HKGalden影視臺
發表文章發起投票
怪獸家長大戰《侏羅紀世界:迷失國度》


「恐怖過侏羅紀:本地怪獸家長」
世上有乜恐怖得過《侏羅紀公園》嗰啲恐龍?

我會話係棲息港九新界嘅怪獸家長,仲有更瘋癲嘅幼稚園面試官。好多小朋友已經背到「A for Astronaut」,家長依然覺得唔夠照,可見幼稚園入學面試已經深到超現實境界。估唔到電影公司竟然睇中呢種畸形心態,專登為《侏羅紀世界:迷失國度》炮製宣傳片,瞄準怪獸父母同可憐嘅適齡小孩。一系列短片搵嚟英語流利嘅「蝦餃媽」(陳慧琳)主持,教授戲入面啲恐龍嘅英語發音:乜「A for Apatosaurus」(大概係「阿-Pat-都-梳-Rus」)、乜「B for Baryonix」(斷估係「啤-Ri-安-Nix」),仲有長過長頸龍條頸嘅「Tyranosaurus Rex」(太煩,唔拼喇)……。如果我係細路,俾阿媽迫我背呢抽嘢,我估會喊晒口攬實佢對腳:「媽咪,我唔想睇《侏羅紀》呀!」

「原來暴龍好多毛」
背誦,學習必要環節,不過亦係最無癮嘅環節,家長老師實在不應操之過急。可惜香港教育制度最叻就係將學習變得零趣味,令小朋友由細到大討厭讀書。平心而論,《侏》幾條宣傳片不至於一味叫小朋友背生字,都有滲番少少關於恐龍嘅小知識。假如家長真心想引發小朋友嘅好奇心,我建議你講一個大朋友都未必知嘅驚人發現:原來暴龍有羽毛㗎!

可能大家都喺恐龍圖書見過「始祖鳥」呢種有翼、有羽毛、識飛嘅史前生物,不過以下講嘅唔係呢啲小兒科。早喺2014年,美國《國家地理雜誌》一篇文章已經提到,原來幾乎所有恐龍都有羽毛!過去20年,古生物學家已經喺中國發現有羽毛嘅恐龍化石,之不過五種都屬於「速龍」科目,因此學術界尚未大膽定論。直至2014年七月,有科學家喺學術期刊《Science》發表文章,指西伯利亞發現新品種恐龍Kulindadromeus zabaikalicus嘅化石,上面明顯睇到羽毛;由於新發現同「速龍」屬於完全唔同嘅品種,為「所有龍都生毛」嘅論說提供咗有力證據!(詳情可以睇睇《國家地理雜誌》,原文:https://bit.ly/2kSrh8p)

「《侏羅紀》呃你十年八年」
試諗吓:長頸龍、劍龍、三角龍甚至暴龍,統統長有雀仔一樣嘅羽毛……試問有乜比呢項發現更刺激細路仔嘅求知慾?

騎呢嘅係,開拍《侏羅紀》系列嘅Amblin公司早知道呢項發現,只不過無動於衷。早喺三年前《侏羅紀世界》第一集製作期間,唔少古生物學家睇過電影嘅概念插圖已經表示不滿,認為製作人有責任忠於科學,唔應該擅自幫恐龍剃毛。奈何導演Trevorrow嘅回應斬釘截鐵:「《侏》片係科幻電影,唔係紀錄片。」(詳情可以睇睇英國《獨立報》呢篇文章:https://ind.pn/2M7cq6l)

雖則佢有佢道理,但Trevorrow嘅講法無疑兜嘢星咗大師史匹堡一巴。1993年,史匹堡執導第一部《侏羅紀公園》,正因為恐龍造型極貼近其時嘅科學知識,而贏得古生物學家嘅讚賞。事實上,除咗外形嘅考究工夫做得足,片中恐龍嘅特性,包括智慧高、速度極快,亦打破咗以往荷里活錯誤印象。《侏》片影響之深遠,令好幾代中外觀眾包括我,一講起暴龍都覺得係史匹堡嗰條咁嘅樣,之但係古生物學發展一日千里,當日被視為準確嘅描繪,依家睇番已經明顯過時。

「為小朋友默哀」
在商言商,電影公司當然有票房考慮。若然將暴龍、速龍整到雀仔咁樣,觀眾入唔入場真係話唔埋。其實為咗電影嘅娛樂性,史匹堡早喺《侏羅紀公園》第一集已經有幾個「偷雞位」:例如現實中嘅Dilophosaurus並無頭冠,亦唔曉噴毒液;史匹堡之所以畫蛇添足,可能只係唔想觀眾將佢同速龍撈亂。

當然,作為家長嘅你大可以將呢啲juicy冷知識傳授畀小朋友,甚至作定篇英文稿,等佢由「Did you know dinosaurs have feather?」一路背到西伯利亞考古發現,包保啲幼稚園爭住收你寶貝仔女。又當然,如果你真係咁變態,我除咗為你小朋友默哀都唔知講乜好。(一直深信小朋友有無好奇心,都係睇個大人。假如閣下連「恐龍有羽毛」都無興趣,又憑乜迫啲細路背Tyranosaurus?)

撰文:阿雞
《蘋果動新聞》前創作總監,文化雜食者,high嘢cheap嘢都啱,淨係冇中間。現為網台Booom主持cult片節目《百老匯電椅中心》,並負責附屬FB群組《百老匯電椅中心:放棄治療部》(broadwayelectricchair)

source : https://hk.lifestyle.appledaily.com/lifestyle/culture/daily/article/20180609/20415176
+++++++++++++++++++++++++++++++++++++++++++++++++++++++++++++++++
聽聞好過上集
Good0Bad1
2018/06/09, 11:58:49 中午
本貼文共有 0 個回覆
此貼文已鎖,將不接受回覆
發表文章發起投票