HKGalden科技臺
發表文章發起投票
區域鏈之點解科技咁難估



平時記憶不太好,但我清楚記得,第一次聽見Nokia出部新手機,有個可以影相嘅鏡頭,係喺當時任職嘅公司聚餐後離開嘅路上。記得咁清楚,因為我當時好大嘅反應係,儍嘅邊有人會無情白事周圍影相?唔通食飯影碟飯?周街影自己?呢件事,係第一次發現自己,原來錯起上來,可以錯得咁交關。

近年科技界最爭議嘅話題,其中一個肯定係加密幣/區域鏈。我知,兩樣係唔同嘅嘢,不過喺呢篇文嘅討論來講,唔需要分得咁細,所以姑且用「區域鏈」來代表Bitcoin、加密幣等等背後同區域鏈有關嘅東西。

區域鏈係新嘅互聯網?
爭議圍繞幾個角度。第一,應用上技術有幾成熟。呢個主要係時間問題,拉長少少睇嘅話,唔係最核心。第二,有冇人用來呃人。第三,個技術其實能唔能夠創造好大嘅價值。朋友章濤係區域鏈大好友,經常寫文撐區域鏈,基本說法係,有人呃人,唔代表區域鏈唔可以創造巨大價值,政府純粹因為害群之馬而打壓,無異於倒盆水掟埋個B走。

另一位大好友著名投資人Marc Andreessen,成名作係當年創辦Netscape,佢以自己喺internet走紅年代嘅經驗,斷言區域鏈係新嘅互聯網,今日區域鏈嘅情況,同當年互聯網嘅情況,非常相似,所以區域鏈就係下一個互聯網,區域鏈未來,就有如互聯網咁光芒四射。

關於區域鏈會唔會創造巨大價值嘅問題,係三條問題裏面最難答嘅一條。無可否認,到目前為止,仍未清楚發現點樣好勁咁用區域鏈,目前有嘅應用,大圖畫來講仲係好小眾。所以有可能係淡友成日講嘅一類典型科技圈套:搵唔到困難嘅解決方案,a solution without a problem。我同意,一日未開估,一日都唔可以漠視呢個可能。

而家冇 唔代表將來冇
對家好友嘅回應,係而家冇,唔代表將來冇,而家諗唔到,只係想像力不足。呢個係我唔夠膽睇死區域鏈嘅最大原因,因為根據經驗,想像力不足係常態。一開頭講嘅電話鏡頭,已經係明顯例子,如果有人從未來飛返去當年,話畀我聽電話鏡頭將會係必備,而個killer app係Instagram同Snapchat,我會聽唔明,當你係神棍。

同樣,仲記得internet剛普及年代,電郵已經係好似用互聯網咁用得好盡,最多加埋留言板。當年主流意見,係網上購物唔會做得起,事關邊度有人蠢到會將信用卡資料放上網,我唔記得政府有冇好似打壓區域鏈咁拍廣告叫人千祈唔好上網買嘢,有都唔出奇。何況買嘢落街咪得囉,上網又要dial up,又會霸咗條電話線,又要等個modem嗶吓嗶吓拉牛上樹咁先load到網頁,咁煩。

蘋果高層 也曾睇唔起iPhone
就算係早期嘅互聯網先鋒,都預計唔到之後互聯網可以創造出咁多價值。其中一個難關,係睇唔到智能手機嘅出現,而搭上智能手機之後,互聯網嘅價值又再大躍進,Uber、WhatsApp、手機支付有機彈起,連social network都如虎添翼。

講開智能手機,好記得iPhone第一代推出時,剛巧科技名人前蘋果Chief Evangelist Guy Kawasaki訪問香港,有人問佢點睇iPhone,佢話唔太睇好,因為邊有咁多人會畀咁嘅錢買電話,同埋iPhone冇凹凸嘅鍵盤,後生仔會用唔慣。對於將會成為人類歷史上最賺錢嘅產品,呢個以前蘋果高層身份嘅名人,喺公開場合睇淡嘅最大原因,係冇凹凸嘅鍵盤!每次諗到呢度,都會對自己以前恥笑電話鏡頭嘅行為,恥笑少幾分。我對區域鏈暫冇預言,唯一嘅預言係我未來必定會睇錯嘢,而原因仍然會係想像力不足。

撰文︰宋漢生

source : https://hk.lifestyle.appledaily.com/lifestyle/tech/daily/article/20180927/20508626
+++++++++++++++++++++++++++++++++++++++++++++++++++++++++++++++++
佢係咪記錯 Steve Ballmer
https://www.youtube.com/watch?v=eywi0h_Y5_U
Good0Bad0
2018/09/27, 11:59:15 中午
本貼文共有 0 個回覆
此貼文已鎖,將不接受回覆
發表文章發起投票