推

留名學嘢

係開始今集故仔之前首先同大家講下哈布斯堡西班牙支系個家族史先

當年神聖羅馬帝國皇帝卡爾五世退位 哈布斯堡分家
佢細佬斐迪南一世繼承奧地利公國同神聖羅馬帝國皇帝
佢個仔菲利普二世就得到西班牙王國同佢係全世界既殖民地

卡爾五世

菲利普二世

卡爾五世個女瑪麗亞就嫁左比斐迪南一世個仔馬克西米連二世
然後佢地兩個生左個女叫安娜

安娜就嫁左比佢舅父菲利普二世 生左個仔菲利普三世

菲利普三世

然後菲利普三世又娶左馬克西米連二世個孫女瑪嘉烈 生左一仔一女菲利普四世同瑪麗亞·安娜
瑪麗亞·安娜就嫁左比神聖羅馬帝國皇帝斐迪南三世
佢兩個又生左個女都叫瑪麗亞·安娜又嫁返比佢舅父菲利普四世

菲利普四世

最後佢地兩個就生左西班牙現任國王卡洛斯二世出黎啦

呢個就係哈布斯堡西班牙支系既愛情結晶卡洛斯二世啦
你睇佢青靚白淨仲有佢家族代代近親繁殖從卡爾五世一直遺傳落黎既大下巴
哈布斯堡家族為左確保即使西班牙或奧地利支系絕嗣後仍然可以由哈布斯堡家族繼承而代代近親聯姻
而結果就係卡洛斯二世一出世除左個大到食唔到野講野一舊舊既大下巴之外仲有天生既弱智癲癇長短手腳
卡洛斯二世名為西班牙國王 事實上佢只係裝飾係西班牙王位上面既一舊肉
即使稱佢為裝飾都嫌佢醜
唔緊要 只要有貴族 有議會 有佢啊媽 仲有佢老竇既私生子係到 就算國王係隻豬國家都一樣可以照常運作
國王最主要既功能係咩?係生仔

佢全家摷勻全歐洲幾經辛苦總算搵到條女路易十四既侄女瑪麗·路易絲肯同呢舊肉扑野
不過可惜佢家族基因唔爭氣 卡洛斯二世除左弱智癲癇大下巴長短手腳之外 仲有陽痿
陽痿唔係不舉 不舉啪粒偉哥就搞掂 陽痿係你天生發育缺憾冇賓州
而家法國國王路易十四個侄女嫁左入去之後 卡洛斯二世陽痿件事已經唱通街啦
我老公冇賓州啊!!我襯家冇賓州啊!!!!西班牙國王冇賓州啊!!!!!!!!

就咁歐洲既王室就聚埋一齊啦
作為西班牙既好鄰居我地緊係關心你地既王位繼承問題啦
你ON9呢D係我地哈布斯堡既家事 個王位點傳都傳唔出我地哈布斯堡家族既範圍
話又唔係咁講囉喎 路易十四就攞左哈布斯堡既族譜出黎畫鬼腳啦
拿 我老母係西班牙國王菲利普三世個女 而我又娶左菲利普四世個女 我D仔就死晒啦 咁我個孫安茹公爵腓力有資格繼承西班牙王位啦掛?
神聖羅馬帝國皇帝利奧波德一世就話啦 屌我夠係菲利普三世個女個仔囉 咁我個仔奧地利大公約瑟夫有資格繼承西班牙王位啦掛?
挑你兩個都收皮 巴伐利亞選侯馬克西米連二世·伊萬紐爾就撲出黎話啦
我老婆係利奧波德一世同菲利普四世個女 咁我個仔巴伐利亞公爵約瑟夫·費迪南德有資格繼承西班牙王位啦掛?
挑你個仔有資格既咁我個孫安茹公爵腓力就更有資格啦 因為佢老母就係你個妹啊!!

奧地利大公約瑟夫

安茹公爵腓力

就咁1698年10月11日法國 奧地利 巴伐利亞就簽左第一次分割方案海牙條約
卡洛斯二世死後法國得到那不勒斯 西西里島 托斯卡納
奧地利得到西屬尼德蘭 洛林公國得到米蘭
剩底既西班牙領土就送比巴伐利亞啦
但簽完冇耐巴伐利亞公爵約瑟夫·費迪南德就死撚左喎

好野冇左巴伐利亞同我爭 只要搞掂法國佬卡爾五世時期既哈布斯堡帝國又返返黎啦
就係利奧波德一世係屋企打緊飛機既時候 英國佬已經同法國簽緊第二次分割方案倫敦條約
法國得到整個義大利 其他歸哈布斯堡

當歐洲各國隨意分割西班牙既時候西班牙既貴族就不滿啦
幾時到你地去分裂我地既國家啊!?西班牙各地我地都有投資架嘛!!我唔要我既資產分比兩個王室去管!!
我唔理個王位係波旁定哈布斯堡既 總之要攞就成個西班牙攞去!!
西班牙貴族就攞住兩份方案去圍王位上面個舊肉:波旁定哈布斯堡!?

最後卡洛斯二世簽定遺囑 整個西班牙及其屬國同殖民地由安茹公爵腓力繼承 但佢同佢後人不得兼任法國國王

1700年11月1日卡洛斯二世過身終年38歲

當卡洛斯二世既訃文送到去路易十四手上時法國閎朝廷就淆底啦
真係吞晒...?如果我地真係要晒西班牙既領土我地會唔會惹黎全歐洲既不滿...?不如我地剩係攞一部分啦...
最後結論係 無論我地用第一次分割方案定第二次分割方案奧地利都郁硬我地
係咁...準備戰爭囉

安茹公爵腓力係馬德里加冕為西班牙國王菲利普五世 但事情發展並冇咁順利
要知道當年收復失地戰爭前西班牙眾多王國並冇被消滅 佢地只係將王位合併到西班牙國王之下
佢地仍然保留佢地原有既貴族 法律同自治
菲利普五世登基後承認佢係自己國王既就只有卡斯蒂略王國 納瓦拉王國 巴斯克王國
而加泰隆尼亞王國 阿拉岡王國 華倫西亞王國就宣佈奧地利大公卡爾為自己國王
奧地利以接收遺產出兵西班牙既屬國米蘭公國 而法國亦急不及待出兵垂涎已久既西屬尼德蘭
1701年奧地利 英國 荷蘭再次結成大同盟向法國宣戰

7月奧地利出兵義大利
帶兵既係薩伏伊-卡里尼昂親王弗朗索瓦·歐根 人稱歐根親王

歐根親王(誤)

歐根親王(正)

歐根親王法國貴族蘇瓦松公爵尤金·莫里斯個仔(尤金係法文讀音 歐根係德文讀音)
雖然法國貴族出生但服務於奧地利 曾參加大同盟戰爭同大土耳其戰爭
今次係佢第一次擔正負責全個戰區既指揮官
歐根親王從中立既威尼斯出發一路向西橫掃北義大利既法軍直逼法國邊境

為法國拯救劣勢既係旺多姆公爵路易·約瑟夫·德·波旁
奧軍二萬五人對法軍三萬五人係盧札拉決戰 從日頭打到夜晚
最後奧軍死二千法軍死四千打成平手各自撤退

旺多姆公爵路易·約瑟夫·德·波旁

1702年3月8日英國國王荷蘭聯省執政威廉三世墮馬跌死
係佢死前既1694年佢老婆瑪麗二世已經死左 所以而家英國王位傳入詹士二世最後一個女安妮身上
為支援義大利戰線英荷組織一支五十架戰艦萬四人既聯合艦隊 目標又係當年既加的斯
如果成功佔領加的斯就可以切斷美洲殖民地既收入同孤立法西既大西洋同地中海艦隊
但當英荷艦隊游到去加的斯問題黎啦 點佔領呢?
作為西班牙最主要既港口佢既海防非常堅固 用戰艦轟炸會非常冒險
如果陸軍進攻既支艦隊泊係邊呢?艦隊支唔支援到步兵呢?
結果步兵都係登陸左呢個一街葡萄酒既城市
吸收左當年既教訓佢地冇即場飲酒 而係城都唔攻就一人一箱葡萄酒上返船要求快D返屋企
到而家英荷艦隊似乎又會重蹈三十年戰爭既覆轍
當英荷艦隊返國途中 佢地收到一支線報
一支美洲返黎既西班牙船隊已經停泊係西班牙西北部既維哥灣 或者我地可以去打劫一下

維哥灣係個葫蘆形既港口
西班牙船隊停泊係最深處既港口 出面係個狹窄既出口 再出去就係寬闊既海灣
1702年10月23日聯軍首先比步兵登陸攻佔港口既海岸炮 英荷艦隊就可以進入港口
但因為地形限制戰艦冇辦法擺傳統海戰既縱線陣
英荷艦隊用火船沖入港口一把火燒晒入面既法西艦隊 就好似赤壁一樣
維哥灣海戰既勝利鼓勵葡萄牙參與大同盟加入戰爭


維哥灣海戰

正當利奧波德一世以為多一個朋友多一分勝算既時候 佢收到一份估都估唔到既宣戰書
路易十四以西屬尼德蘭總督既職位誘使同樣自稱有西班牙繼承權既巴伐利亞選侯向神聖羅馬帝國皇帝宣戰
喂!!乜可以咁既咩!?神聖羅馬帝國諸侯向神聖羅馬帝國皇帝宣戰!?西伐里亞和約呢!?
沉默 對於維特爾斯巴哈家族違反國際條約既行為冇一個神聖羅馬帝國諸侯願意出手主持公道
不過係波旁 哈布斯堡同維特爾斯巴哈三個家族之間既私鬥姐 你撻神聖羅馬帝國個朵出黎做咩姐?

知唔知點解春秋同戰國既分界點係三家分晉?
因為當趙魏韓三國可以用政治現實去威逼周室去承認自己既地位既時候
佢就再冇號召力去做天下既共主而淪為眾多諸侯國之一
國際秩序亦從此開始改變 從此奧地利就只係奧地利

又係既 咁唔岩規矩既 今次我幫你
係呢個時候向被全個神聖羅馬帝國冷待既神聖羅馬帝國皇帝伸出援手既係勃蘭登堡選侯普魯士公爵腓特烈三世
普魯士 漢諾威加入大同盟

勃蘭登堡選侯普魯士公爵腓特烈三世

法國聯同巴伐利亞同同為維特爾斯巴哈家族既科隆主教區攻佔士瓦本地區後轉向南方進軍奧地利
帶兵既係維拉爾侯爵和默倫子爵克洛德·路易·赫克托爾·德·維拉爾

維拉爾侯爵和默倫子爵克洛德·路易·赫克托爾·德·維拉爾

屋漏偏逢連夜雨北面被法巴聯軍包圍東面匈牙利又有拉科齊叛亂
利奧波德一世只好急召唯一進展順利係義大利戰線既歐根親王北上迎敵

維拉爾主張瞬速攻入維也納早日解決戰爭
但巴伐利亞選侯馬克西米連二世·伊萬紐爾質疑有冇可能咁順利 主張先擴充巴伐利亞周邊勢力
路易十四為免得失僅餘既盟友而將維拉爾召回

而係萊茵河下游 大同盟既另一支陸軍亦出發救援
當年係光榮革命敵前倒戈而令威廉三世取得王位既約翰·丘吉爾 因為迎立有功而被封為馬爾博羅公爵
1704年佢帶住二萬二人英荷聯軍緊急南下救援亡國邊緣既奧地利
約翰·丘吉爾帶住支軍隊沿萊茵河一直向南但又遲遲唔渡河令法軍不敢鬆懈只好不斷沿河布防
直到約翰·丘吉爾到達萊茵河上游佢既詭計終於揭盅

係萊茵河上游突然出現既 係從義大利戰線北上既歐根親王同佢既軍隊
約翰·丘吉爾利用歐根親王既軍隊軒制法國邊防軍自己左轉入巴伐利亞
正向奧地利進軍既法巴聯軍收到英荷聯軍從後追趕既消息立即掉頭北上沿多瑙河布防
但約翰·丘吉爾無視多瑙河防線繼續向東
全歐洲冇人知佢呢個幾月五百公里行軍既目標係乜 唯一知道既人就係佢自己

馬爾博羅公爵約翰·丘吉爾行軍

目標係舍倫堡
舍倫堡係多瑙河上游北岸一座係三十年戰爭時由古斯塔夫二世·阿道夫興建既堡壘
約翰·丘吉爾目標要係巴伐利亞屋企門口建立據點從而逼使巴伐利亞退出戰爭
如果佢堅持抵抗既亦可以作為大同盟軍既前進基地

因為為求機動性約翰·丘吉爾既軍隊並冇準備大炮
如果長期圍困既就必會遭到法巴聯軍既大規模反撲
但只靠步兵強攻既又必然損失慘重
好彩約翰·丘吉爾亦早有準備 係佢軍中既主要兵種係擲彈兵

7月2日夜晚 岩岩趕到舍倫堡既英荷聯軍未經休整就向舍倫堡北面發動強攻
擲彈兵冒住猛烈既炮火接近舍倫堡向山上既堡壘投擲手榴彈
經過兩輪既進攻舍倫堡既防禦冇絲毫減弱既跡象
但因聯軍集中攻擊堡壘既北翼 守軍亦相應抽調人手加強北翼既防守而令西北出現缺口
約翰·丘吉爾發現缺口立即派人爬過城牆
當守軍發現敵人已經攻入城堡紛紛向南門逃亡
而舍倫堡既南面係多瑙河 河上面得一條爛木橋
萬幾逃兵一湧而上應聲折斷
萬三守兵死五千 三千投降 英軍只死千幾


舍倫堡戰役

舍倫堡戰役後法巴聯軍退出多瑙河退守萊茵河
約翰·丘吉爾會合歐根親王既軍隊合共五萬二人乘勝追擊係布倫亨追上五萬六人既法巴聯軍
兩軍係布倫亨村以西布陣 戰場係一片岩岩收割完既麥田
大同盟軍坐北向南 左翼係約翰·丘吉爾三萬六人既英荷聯軍 右翼係歐根親王萬六人既奧地利軍
法巴聯軍坐南向北背靠多條小溪同一片沼澤 左翼係巴伐利亞軍 右翼係法國軍 其中法軍布置左一小支伏兵係布倫亨村入面
朝早8點戰爭以法巴聯軍既炮擊開幕
歐根親王因為受森林阻擋未能完成佈陣而陷入苦戰
中午英軍左翼向布倫亨村既法軍發動進攻 但遭到法軍既集中炮擊
中路步兵渡河進攻亦被擊退 右翼歐根親王既軍隊亦只能勉強支撐

約翰·丘吉爾同歐根親王既追擊

到下晝 法軍左翼步兵向右移動支援布倫亨村令法巴聯軍中路出現空缺
約翰·丘吉爾見到下令加強對布倫亨村既攻勢 吸引更多既法軍進入布倫亨村
法軍為填補中路既空缺下令騎兵突擊
法軍騎兵雖然無法衝散英軍右翼戰線 但右翼英軍因指揮官戰死而撤退
約翰·丘吉爾見到即刻親身帶住援兵接手右翼既指揮
歐根親王見到法軍左翼步兵同騎兵接連失誤立即下令騎兵進攻
法巴聯軍既戰線從中路開始被撕開
配合歐根親王騎兵攻勢 約翰·丘吉爾下令全軍總攻擊
法巴聯軍右翼既法軍徹底潰散
係佢地逃走既正前方等緊佢地既 又係多瑙河
大同盟軍死四千幾 法巴聯軍死近二萬人萬四人被俘
布倫亨戰役後大同盟軍一舉征服巴伐利亞
家陣巴伐利亞選侯馬克西米連二世·伊萬紐爾可以返西屬尼德蘭乖乖地做佢既西屬尼德蘭總督啦



布倫亨戰役


https://youtube.com/watch?v=BvaVh6WGPE0

兩個丘吉爾

打完多瑙河戰線又返返去義大利
雖然由約翰·丘吉爾同歐根親王坐鎮既多瑙河戰線守得好穩陣
但冇左歐根親王睇場既義大利情勢汲汲可危
如果法軍爬過亞爾卑斯山攻入維也納 戰爭一樣可以結束
而要解救義大利最有效既方法唔係陸軍 係海軍

得到葡萄牙既支援 從水路入侵西班牙既方案又提上台面
英荷今次目標唔係見慣見熟既加的斯 而係法軍係地中海兩個主要軍港西班牙既巴塞隆那同法國既尼斯

但當英荷艦隊去到同為反法勢力既巴塞隆那時竟遭到當地居民反抗
既然冇辦法建立據點咁就只好繼續東行 點知行到半路就遇到法國艦隊
如果係法西勢力範圍內既地中海打輸仗咁就真係死無葬身之地
英荷艦隊只好行返轉頭啦
點知行到半路比佢地見到舊礁石 一舊係伊比利亞半島最南面突出黎既一舊狹長既礁石 一舊名不經傳既礁石
直布羅陀


英國佬行過就心諗 如果比我係到起個海軍碼頭咁我咪可以好輕易封鎖地中海出海口囉
而且呢到地形狹長陸路都易守難攻
8月1日英軍係直布羅陀北面登陸包圍直布羅陀要塞
8月4日直布羅陀要塞投降

布倫亨戰役後約翰·丘吉爾同歐根親王分別返返去各自既主場萊茵河同義大利戰線
係布倫亨同直布羅陀之後形勢明顯倒向大同盟一方
法國係義大利既"忠實"盟友薩伏依公國義大利基因發作 繼大同盟戰爭後又跣多法國佬一鑊
1704年11月8日薩伏依公國又再次加入大同盟

1705年5月5日神聖羅馬帝國皇帝利奧波德一世過身佢個仔奧地利大公約瑟夫繼位為約瑟夫一世

1706年法軍再發動新一輪攻勢
目標係西屬尼德蘭境內萊茵河下游支流摩澤爾河邊小鎮拉米伊
5月23日六萬法軍背靠拉米伊坐西向東展開陣勢 左翼係一片沼澤所以以步兵為主 騎兵集中係右翼既大平原
前面隔住條小溪對面係約翰·丘吉爾六萬二英荷聯軍 約翰·丘吉爾無視地形將騎兵平均分配係兩翼
1點兩軍開始炮擊 約翰·丘吉爾下令右翼步騎前進 回應英軍攻擊法軍集中向英軍右翼進攻
當法軍右翼騎兵前往支援左翼結果令右翼既步兵暴露係一片大平原上面
呢一切都係約翰·丘吉爾既計謀 當法軍右翼減弱後約翰·丘吉爾下令自己右翼既騎兵撤退調去左翼
暴露係大平原上面既法軍右翼步兵突然遭到英軍騎兵既總攻擊 法軍戰線從右到左全線崩潰
英軍死一千法軍死萬三降六千
之後英軍一舉收復整個西屬尼德蘭

左邊綠色係法軍右邊紅色係英荷聯軍

拉米伊戰役

拉米伊戰役後英荷聯軍既追擊同法軍既撤退

1707年5月1日英格蘭蘇格蘭議會通1707年聯合法案
兩個合併成大不列顛聯合王國

係義大利戰線法軍係1706年5月14日開始圍困薩伏依公國首都都靈
到9月7日遭到歐根親王帶兵偷襲得以解圍 大同盟軍順勢收復整個義大利
從此係義大利法軍被孤立於米蘭一帶
1707年無後顧之憂既歐根親王帶領薩伏依反攻法國南部主要軍港土倫
但因亞爾卑斯山阻隔補給困難而失敗

1708年5月旺多姆公爵帶住路易十四個王太孫勃根地公爵路易同八萬五人係西屬尼德蘭再度反攻
勢孤力弱既約翰·丘吉爾極力避免同法軍發生戰鬥
英軍忍讓既結果令法軍奪得位處多條河流交界既交通重鎮根特
7月8日旺多姆公爵離開根特向南移動
約翰·丘吉爾緊隨其後 一路追到去奧德納爾德同歐根親王係漢諾威帶黎既援兵會合 入面包括漢諾威選侯個仔格奧爾格·奧古斯都
7月11日當旺多姆公爵行到去奧德納爾德城外時先發現大同盟既八萬大軍早已係城內集結

1點鐘兩軍惚惚列陣 3點兩軍開始交戰
王太孫勃根地公爵路易眼見大同盟軍仲未組織完成認為係進攻既好時機下令全軍進攻
雖然旺多姆公爵多番警告正因為對方未完成列陣先最危險 但王太孫路易一意孤行旺多姆公爵只好親自指揮右翼發動進攻
本來大同盟軍背向奧德納爾德列陣 但係旺多姆公爵強攻下大同盟軍左翼節節後退
而家變成法軍右翼側面對住奧德納爾德 背後有坐小山
約翰·丘吉爾睇準戰況帶住城內剩餘既騎兵從城西出發兜過法軍背後既小山 然後一沖面下
背後遭突襲旺多姆公爵急忙指揮撤退
大同盟軍死三千 法軍死萬五


奧德納爾德戰役

約翰·丘吉爾表現完一連串歐陸無雙之後法軍已經失去晒進攻既能力
而家佢準備緊一套入侵法國本土進攻巴黎既計畫
歐根親王比左佢一個意見:要打巴黎先攻里爾
里爾-萊茵河左岸一坐由法國名要塞建築師沃邦設計既要塞化都市
8月6日大同盟十萬大軍從布魯塞爾出發 其中三萬五人由歐根親王帶領包圍里爾
剩底既七萬幾人由約翰·丘吉爾帶領防範北面匿係根特入面既旺多姆公爵同南面黎自法國本土既反撲
9月4日大同盟軍開始圍城
旺多姆公爵為斷絕大同盟軍補給 係大同盟軍補給路線多個重鎮同約翰·丘吉爾發生戰鬥
12月9日里爾陷城 旺多姆公爵不得已從西屬尼德蘭僅餘既據點撤退

1709年9月約翰·丘吉爾同歐根親王從里爾出發開始法國本土既攻勢 9月7日八萬六人開始包圍蒙斯
呢鋪路易十四火燒後欄啦 佢手頭上雖然有兩大名將維拉爾同旺多姆公爵
但兩個都係小氣鬼黎一個辣著左巴伐利亞選侯馬克西米連二世·伊萬紐爾 另一個就辣著左自己個王太孫勃根地公爵路易
不過旺多姆公爵岩岩打輸仗 咁今次就用你啦維拉爾

9月8日維拉爾拖住臨時拉夫既七萬五人到達蒙斯南面既小鎮馬爾普拉凱
維拉爾係兩座森林中間展開陣形 將兩翼匿係森林入面 森林前面建立壕溝
9月11日蒙斯既圍城軍趕到 中路同左翼由約翰·丘吉爾指揮 右翼由歐根親王重兵駐守
佢地既戰術係希望可以靠右翼壓倒性既攻擊或左翼薄弱既防禦引走維拉爾中路既部隊從而突破法軍既戰線
朝早9點兩軍開戰 發展完全超乎兩人預期
右翼既歐根親王完全無法取得優勢 而且左翼既部隊幾輪掃射後全面崩潰
約翰·丘吉爾親自指揮本來用黎突破法軍中央防線既預備騎兵將法軍右翼推返入森林
大同盟軍左中兩翼失利後維拉爾親自指揮左翼給予歐根親王最後一擊 但比奧軍既齊射擊中左腳比抬離戰場
約翰·丘吉爾趁法軍失去指揮帶住僅餘三萬騎兵強行突破法軍中央
法軍左翼退出森林救援中央 邊戰邊退

雖然最後10月21日大同盟軍攻陷蒙斯 法軍死萬一 大同盟軍死二萬四
大同盟軍以優勢兵力損失遠超法國 雙方再冇能力發動新既攻勢 戰事陷入停滯


馬爾普拉凱戰役

1709年6月27日波爾塔瓦會戰 英國係北歐既盟友瑞典慘敗於東方某個鄉下小國
1711年英國大選 主戰既執政黨輝格黨落敗 約翰·丘吉爾被召回英國 英法開始秘密和談
1711年4月17日神聖羅馬帝國皇帝約瑟夫一世過身佢細佬奧地利大公卡爾繼位為卡爾六世
而家全歐洲血緣上冇人比菲利普五世更有資格坐西班牙王位

卡爾六世

1712年7月24日維拉爾十萬人係德南戰役戰勝歐根親王十二萬大軍 大同盟軍退出法國

德南戰役

都打到呢種地步啦 仲有咩好講
1713年4月11日雙方簽訂烏得勒支和約
各國承認菲利普五世為西班牙國王 但法國國王同西班牙國王不能由同一人繼承
薩伏依得到西西里同部分米蘭公國
奧地利得到那不勒斯王國 撒丁尼亞 米蘭公國剩餘部分同西屬尼德蘭(從此西屬尼德蘭改口叫奧屬尼德蘭)
英國得到直布羅陀 米諾卡島同美洲既奴隸專營權

1714年9月11日法軍攻陷巴塞隆那征服全部西班牙

1715年9月1日路易十四過身終年78歲
佢比佢所有仔所有孫都要長命 最後繼位既係佢5歲既曾孫路易十五

童年路易十五

1716年菲利普五世頒布新基本法令廢除加泰隆尼亞自治權

三十年戰爭冇左成個神聖羅馬帝國 西班牙王位繼承戰爭冇埋成個西班牙同佢既殖民地
乜撚野哈布斯堡帝國 乜撚野卡爾五世既全盛期
而家奧地利就只係奧地利公國 小小既奧地利公國
不過勃蘭登堡選侯普魯士公爵腓特烈三世 我都多謝你對我既支持
不如咁啦我升你做普魯士王國啦 我可以報答你既係得咁多咋
啊仲有呢個係我岩岩出世既女 佢叫瑪麗亞·特蕾西亞

下集奧地利王位繼承戰爭大北方戰爭

學野

意大利基因

路易十五點解咁嘅樣

歐根親王號

路易十五點解咁嘅樣

點睇都係女黎

終於有文啦

終於有喇

好正！！

一鍵留名

路易十五點解咁嘅樣

點睇都係女黎

個期貴族興男仔著女裝
佢太爺都有玩過

哈布斯堡呢次真係捉蟲

路易十五點解咁嘅樣

點睇都係女黎

個期貴族興男仔著女裝
佢太爺都有玩過

THIS