HKGalden影視臺
發表文章發起投票
《Star Wars》變成一種「代溝」了嗎?看《韓索羅:星球大戰外傳》有感



「光劍佬教仔」
三年前,《星球大戰:原力覺醒》上映,長期唔夠瞓嘅我專登眠足12個鐘,沐浴更衣入場。戲,就不過不失啦,起碼認得係《星戰》先(面目全非嘅「前傳三部曲」我憎到入骨),印象深嘅反而係入場前一個小片段:有中產老豆拖住兩個小學生年紀嘅寶貝仔捧場,三仔爺着晒黑武tee,一人一把激光劍,興奮莫名,一派「模範fanboy家庭」模樣。當時我忍唔住會心微笑,腦裏面彈出一句VO:「孩子的教育不能等。」朋友之中亦有家教甚嚴嘅「Star Wars Dad」,平日唔畀個女睇電視,但《星戰》一至八集就任睇唔嬲,神心過督促細路練琴。之不過,越係見到「原力家長」悉心教導,我心入面就越忐忑:「《星戰》對千禧後嘅新一代嚟講,仲有吸引力嗎?」

「新一代仲睇唔睇星戰?」
1978年《星球大戰》喺香港上映,當時我仲拍緊拖嘅姨仔貪得意,同姨丈抱住三歲嘅我去睇,點知我喊到收唔到聲要人抱返出嚟……。如果有時光機,我一定返去同佢哋講:「騷擾人睇《Star Wars》好大罪,無謂帶條小朋友入場喇,條友仔第日自己會迷黑武士喇,唔使急住導佢升仙。」

到我真係的起心肝搵戲嚟睇,已經係讀中學嘅事。其時《武士復仇》落畫都六、七年,要睇只能等明珠台翻炒,或者花銀紙租錄影帶。當年之所以虛心考古,係因為作為標準毒L,我發現《星戰》對日本動漫嘅影響幾乎無處不在:高達嘅鐳射劍明顯參考Light Saber、渣古頭部設計亦有白兵影子。正如美術系學生會讀art history,自命認真嘅毒L都總有份自覺,自己追本溯源研究「宅歷史」。

後來出嚟做嘢任職潮流雜誌,「星戰=有型」嘅觀念更加根深蒂固。喺嗰個東瀛街頭時裝主導港人品味嘅美好年代,日本人對星戰嘅狂熱亦連帶感染香港人:但凡street wear牌子搞《星戰》crossover,限量版例必貴上加貴;我甚至一廂情願覺得,當年潮流產物出親「別注黑色版」都升價幾倍,其實亦係受日本人對黑武士嘅迷戀影響。「唔熟《Star Wars》唔算潮人」,對我哋嚟講係common sense。

可惜,呢啲已經係a long time ago, in a galaxy far, far away。

近年經常同年輕人共事,而90後當中我只遇過一個《星戰》fan屎。其餘朋友仔連2000年後嘅嗰幾部都零興趣,更莫講話追返上世紀嘅三部曲。當然,以上只係個人經驗,不能作準。但係票房數字唔會呃人:2017年上映嘅西片當中,《星球大戰:最後的絕地武士》嘅香港票房只能屈居全年第九,而以《蜘蛛俠:強勢回歸》為首嘅幾部超級英雄片就分別佔據第二、三、五,連水準奇低嘅《正義聯盟》都穩佔第七……另外仲有部《盧根》以300萬之差排名第十。

再睇埋上映無耐嘅《韓索羅:星球大戰外傳》,不論美國、香港以至大陸都仆到崩頭,就更加令人擔心。當你見到好多網民甚至影評人都攞《銀河守護隊》作為品評《韓》片嘅標竿(而《銀》片明明係受《星戰》啟發嘅產物),你不得不懷疑the force唔只無awaken,仲可能慢慢熄滅……

「Han Solo?無人識你喎……?」
以戲論戲,其實《韓》片算係近年星戰系列當中最似樣嗰部。睇《星戰》我一定先睇美術同科幻設計,而《韓》視覺上無疑相當漂亮。尤其「劫火車」嗰場,概念新鮮,節奏亦緊張刺激,令人覺得悶咗咁多集終於有新嘢睇吓。再者,今集將「劫案片」(heist film)同「西部片」兩個類型融入《星戰》系列,既有新鮮感,效果亦合理自然,好切合Han Solo亡命之徒嘅設定。整體而言,部戲節奏快、娛樂性高,我喺戲院無一刻睇過錶。以近幾部《星戰》嚟講,唔使睇錶已經相當唔錯。

作為老粉絲,我只有兩點不滿:一,Lando被投閒置散,白白浪費Danny Glover;二,男主角Alden Ehrenreich橫睇掂睇都唔似Solo。自問唔係原著法西斯,Ehrenreich相貌唔似夏里遜福,我完全吞得落,問題係人物性格嘅嘢唔係你話改就改,起碼要合情理。大家認識嘅Solo除咗愛財如命,仲有啲賭仔性格、鍾意膽博膽,而且有時「面精心懵」,骨子裏其實有啲「膠膠哋」,但係Ehrenreich嘅演繹幾乎搣甩晒呢啲特質,感覺上角色心智成熟過舊版好多。問題係呢部明明係前傳嚟,試問一個角色又點可能隨住歲月變膠呢?

但我本人點諗根本一啲都唔重要。最重要嘅係:《韓》片點解吸唔到新觀眾?相對而言,《韓》片作為外傳故事,觀賞門檻比正傳已經低好多──起碼你完全唔使理Skywalker家族一堆親戚關係。個人認為,部戲之所以谷唔起,問題係在於難sell、難做marketing。鄙人讀電影嘅年代上production managment嘅堂,做過荷里活監製嘅鬼佬Lecturer第一件事已經教你:「一部賣座嘅荷里活電影,佢嘅大橋必須一句說話講得完,而且講完你會想睇。」以即將上映兩部戲為例:《侏羅紀世界2:迷失國度》係「恐龍公園走犯」,而《蟻俠2》就係「識變大縮細嘅超人,今集仲多條女幫拖」。但《韓索羅》可以點sell呢?假如觀眾對主角本身唔認識,「韓索羅年輕時候嘅搶劫歷險」好難引起入場意慾。事實上,近幾部《星戰》喺大陸一部仆過一部,已經係嚴重警號:好多新觀眾對成個系列背景根本無認識,亦唔打算花時間去認識。

我當然愛《星戰》。不至於買幾千蚊把激光劍嗰隻愛,但黑武士tee有兩三件,玩具櫃嘅白兵、黑武士figure亦唔只一隻。但愛還愛,我好清楚:鋒利嘅激光劍都有生銹嘅一日。想扭轉敗局,好似《韓》片咁嘅外傳已經係值博率最高嘅賭局。問題係原作舞台好明顯已經同新一代脫軌,迪迪尼係時候痛定思痛,加入新橋、新元素從頭嚟過。

撰文:阿雞
《蘋果動新聞》前創作總監,文化雜食者,high嘢cheap嘢都啱,淨係冇中間。現為網台Booom主持cult片節目《百老匯電椅中心》,並負責附屬FB群組《百老匯電椅中心:放棄治療部》(broadwayelectricchair)

source : https://hk.lifestyle.appledaily.com/lifestyle/culture/daily/article/20180602/20408638
+++++++++++++++++++++++++++++++++++++++++++++++++++++++++++++++++
垃圾片
Good1Bad2
2018/06/02, 12:46:10 下午
本貼文共有 0 個回覆
此貼文已鎖,將不接受回覆
發表文章發起投票