https://video.appledaily.com.hk/mcp/encode/2018/03/31/3580565/20180401_sub319AD_clean_w.mp4


Peter同Nicole早前自發籌備咗一個長途山賽「逆走100」。

復活節長假前嘅星期六、日（3月24、25日），香港舉辦咗第一屆「逆走100」麥理浩徑嘅賽事。好多人都唔知道呢項賽事係由邊個機構舉辦，其實今次比賽係由兩個人嘅一個諗法開始。


二人特別陪同最後一位選手走到終點。

Peter從事設計及製作，而Nicole本身嘅工作就係舉辦跑步及行山比賽，由於兩位都熱愛跑步行山，所以佢哋就諗可唔可以舉辦一個屬於自己嘅山賽，因而造就了第一屆「逆走100」。「逆走100」同毅行者一樣，行嘅都係麥理浩徑，分別係今次由尾行番去頭，由大棠行去北潭涌，所以雖然兩者係同一條賽道，但其實對參加者嚟講可以叫做一條全新嘅賽道，因此成功吸引咗好多熱愛行山嘅人士參加。

由於呢項比賽冇財團支持，完全由兩位熱愛行山人士發起，當中需要嘅心力、時間同人脈非常龐大，好彩Peter同Nicole本身都經常參加山賽，對比賽者嘅需要非常了解，而且因為從心出發想搞屬於自己嘅山賽，所以就算工作量龐大，佢哋依然樂此不疲，而且比賽當日嘅每一項細節，都係經過心思熟慮，由參加者嘅出發點去準備，喺參與呢項比賽嘅過程裏面，你會見到每一位義工同檢查站嘅工作人員都非常積極投入，就好似一個熱愛行山人士舉行嘅party一樣。另外，由於Peter係做設計工作，賽事嘅Banner、送比參賽者嘅T恤、毛巾等，都係由佢精心設計，令人感到煥然一新。

喺物資補給方面，今次比賽雖然係第一屆，食物嘅種類唔係好多，但絕對係非常充裕，令參加嘅跑手無需顧慮冇晒補給，因為Peter同Nicole自己都係山賽常客，知道補給物資喺長途山賽嘅重要性。總括嚟講，喺有限資金嘅情況下，呢個第一屆舉辦嘅賽事，可以講係搞得非常成功，相信好多人都希望呢項比賽可以繼續搞落去，成為一項香港地道嘅傳統賽事。

採訪：Wing@有種運動
攝影：Wing and Asia@有種運動
剪片：Amber@有種運動

source : https://hk.lifestyle.appledaily.com/lifestyle/wellbeing/daily/article/20180401/20348879
+++++++++++++++++++++++++++++++++++++++++++++++++++++++++++++++++
幾好玩咁喎