retails/art/20171010/20177359
+++++++++++++++++++++++++++++++++++++++++++++++++++++++++++++++++
貓貓慘慘