https://video.appledaily.com.hk/mcp/encode/2018/09/13/3694499/20180914_sub349newnewAD_mp4_clean_w.mp4


Man僧

港版金政基？這是我們說的，筆名Man僧的曾偉文謙虛，連漫畫家也不敢自稱，「至少可以靠畫漫畫搵食先稱得上漫畫家啩？而且漫畫家都要付出好多。」他也有付出，是時間，每日搭車返工放工食飯小休甚至回到工作室和家都在畫，日畫10小時。

金政基是蜚聲國際的韓國藝術家，擅長不起稿就直接畫，甚麼構圖佈局、空間透視，由下第一筆開始就了然於胸，下筆精準、線條流暢、層次感強，甚麼題材都拿揑得到，高過人的巨幅也難不到他，堪稱奇才。金政基這奇才是怎樣煉成？我們不知，但Man僧呢，很大程度上是工多藝熟，用時間練回來的，他一直不求回報畫畫畫，直至女朋友提出把畫作拍片放上網，才有那一點回報──like呀，你給他那隻手指公呀。更多人留意，令更多單位找他合作，如他畫過李小龍，「李小龍會」真的找他合作。也不單單為酬勞，他也和流浪貓義工合作過，畫插畫傳單，「我做唔到義工們救貓咁偉大，但都幫吓手。」

相比like，他更喜歡留言，「有like係開心啲，不過留言仲好，有迴響嘛。」當然不及最實際的支持，他早前出post說：「今日逼車畫畫，落車途中突然有一個少女走埋嚟同我講：『你要加油呀，畫得好好呀。』有人讚當然開心，但之後又諗，我已經大叔年華，仲要受少女打氣鼓勵，感覺有啲奇妙，正常係我向少年人打氣先係嘛。」

日睡四小時　馬榮成鞭策學揸筆定力
犧牲午飯時間畫畫拍片，他稱為「午間小休」或「午間練習」，這種把握時間落力幹下去的熱誠，是我在玩或睡時才有的。「我唔敢話自己畫畫叻，甚至畫畫快都唔敢當，但講到熱誠，喺香港我應該唔會輸畀其他人。」這種熱誠由4歲開始，「記憶中4歲畫第一幅畫，因為姐姐都會畫畫，見到佢成日被人讚，自己唔忿氣就開始畫，其他人成日同我爸爸講：『細路仔箒，大個就冇咁鍾意畫喇。』但我相反，越大越鍾意畫。況且，其實爸爸好喜歡睇我畫畫，就算畫到好夜被家人鬧，佢都會話：『唔緊要啦，由得佢畫埋先瞓。』」所以Man僧自小已經習慣睡很少，求學時期也會畫到凌晨一兩點，之後七點起床，現在每天也只睡約四小時，我聽到都開始覺得眼睏。

「大約2000年，我入天下做初級助理，馬榮成先生當然唔係親授任何技巧，嗰時公司對每個新人要求都好高，你入嚟就當你乜都唔識，由朝早11點返工到夜晚7點幾，全部時間都係練習點控制鋼筆，你要純熟操控到支筆，先諗有冇嘢可以畫。」日日練，青春就是熱血，「嗰陣漫畫界，馬榮成唔只係老闆咁簡單，係偶像級數，所以就算悶都會跟住練。最記得有一次，練到真係有啲攰，我起身伸個懶腰打個喊露，就喺呢一刻馬生咁啱喺房行出嚟見到我，之後就被上司捉我傾偈話：『馬生話你好似有啲懶散喎。』有少少覺得唔抵，於是又再畀心機啲練，而家我搭車等人無論坐或企都揸到支筆咁定，我諗就係當年練番嚟嘅。」

重拾畫畫熱誠　女友支持開埋fb放畫　
做了一年，Man僧轉去溫日良的海洋出版當助理，他說現在聽到《古惑仔》作者牛佬在節目透露，才知道當年肥良好厲害，「原來當年《武神》銷量好勁，銷量周刊第一，難怪當時年尾已經會同我哋講，叫我哋新年留定假，全公司去日本旅行。」不過現實就是數千元薪金實在太少，而且工時太長，最後他選擇離開，自己找了一間出版公司出漫畫，「冇記錯應該叫創意，係出game書嘅，我同朋友一齊搞咗本漫畫《Number 10》，講足球嘅，我記得第一期大約有2,000書，呢一個數字我幾滿意，但對於出開雜誌嘅老闆嚟講太少，要減稿費，於是，就咁完結。」要和漫畫夢說再見，Man僧去了教班畫畫，幾年之後，再轉行設計遊戲角色，再到現在的圖像設計，變成閒時才畫自己喜歡畫的畫。其實這個時候，真正屬於自己的漫畫夢才開始。

「近年有朋友同我講話有個韓國畫家叫金政基好勁，話可以將腦入面嘅嘢『直播』畫出嚟。好過癮喎！同埋我都仲有少少漫畫夢，心諗如果我有呢樣技能，一個人唔需要助手同太多工序都畫到漫畫。」於是又開始練習再練習，重拾當年熱誠，不求回報地畫。「直至我女朋友話，不如你將啲畫放上網，唔好自己狂畫，畫咗又冇人睇到，我話好呀，咁佢就幫我開埋facebook戶口，仲幫我放啲畫上網，慢慢有啲人睇，又再試吓拍埋片，都有啲反應。」這些反應，即是手指公、心心、嬲嬲等表情，還有留言，有like有反應令人畫得更有動力，想繼續看Man僧靚畫，要去按個掣。「希望多啲人睇到，將來會有漫畫放上網連載。」
如果你乘車等車時，看到一個男人不是拿手機而是拿畫筆的，他應該就是Man僧，如果你覺得他的畫夠靚，記得過去給他一個讚，實體的讚。


Man僧已畫了不知多少畫作，從不言倦更樂在其中。


突然爆like之作，《北斗之拳》拳四郎。


米高積遜，如果你都係40代，喜好應該和Man僧很夾。


Man僧也有在木面畫油畫，「我鍾意喺唔同質感嘅表面上面畫畫。」


Man僧說在網上發表過李小龍畫作，所以才有機會和「李小龍會」合作。


韓國藝術家金政基能不起稿直接畫。互聯網


當年Man僧的實體作品《Number 10》。


擺陣拍片，其實只是iPhone加個架，之後用app做縮時，在公司或家都做到。


我以為這張是哥哥的《大熱》造型，原來是《東邪西毒》黃藥師。


食飯畫畫女友也沒埋怨，「佢都係做創作，相處之道就是畫畫。」

facebook：WaiMan Tsang

採訪：陳孝義
攝影：劉永發、伍永健

source : https://hk.lifestyle.appledaily.com/lifestyle/special/daily/article/20180914/20498781
+++++++++++++++++++++++++++++++++++++++++++++++++++++++++++++++++
好努力