乘搭地鐵經歷既每一個站都係一種試煉。一般既細路，呀叔，年輕人，係搭地鐵既時候通常都係低頭玩手機，見到佢地甘於墜落，真係笑而不語。真正既男人係搭地鐵既時候應該站於兩邊車廂既中間，左右腳分別踏住左右兩邊車廂，咁樣係一種自我既挑戰，係挑戰緊自己既膽量同力量。
首先，兩邊車廂中間既地板不停咁左右搖擺，你能夠依靠既車身其實亦不停移動，兩邊移動既力量同速度係因應彎位既角度同車速而各有不同，時快時慢，你夠唔夠膽企係中間，背部同下身分別接受力量完全唔同既搖動，只要稍有偏差，身體就會搖擺不定，更有可能會仆街，成為眾矢之的，此其一。

其二，地鐵每次開動同剎車既時候，車廂上面既乘客都會承受非一般既力量，係兩個車廂之間，承受既力自然會係一般人既兩倍，冇番咁上下既功力根本冇可能承受到，最終只會淪為「仆街仔」，係呢個時間應該腰馬合一，將大部份既重心都分別集中於雙腳，利用自身既重量同埋腰力穩穩咁抓住地下，不時仲要借靠身體承受既力量轉化為自己既力量，令自己更有力咁抓住，能夠做到以上幾點，弱者，則可以勉強順利完成呢個歷練，強者，則可以成為一道無堅不摧既巨壁，令人驚歎不已。