| 發表文章 | 發起投票 |
財運亨通 錢路暢順
新春慶賀，祝大家財運亨通，賺到盆滿缽滿！不過想搵錢除咗要識得喺適當時機主動出擊，還要懂得趨吉避凶，只是怎樣才能在今年戊戌狗年正財偏財同樣運籌帷幄呢？今日請嚟梅花易數專家常歡師傅為大家教路，睇吓點樣可以喺狗年全方位提升財運，同時了解自己所屬生肖的流年財運。
[/size=4]
恭喜大家戊戌狗年都發財！（設計對白）
狗年財位在東南
想發財嘅第一件事，就係要知道流年財位喺邊個方位，今年戊戌狗年嘅正財位於東南方，而偏財位則坐落於西南方。常師傅指如果想催動正財運勢，可以喺東南方位擺放五行屬火嘅物件，例如馬形或蛇形嘅擺設、枱燈，又或者係紅色嘅物件，要留意千祈唔好擺放屬木嘅物品，否則會削弱正財運。另外，喺西南方嘅流年偏財位，可擺放屬土嘅物件，例如竹或羊形嘅擺設、瓷器，又或者係黃色嘅物件，忌放置屬火嘅物品，自然可以提升偏財運。
大家要認準自己嘅財位喺邊度啦。（設計對白）
着啱旺財衣物嘅顏色，財運到手咁話咁易。（設計對白）
12生肖流年財運
大家除咗留意流年嘅正財位同偏財位外，更重要嘅係要留意自己所屬生肖嘅流年財運。常師傅指出雖然12生肖喺戊戌狗年財運各有不同，但只要留意趨吉避凶嘅方法，配以合適嘅衣飾，對財運順利者能起到催旺作用，而稍為失色者亦可減輕受影響嘅程度。
鼠：（1960年、1972年、1984年、1996年、2008年）
今年財運非常順利，獲得吉星「八座」同「唐符」照臨，打工仔可獲得發揮才華嘅機會，並獲得上司及老細嘅賞識，有相當大升職加人工嘅機會。留意小人及是非纏身，凡事最好低調啲。如果想提升財運嘅話，可以多穿着銀色嘅服裝，並佩戴金屬飾物。另外，屬猴嘅朋友係能配合自己嘅催財生肖，而戊戌狗年嘅催財方位係正西方。
牛：（1961年、1973年、1985年、1997年、2009年）
由於今年係刑太歲，整體運程顯得反覆，財運亦是如此。幸有「天乙貴人」，此星係第一大貴人星，工作及人事關係上往往獲得助力及得到貴人幫助，對方若是肖蛇嘅話將對自己有更大助力。不過始終受到刑太歲影響，想財運相對平穩嘅話，最好就係多穿着紅色嘅衣服，或者佩戴尖角形嘅飾物。此外，亦要留意自己今年嘅財位喺正南方，放置蛇形的擺設，有利財運提升。
虎：（1962年、1974年、1986年、1998年、2010年）
今年獲「小耗星」照臨，此星主使費會比較多，若然支出冇計劃者，則要改變以往消費嘅習慣，謹記喺理財上要小心，最好就係多啲儲蓄同埋預留一定嘅預算，以應對未知嘅開支。不過又唔使咁擔心，常師傅指如果多穿着啡色嘅衣服，及穿戴方形嘅飾物，可減少受影響嘅情況。另外，要留意今年所屬生肖嘅財位位於中央，可於呢個方位放置豬形擺設，有利財運，若然身邊有肖豬嘅朋友，將會對財運更有助益。
銀色服裝和鞋襪可提升肖鼠朋友嘅財運。
尖角形嘅飾物最啱肖牛朋友佩戴。
對肖虎嘅朋友嚟講，今年孖住個「豬」朋友反而可大利財運。
兔：（1963年、1975年、1987年、1999年、2011年）
肖兔嘅朋友去年因沖太歲關係，正財同偏財都較為不利，今年嘅情況卻有唔同，因為今年與太歲六合，代表和諧合作嘅意思。對於打工仔嚟講，人際關係將有唔錯嘅運勢，做生意嘅朋友則有更多與人合作搵銀嘅機會，對於計劃創業或轉工者，更係相當好嘅一年。如果想令財運更好，可以穿着卡其色嘅衣服，及佩戴方形嘅飾物，並且留意中央呢個財位。此外，留意催財生肖為豬，不妨留意未來合作嘅對象或身邊嘅同事及朋友，係咪屬於呢個生肖。
龍：（1964年、1976年、1988年、2000年、2012年）
今年由於沖太歲，凡事都會變得波動同反覆，而面對財運如此波動嘅一年，凡事最好都係宜靜不宜動，尤其係喺投資上，唔好太過急進，應該審時度勢，並且做好每步計劃先至行事。至於有博彩習慣嘅朋友，最好小注怡情。如果想令波動性減低，可以多啲穿着藍色嘅衣服，並且佩戴卷曲形嘅飾物。至於肖龍嘅朋友今年嘅催財方位為正北方，擺放馬形擺設，或孖實肖馬嘅朋友，有利財運免得太過反覆。
蛇：（1965年、1977年、1989年、2001年、2013年）
今年得「龍德星」高照，正財運將有大幅提升。「龍德星」係顆強化個人貴人運勢之星，而喺獲得貴人扶助嘅情況下，今年嘅事業發展將有明顯嘅加強，正財運自然有唔錯嘅進帳。如果想令正財運變得更加強勢嘅話，可以多啲穿着白色嘅衣服，並且佩戴圓形嘅飾物，如圓形戒指、腕錶等。今年嘅催財位坐落於正西方，擺放雞形嘅擺設，有利正財運嘅提升。若然工作上遇上肖雞嘅朋友，將有更大嘅助力。
方形飾物對肖兔朋友嘅財運最為有利。
肖龍嘅朋友不妨多啲佩戴卷形嘅飾物。
佩戴圓形飾物對肖蛇朋友嘅財運有正面作用。
馬：（1966年、1978年、1990年、2002年、2014年）
如果肖馬嘅朋友想喺今年不勞而獲嘅話，希望可能會落空，事關今年獲「將星」照臨，呢顆星主多勞多得。不過又唔好因為唔能夠不勞而獲而失望，因為「將星」其實係顆吉星，喺多勞嘅情況下，正財必然有出乎意料之外嘅增長，而該星又解做喺事業上擔任重要職位，打工仔有望以勞力換取升職加薪嘅機會。不妨多穿着金色衣服及佩戴圓形飾物，將有利正財運。此外，今年嘅催財方位為正西方，擺放猴形擺設亦有助提升財運。
羊：（1967年、1979年、1991年、2003年、2015年）
肖羊嘅朋友因為今年係破太歲關係，而破太歲有破開破壞嘅意思，從呢個層面嚟睇，財運不但只屬一般，更有破財之象。至於偏財運方面，更係因為運勢偏低關係，如果唔想令破財情況加深，千祈唔好抱住投機取巧嘅心理，凡事都係以保本為主。幸有「天德」吉星照臨，令財運喺疲弱嘅情況下有一定嘅幫助，如果想轉工或創業嘅話，財運亦會隨之而嚟。多穿着黑色嘅衣物，或者佩戴波浪形嘅飾物，並喺正北方呢個催財方位擺放豬形嘅擺設，將有助財運平穩。
猴：（1968年、1980年、1992年、2004年、2016年）
肖猴嘅朋友去年嘅財運相當旺盛，只係嚟到戊戌狗年卻因有太多凶星臨照關係，破財損失嘅機會較大，所以如果去年大使慣咗，或者有投注投資嘅朋友，要改變搵快錢嘅心態，凡事宜守不宜攻，並且做好財務計劃，以免出現破財及招致損失嘅機會。至於想轉工或創業嘅朋友，更需要做好充足嘅準備。如果想令財運免受凶星嘅影響，可多穿着青色嘅衣物，或佩戴長條形嘅飾物。肖猴嘅朋友催財方位為正東方，擺放龍形擺設令財運有所助益。
肖馬朋友穿着金色衫夠搶眼，又有運行。
肖羊嘅朋友今年不妨多穿着黑色衫。
長條形飾物啱晒肖猴嘅朋友。
雞：（1957年、1969年、1981年、1993年、2005年）
肖雞嘅朋友繼去年犯太歲，喺財運上要凡事小心兼宜守不宜攻後，嚟到戊戌狗年因害太歲關係，同樣要留意自己嘅財運。因為害太歲將會令肖雞嘅朋友，經常出現莫明嘅開支，而錢財就喺不知不覺嘅情況下流失。另外，害太歲亦有受暗中傷害之意，職場上容易招引暗箭，生意上亦會遇到唔少競爭阻力，宜凡事樂觀應對，理財上更以穩守為主。今年嘅大利肖雞朋友嘅顏色為綠色，並佩戴長條形物。催財方位為東南方，若然夥拍肖虎嘅朋友，可減輕財運受影響嘅情況。
狗：（1958年、1970年、1982年、1994年、2006年）
肖狗嘅朋友好唔容易喺去年迎嚟財運旺暢嘅一年，只係今年卻因為係本命年犯太歲關係，要喺財政上多加留意。雖然犯太歲好似好得人驚，但並唔代表會遇到唔好嘅事，凡事只需要穩重固本，唔好亂咁投資及衝動，就唔會有太大嘅影響。打工仔若然想轉工嘅話，最好先掌握市場及未來發展方向，而做生意嘅朋友則要制訂周詳計劃，免因求財心切而導致損失。催財顏色為黑色，而催財方位為正北方，擺放鼠形擺設，有利提升財運。
豬：（1959年、1971年、1983年、1995年、2007年）
今年能保持去年嘅財運暢旺勢頭，事關今年獲「太陽」同「天喜」兩顆吉星照臨，而呢兩顆星主人緣，象徵人緣將會極佳。如果喺去年已經打算轉工，卻並未實踐嘅朋友，今年將會獲得更好嘅轉工機會。若然從事生意嘅朋友，今年將會獲得貴人幫助，並且有唔少同人合作搵錢嘅良機，財運上可以話係相當順暢。如果想令財運進一步提升嘅話，不妨多穿紅色衣服，或佩戴尖形嘅飾物，催財方位坐落於正南方，放置蛇形擺設，同樣可令財運得到助益。
肖雞朋友記得搵個猛「虎」老友喇！
佩戴黑色飾物有助肖狗朋友催財。
肖豬嘅朋友要多啲着紅色衫，財運自然有所得益。
年初四返工勁旺
呢個世界最多嘅就係打工仔，而升職加人工係每個打工仔嘅夢想，如果搵正最適合嘅開工時間，呢年嘅財運自然順暢。今年最佳開工嘅日子係大年初四（2月19日），而最好嘅出門時間係卯時（早上5時至7時）及午時（上午11時至下午1時），大家要校定時間出門喇！
擺放魚缸助升職
喺辦公室都有分升職方位同孭鑊方位，而喺戊戌狗年嘅中央位及西北方係最易升職嘅方位，有得升職自然會加人工，大家對準呢個方位工作，或擺放魚缸一類有流動水嘅擺設自然有運行。做嘢最怕就係孭鑊，而今年最易孭鑊位有唔少，分別係東北方、正東方同正北方，唔想孭鑊最好避開呢3個方位，若然真係避唔開嘅話，可以喺上述方位擺放紅色嘅擺設，將減低出錯嘅機會。
橫財貼士要記住
想發橫財嘅最簡單方法，莫過於到投注站小注一下，運氣真係話嚟就嚟。全香港邊個投注站喺戊戌狗年最旺橫財運呢？常師傅指根據流年偏財方位嚟睇，位於香港西南方嘅投注站最旺橫財運，其次則係東南方嘅投注站。每年大初三都係新春賽馬日，因此常師傅畀個貼士大家，留意穿着黃色、啡色、金色、白色及銀色彩衣嘅騎師，最有機會跑出。
擺個魚缸喺升職方位，呢次真係有運行！
師傅話認住騎師件彩衣，贏錢機會大升。
梅花易數專家常歡教大家吸盡財氣。
撰文：林國豪
攝影：陳世昌
模特兒：Michelle、Chole @ Skyline Culture Media
鳴謝：梅花易數專家常歡
source : http://orientaldaily.on.cc//cnt/lifestyle/20180218/00321_005.html
+++++++++++++++++++++++++++++++++++++++++++++++++++++++++++++++++
睇完，百搭
0
0本貼文共有 0 個回覆
此貼文已鎖，將不接受回覆
| 發表文章 | 發起投票 |