https://video.appledaily.com.hk/mcp/encode/2018/11/15/3731133/20181114_ccm_06NEWAD_w.mp4



噚日凌晨銅鑼灣富豪酒店外面，有一位大隻男懷疑喺飲宴飲醉酒，情緒激動大鬧街頭，同行女伴一直出手勸阻，不過身形、體力懸殊，慘被大隻男推跌兩次擦損膝頭，最終仲驚動警察到場。

女伴相勸遭推跌

住喺富豪酒店附近嘅讀者吳先生表示，噚日凌晨12點半左右，街上突然傳來一陣男女爭執聲，大聲到50米外都聽到。吳先生望到一個着白色恤衫嘅男人，醉醺醺咁喺街上大吵大鬧，而同行打扮斯文嘅女伴一開始拉住男人嘅衣領，希望安撫佢情緒，不過似乎無乜效果，男方仲出手推開女伴，場面相當緊張。

兩人越講越激動，男方轉身走人，女伴睇見咁情況馬上跟隨佢後面，伸手拉住男方，仲扯爛男方嘅恤衫，點知身形健碩嘅大隻男突然用右手推女伴膊頭，搞到弱質纖纖嘅女伴立即失平衡跌倒坐喺地上，大隻男掉頭就行開去。至於女伴唞一唞即刻起返身，仲追上去搵大隻男，一名外籍男士睇唔過眼出言勸止，但都未能平復大隻男情緒。

後來男女雙方爭拗到附近天橋，大隻男仲打大赤膊，只見大隻男依然手舞足蹈，一個轉身又再推跌女伴，搞到膝頭流血，但佢馬上起身，始終冇放棄大隻男，再次追上去搵大隻男極力好言相勸。最終大約6個警察到場，向酒店職員同大隻男了解事情，而一輪問話後，大隻男終於冷靜落嚟，女伴亦陪伴在旁，扶住披上西裝褸嘅大隻男，慢慢步行離開，認真唔話得。

source : https://hk.news.appledaily.com/local/daily/article/20181115/20546504
+++++++++++++++++++++++++++++++++++++++++++++++++++++++++++++++++
勁