港元跌到7.85，金管局密密啟動弱方兌換保證，一手接走銀行賣出既港元，一手交返美元畀銀行，自4月開始19度接錢、合共逾700億元。咁，該局接咗港元後啲錢其實去咗邊？

正所謂「出得嚟行預咗要還」，要回答金管局接咗沽盤後啲錢去咗邊，就要先回帶，睇返2008年雷曼風暴後，熱錢不斷由海外湧港情況。
當時金管局喺7.75強方保證價位，接咗銀行沽出既1300億美元（等於過萬億港元）資金，於是該局喺外滙基金戶口內既外幣資產一項，就一路係咁升，會計賬項對稱安排下，外滙基金內負債一項「銀行體系結餘」，亦同步增加。

但呢啲熱錢只係暫時寄居泊住喺香港，唔喺你自己真正私己錢，唔會同你一生一世長相廝守，當佢離開時，外滙基金戶口既外幣資產，同港元結餘呢個負債項目，就會同步還原縮返細嘞。

所以當資金流出時，港滙一直下跌無銀行肯接沽盤，直至觸及7.85弱方保證，銀行敲金管局門要求接貨，該局接下港元沽盤畀返美金銀行，正因為聯滙制度下，港元都要有美金100%橕住（back up），美元物歸原主，相應既港元亦唔再存在，好似消失的子彈冇咗，本港亦開始所謂收水過程。

香港實行聯滙，代表每一蚊新增港元都要美元「背對背」支持，金管局唔同美聯儲有獨立貨幣政策，金融風暴後可自行打大結餘「印錢」，量寬救市，買銀行抵押資產搞活市場。
熱錢流入本地美元兌換成港元，本港貨幣基礎增大，同樣當資金變返美元流走，外滙基金同銀行體系結餘都要縮返轉頭，好均真。







https://hk.finance.appledaily.com/finance/realtime/article/20180523/58224038