少女時代出道十周年，秀英、徐玄及Tiffany傳聞不再續約，組合面臨名存實亡，好似好大件事。大鑊，我完全沒有感覺。我愛看長腿，也喜歡欣賞美女，更加鍾情於目擊長腿美女在面前勁歌熱舞。偏偏對少女時代一類的韓國女子組合完全絕緣，一定有特殊的理由。

說來慚愧，韓風崛起時，我正在雜誌社處理外國娛樂欄目，偶爾也需要兼顧一下日本演藝界新聞。忽然聽聞韓國有隊叫少女時代的團體熱爆，急急腳上網看MV，出信和買寫真集。你很容易便明白她們走紅的理由。同期最紅的日本女子組合，是AKB48，賣人多勢眾，賣可愛，賣近在咫尺，似街坊多過似偶像。少女時代的整齊舞技、統一外形，賣的，是另一回事。偏偏，我用盡所有方法記熟九位美女的長相和名字，記了十年，記到九變八隨時再變五，仍然未能夠分辨得清清楚楚。我應該要找個醫生看看。

是人數太多？是我只有能力分辨出阿Sa與阿嬌？九件Cookies，我輕易記得Serana、Helena、Gloria喎。是因為對外國人有份陌生感？又唔見我分唔到前田敦子、小嶋陽菜、大島優子？遮住個頭，單單看件比堅尼，我都有信心唔會搞錯呀！咁點解經常搞錯太妍跟孝淵？

某一個周末，跟方太觀看老歌電視節目，開始有少少眉目。李蕙敏做嘉賓，理所當然地獻唱首本名曲《活得比你好》，驚喜在先唱Echo的《第四者》。歌曲的流行程度不算太高，組合一樣，我卻非常有印象，可以在不倚賴google的情況下，完整地背誦全首歌詞。Echo出道時，另一女子組合夢劇院已經頗有名氣，《天生一對》相當受歡迎，「你我仿似一套戲，盡力演出花點心機。」如果李敏跟劉文娟肯上電視台跟家燕姐合唱，肯定成為城中熱話。計歌曲流行程度，我懷疑後來的Face To Face都比Echo優勝，「愛上你Milano，夢在浪漫街道，啖着Cappucino，擁抱你。」Cafe的生意額應該激增。我就係鍾意Echo。一路看李蕙敏，一路在投訴為甚麼不找回區海倫重組Echo一晚，似周慧敏加湯寶如加王馨平以《美少女戰士》作賣點。

還是方太心水清：「上個星期，歐海倫真係有上過節目喎。同李蕙敏不和嘛，點會再拍檔吖？」回憶隨即湧上心頭。女子組合的熱潮來得快時去得快，夢劇院玩了三年，因為成員分別前往外國讀書而解散；Face To Face又是三年，因為其中一名成員遇上交通意外而無奈拆夥；Echo算持久，捱多一年，臨分手時，出了一張叫《不再糾纏》的專輯，大概已表明心迹，明刀明槍明顯地互相唔妥。我可能就是欣賞這一種個性鮮明。

所以，頂唔順少女時代。少女時代多次訪港，也未親身接觸過。同期憑《Nobody》跟少女時代鬥到七彩的Wonder Girls，反而曾有同事面對面訪問。相熟攝影師的事後評價是，個個女仔都被幕後經理人緊緊箍死，似毫無靈魂的木偶，多於有血有肉的真人。少女時代的情況，雖不中亦不遠吧。頂十年，才開始傳出四分五裂，算忍耐力驚人了。做少女時代成員，日日要跟大隊化差不多的妝，穿差不多的背心熱褲，說差不多的台詞；到回復個人發展時，才有空閒喘一喘氣，會有幾辛苦？你看一看科幻片《獵殺星期一》（What Happened to Monday），講述孖生七姊妹為逃避政府追殺，日常露面，要以同一身份示人，將自我個性徹底遮蓋。最終還是無法忍耐，互相殘殺收場。你可以想像作為韓國組合的成員，究竟有幾痛苦。有求才有供，誰叫大部份人只對少女時代有感覺，不會懷念Echo。正如觀看《銀翼殺手2049》（Blade Runner2049），人人手持一副人工智能便心滿意足，個人工智能樣又靚身材又正仲任勞任怨有情有義，邊度搵呀！有誰會介意，其實全個城市整條街的人工智能，全部也被倒模成同一模樣？

Profile：方俊傑
觀塘長大，壹仔打滾，偏愛西片、西劇、中日韓美女。利物浦悲慘球迷，非西人一個。
facebook:方俊傑

編輯：謝慧珊

source : http://hk.apple.nextmedia.com/supplement/special/art/20171013/20181028
+++++++++++++++++++++++++++++++++++++++++++++++++++++++++++++++++
《銀翼殺手》 變咗煩膠片