港產片《逆流大叔》以職場再作戰為題材，講幾個四、五十歲中坑為保住份工，不惜加入公司嘅龍舟隊日扒夜扒，從體力勞動中重拾打工鬥志。由於故事勵志兼貼地，電影未上映已經引起網民注意。我未有機會觀賞《逆》片，反而率先睇咗中佬天皇湯告魯斯嘅動作新片《職業特工隊：叛逆之謎》。聽聞五張幾嘢嘅靚佬湯為部戲完全唔錫身，拍跳傘唔止自己嚟，仲跳足106個take直至效果滿意為止；加上故事講老湯為咗份工，搵命搏之餘不斷要幫同袍「執屎」，甚至犧牲晒私人生活仲要成日畀高層懷疑、出賣……打咗廿幾年工嘅我不禁主觀投射，覺得部戲其實係拍畀中佬睇嘅職場哀歌。Feel唔到我噏乜？得，下面逐個point拆畀你睇。

1.「盡做，我諗掂佢！」
隨便一個生性中佬，若然喺職場打滾二三十年無被淘汰，起碼應該做到中層管理。咪以為做中層叫上咗岸：當你老又老過人、貴又貴過人，一旦公司有乜頭暈身興，往往先向夾喺中間嘅中佬開刀。好似Ethan Hunt（湯告魯斯）身為特工組織「IMF」嘅小頭目，對job insecurity就似乎亦相當自覺。明知老細expect「高薪＋資歷＝萬能」，Ethan從來唔敢推job。就算上頭晨吉咁早send個訊息過嚟，話：「我哋唔見咗兩粒核彈頭，你可唔可以……」佢眼屎都未抹，只係諗咗兩秒，已經死死地氣撳咗「accept」。因為中佬心底好清楚：將老細煩惱瞬間轉移去自己膊頭，係你仲有糧出嘅唯一理由。作為受薪解決麻煩嘅中坑，無論任何人、問乜嘢，Ethan都只會畀一個標準答案：「我諗掂佢。」即使個難題係核子彈引爆器畀壞人拎咗上直昇機，而佢仲硬膠膠企喺地面。一句「諗掂佢」，意味靚佬湯要騎劫天上面飛緊嘅另一架機，然後唔理三七廿一飛埋去撞散個壞蛋。條命保唔保得住？唔重要，最緊要撞爆條契弟又傷唔到引爆器。當你返工口頭禪係「諗掂佢」，附帶條件已經心照不宣：永遠只有你幫人諗，唔使旨意有人幫你諗。

2.「同事蘇州屎都係你嘅職責！」
到底幾多歲嘅麻甩佬先叫「中佬」？我定義好簡單：一個過咗「可以任性嘅年紀」嘅麻甩佬。喺今集《職》，你明顯見到Ethan凡事瞻前顧後，做每個決定都步步為營。核彈頭畀人搶咗，失手嘅同事又畀槍指住，畀着年輕aggressive上班族，可能一句「nice knowing you」已經轉身追賊，由得同事你死你賤。但良心中佬唔係咁諗嘢。「同事嘅鑊即係我嘅鑊」，雖然救你會累埋自己，但唔救，就對唔住一直以嚟我相信嘅自己。好似Ethan呢啲舊派人最蝕底之處，係心裏面有套唔對人講嘅「code of honor」，亦即係最老土嗰隻——道義。明明上頭信你唔過，派條針同看實你做任務，條靚仔仲要自大任性，掛住爭風頭多過做正經嘢……即使係咁，睇住佢唔識用氧氣樽又懶醒跳落機，搞到喺2萬5000呎高空休克，Ethan粗口都無句，淨係「拿一拿」口面，已經一支箭飆去救人。「道義」唔會寫喺履歷，你有，都無人工加。但佢可能為你賺到同事信任；有朝一日到你落難，有一絲渺茫希望或者有人回贈畀你。

3.「Work life balance？乜嚟架？」
可能我廢啦，打咁多年工從來搵唔到work life balance。假如工作上做過自己稍為滿意嘅project，例必係唔食飯、唔瞓覺、唔陪老婆，身體五勞七傷咁換番嚟。唔係唔信有人可以將工作、生活平衡到剛剛好，但自問以我咁嘅身心構造，呢世人應該做唔到。所以睇見Ethan今集同前妻Julia重逢，真係有啲鼻酸酸：明明郎才女貌天作之合，點知做特工老婆原來隨時畀壞人綁架（第三集劇情），加上老公永遠將保衛地球放喺第一位，結果兩人只好和平分手。直到三集之後大家有緣相見，都只係因為做嘢：為咗對付Ethan，壞蛋專登將核彈set喺佢老婆開嗰間醫療中心。眼見昔日至愛已經搵到新老公，Ethan只係一個眼神、半句對白，一段段多災多難嘅往事喺兩人間不言而喻，下個鏡頭Ethan又已經滾水淥腳去搵炸彈。話我偏見都好，總覺得講得出work life balance嘅自在中佬，九成八其實已經搵夠上岸。

4.「接受公司隨時出賣你！」
「一個特工可以畀國家出賣幾多次？」呢句上頭放喺Ethan身邊條針August Walker嘅對白。如果Ethan Hunt真係職場中佬化身，咁佢用行動畀出嘅答案真係令人心噏：假如着緊份工，基本上你要接受公司可能無限次出賣你。事實上，由第一集、第三集，再到最新呢一集，都係講Ethan無端端成為國家頭號疑犯。能夠咁睇得開，次次自己搵命搏洗脫嫌疑，然後當無事發生返埋位做嘢，除咗因為中佬轉工唔容易（呢個我膠噏嘅），亦因為出糧背後，佢呢隻中佬對工作有一份信念、一份使命感（呢個戲入面有借August把口講嘅）。試問一個人如果唔係揸住比小我更大嘅信念，有乜可能食得落上面講咁多屎？畀人出賣火滾，係因為Ethan服務嘅唔係一個機構，而係一啲佢真心相信、唔能夠動搖嘅價值。講到打工，我信緣份，而緣份係自己修番嚟。如果可以好似Ethan Hunt咁爛做，即使命都短幾年，至少始終會遇到珍惜你嘅好老細，亦即係戲入面嘅Alan Hunley。好老細唔使日日呵錫你，只需要大家心照不宣有個君子協定：「有鑊，互相孭。」所以今集Ethan瀨晒嘢，Alan都詐詐帝帝出手相救。廢人如我平生都遇過唔止一個好老細，各位中佬，共勉啦。

撰文：阿雞《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組《百老匯電椅中心：放棄治療部》（broadwayelectricchair）

source : https://hk.lifestyle.appledaily.com/lifestyle/culture/daily/article/20180728/20462308
+++++++++++++++++++++++++++++++++++++++++++++++++++++++++++++++++
又講得幾好，其實可拍返套電影