https://video.appledaily.com.hk/mcp/encode/2018/02/20/3552186/201802201_ent_901_w.mp4

梁嘉琪喺15年俾《蘋果》喺曼谷遇到一個貌似洪天明嘅健碩男拍拖，事後森美喺電台節目揞名爆呢個健碩男原來就係商台監製金志堅。(新聞連結：http://bit.ly/2lnqPj8)雖然佢哋一直都低調戀情，不過嘉琪曾經講過希望喺3字頭之前結婚，睇嚟佢哋嘅戀情都好穩定。

之不過呢段情似乎出現暗湧，事關今日有周刊報道，嘉琪嘅男友阿金被爆喺舊年年尾偷食，對象仲要係分手多年嘅前女友，阿金多次背住嘉琪同對方密會，甚至仲發生關係，直到最近女方發現自己有咗，點知有人懷疑俾人設局，仲要求女方去驗DNA，睇吓個BB係咪自己經手，之後仲索性玩失踪，拒絕同女方聯絡。

報道仲話阿金一直扮冇事同嘉琪拍拖，日前仲影到佢哋一齊行又一城，買完賀年禮盒之後，十指緊扣咁坐的士去咗慈雲山，似乎係同長輩食飯，嘉琪全程表現好sweet，顯然嗰陣係唔知道呢件事。

今日有傳媒向嘉琪了解，佢親自喺網上回應呢件事，佢話：「感情事本來的我一向都不張揚，幾時開始不說，甚麼原因開始不說，幾時分手不說，甚麼原因分手也不說，當中的來龍去脈怎說得清。但今日，有必要交代一聲，免得令關心我的人擔心。兩人的問題早已存在，但畢竟，幾年感情，中間大家曾經努力過，最後，我還是作了個瀟灑一點的選擇。」

回復單身嘅嘉琪仲話：「現在，可以說的是，我已一個人上路了。現在，我的心思都放在我的工作上，家庭上，別人的事我沒有回應了。現在的我，不用擔心。對於未來，還是充滿期待。人生，還是有很多值得追求的事情吧。在這裏，已向你們說了我心中所想，今後，不再回應了，讓我做回那個低調的我，那個只想跟你們分享工作的我，好嗎！」最後嘉琪多謝每一個人嘅關心，佢全部收到，在心中。


(資料圖片)


嘉琪喺fb親自回應。(fb截圖)


嘉琪同阿金之前仲影到好sweet咁行街。(資料圖片)


嘉琪話唔再回應分手嘅事。(資料圖片)

source : https://hk.entertainment.appledaily.com/enews/realtime/article/20180220/57852640
+++++++++++++++++++++++++++++++++++++++++++++++++++++++++++++++++
乜水來