HKGalden旅遊臺
發表文章發起投票
雙牛美景 金黃芒草陪行


近年愈來愈多人玩越野跑,操「雙凹」、「大魚雙M」已成為指定動作,之不過每星期都去同一段路,個景更靚都睇厭啦!其實,香港仲有好多靚景山徑,就如西貢經水牛山落沙田嘅路線,「雙牛」山頂便坐擁無敵景觀,景色360度無阻隔,沿路仲有金黃芒草陪伴,無論睇日出日落都是絕美景地。個個都話想去睇芒草,唔一定要去大東山嘅!
[/size=4]


登上水牛山,美景盡在腳下。

白沙灣起步 路程7公里
西貢去沙田有好多山路揀,今次介紹的是白沙灣起步,經孟公窩路、打瀉油坳、水牛山及黃牛山落黃泥頭,路程雖只有7公里,不過總攀升有成700米,部分山徑更被野草淹沒,行山初哥最好搵經驗人士結伴同行,別過分依賴手機同地圖。起點在孟公窩路(溱喬斜對面),巴士及小巴都可直接到達,一路沿孟公窩路、佛光寺方向行1.3公里,過了墓園後,在「企壁山鄉村供水池」告示牌旁的車路直上(不要轉右),再前行約500米後便會見到通往「麥理浩徑」的指示牌,沿此路登山就對了。咩話!又係麥理浩徑?唔好噓住,只係話去嗰個方向啫。


起點在西貢孟公窩路,跟「佛光寺」方向行就對了。


到佛光寺後沿車路直上,毋須進入寺內。


見到企壁山鄉村供水池的告示牌後靠左直上,不要轉右。

打瀉油坳直剷上山
接着的1.5km跟着「麥理浩徑」指示牌上山就會去到「麥四」的打瀉油坳,沿途都是石級及泥路,又會經過高度及腰的雜草,乾燥日子隨時鎅損手腳,出發前要揀啱衣着啊!上到打瀉油坳有個小平原,這裏會見到「茅坪」及「基維爾營地」的指示牌。好熟口面?係呀,咪就係你哋日操夜操嘅「麥四」囉。冇印象邊個位?落「萬里長城」前呀!記得未?不過,今次唔係去基維爾,也不是逆走返水浪窩,而是直剷上指示牌後的兩座大山——水牛山及黃牛山。


看見通往「麥理浩徑」的指示牌便是登山入口。


初段以石級為主,路況崎嶇。


沿路都有指示牌,不易迷路。

芒草海在兩山之間
登水牛山的路徑好易走漏眼,見到指示牌後向「茅坪」方向走十米左右,細心留意左方草坪,這裏有條若隱若現的山徑(秋冬季便較明顯),上山路段相對崎嶇陡峭,其中一處還要攀過大石才可繼續前進,再經過茂密如林的長草山徑才到達海拔606米的水牛山頂。不過辛苦都係值得嘅,西貢、沙田,以至飛鵝山一帶山脈都在腳下,個景正到爆呀!再沿山徑行350米左右,便可登上604米高黃牛山頂。值得一提是水牛山及黃牛山之間的坳位已出現芒草海,在斜陽照射下會散發閃閃金光,睇芒草唔一定要去大東山同人逼餐懵嘅。記着,此路段非親子山徑,找路及上落陡峭斜坡都要有一定的行山經驗,帶幼童去就可免則免了。


離開樹林後,水牛及黃牛山便在眼前。


登水牛山的入口就在指示牌的斜後方,路徑若隱若現,但不難找。


接近山頂的一段要稍作攀爬,切記量力而為。

黃牛山頂向沙田回程
賞完美景,可從黃牛山頂向沙田方向落山,行約400米後會見到分岔路,在這處左轉沿石級下走600米,見到十字路口右轉便可落花心坑,再過對面馬路繼續直走,很快便會到黃泥頭巴士總站。嫌7K太短唔夠喉的話,可選擇在剛才的十字路口左轉返回麥理浩徑,位置在M091至M092間,到時想點玩自己決定就好了。相對於麥理浩徑,此路線算不上熱門,平日仲可一個人靜靜地欣賞大自然,也因為遊人不多,有些植物的枝幹已長到山徑上,使部分山徑變得不明顯,不過在清涼的日子結伴同行、有合適裝備,行開山的朋友都唔係難應付嘅。


部分山徑已被野草淹沒,行山初哥最好搵經驗人士結伴同行。


走到水牛山頂,可飽覽沙田景色。


上月已開始出現芒草海,相信現在整個山頭都變得更金黃色。


從黃牛山頂向沙田方向落山,於400米後的分岔路左轉沿石級下走。


到十字路口右轉便可落花心坑,隨後路段比較好走。


見到車路後,過對面直落便可返回黃泥頭。

撰文:鄭浩文

攝影:方偉堅

source : http://orientaldaily.on.cc//cnt/lifestyle/20171125/00321_001.html
+++++++++++++++++++++++++++++++++++++++++++++++++++++++++++++++++
幾易迷路
Good0Bad0
2017/11/25, 12:21:29 中午
本貼文共有 0 個回覆
此貼文已鎖,將不接受回覆
發表文章發起投票