熱爆全球的短片網站YouTube公佈本年度香港華語MV十大，其中華納歌手佔4首，現年25歲的連詩雅（Shiga）竟撼低陳奕迅（Eason）高踞第1位，甚至Dear Jane及周柏豪的排名都贏過Eason！不過，有傳網上可以用錢買點擊率，記者發現淘寶及外國網站有聲稱可買點擊率的網頁，令排行榜的公認性受質疑，但Shiga力撐公司沒有篤數。



大前日YouTube公佈「香港2013年度YouTube華語歌曲影片排行榜」，十大位置華納歌手霸佔4首，連詩雅《說一句》MV以逾250萬點擊率排第1，樂隊Dear Jane更有兩首歌上榜，分佔第3及第5位，柏豪就排第4，至於陳奕迅的《任我行》則只排第6位，外界對此議論紛紛，有傳網上可以用錢買點擊率，據知淘寶網可以1元人民幣（約1.3港元）買800個點擊率，至於外國網站1美金（約7.8港元）則可買到1,515點擊率。



24味成員：實會有
24味成員Kevin於社交網上載淘寶買點擊的網頁，留言嘲諷：「Band仔們唔怕俾人踢爆咁肉酸的話，不妨考慮吓喇，真係有人咁做㗎。」但Kevin昨接受電話訪問時否認暗寸Dear Jane：「梗唔係話佢，friend嚟㗎！」信不信有唱片公司買點擊率？他起初似怕得罪人答：「應該唔會嘅。」再追問才不禁說：「實會有啦！」而DJ Donald就謂不知可買點擊率：「Hit rate唔影響我睇乜MV，我喺十大MV最愛Eason首《任我行》，簡單隨便拍英國街頭就係任我行精神，連詩雅《說一句》MV都好睇，但得大頭。」


Shiga繼串錯英文「rest in piece」被網民取笑後，現撼低Eason攞第1又遭質疑，她昨接受電話訪問時說：「多謝網友支持我嘅歌，可能鍾意聽我嘅歌啲人，鍾意上網聽歌。我好鍾意Eason，佢係香港歌神，賣碟有一定銷量，觀眾可能鍾意唔同渠道聽歌。」對於被質疑買點擊率篤數，她說：「我係華納歌手，知道國際公司有核數師，相信公司絕對唔會攞錢做呢啲事。本身好滿意《說一句》成績，第一次攞到三台冠軍歌，呢首係《到此為止》第三部曲，被人質疑唔會太介懷，真心覺得觀眾喺網上自由選擇睇MV。」



Dear Jane佔兩首歌
至於排第4位的大文豪周柏豪則說：「今日你講先知有買點擊，公司唔會做呢啲，只會用最實際方法做好音樂，華納係最早拓展網上平台，早咗霸地盤，所以點擊有成績。我唔信有人買點擊，根本買嚟冇實際用途，只係一個數字，唔係買咗等於成功。」對於撼贏Eason，他說：「可能我嘅歌迷年齡層係上網，我仲要努力向Eason學習。」而Dear Jane於十大連佔兩首MV勁過Eason，成員Tim說：「唔怕俾人質疑，我哋兩首歌喺KK Box成績都好好，啲人真係堅鍾意。」


華納助理總經理Carmen回應：「多謝網友支持華納嘅歌，Shiga喺兩年前轉型數碼媒體歌手，我哋都有聽過呢個傳聞，一笑置之。華納係國際公司有核數師，唔會搵打手做呢啲交易買賣，絕對冇呢啲事。」

http://hk.apple.nextmedia.com/entertainment/art/20131213/18548831