陸上無敵我諗到俄羅斯帝國同奧匈帝國

lm

btw有咩書局多歷史書買 中文洋文皆可

1493年3月15日星期五中午 一架帆船出現係西班牙西岸既帕洛斯港
十七集之前既事終於有結果
當年個隻乞衣基斯杜化·哥倫布幸不辱命終於帶住副伊莎貝拉既私己返黎
隨行既仲多左幾個衣衫襤褸既"印度人"

斐迪南同伊莎貝拉接見哥倫布

呢個只係小小既開始
對於大西洋兩邊既人黎講都係

係十四,五世紀蒙古帝國冧檔鄂圖曼入侵令陸上絲綢之路完全中斷
歐洲只可以經義大利商人從鄂圖曼人手上買到少之有少既東方商品
為擺脫壟斷 係歐洲盡頭既兩個國家行上左佢地前往亞洲既探索之路

最先葡萄牙嘗試兜過非洲前往印度 終係由1498年瓦斯科·達伽馬到達印度
不過要兜過成個非洲先去到印度 運輸成本略嫌太高
西班牙人就醒得多啦
你睇下我個哥倫布兜地球一圈就去到印度啦!!我而家只要搵到印度係邊就得啦

1504年義大利航海家亞美利哥·韋斯普奇到達南美洲最南既巴塔哥尼亞証實美洲係個新大陸
而家兩邊都冇優勢啦

十六世紀既世界地圖

係非洲 印度洋 南太平洋葡萄牙人績極發展佢地既香料貿易
都叫賺到少少錢
係美洲西班牙人發現個到D山番唔知點解有好多黃金
唔理三七廿一殺晒佢地抬晒D金返屋企先
西班牙人都賺到少少錢

之不過佢地兩國既殖民地事業好快就遇上阻滯
葡萄牙本身係歐洲小國仲要有個唯一競爭對手兼強鄰西班牙
佢係世界各地既殖民地都遇上人手不足加西班牙包圍
而西班牙殺晒美洲山番之後面對大片冇人冇物既爛地
旁大既殖民地反而成為國家既負累
係美洲既西班牙人只好日撚日對撚住呢幅爛地發牛豆
有日突然佢地靈光一閃
其實我地可以係到種返D野

歐洲之所以對東方商品需求咁大係因為我地歐洲生產唔到
點解生產唔到啊?因為氣候唔同
既然難得我地黎到個同歐洲氣候唔同既地方不如我地試下種D歐洲種唔到既野啊
就係咁西班牙係美洲既殖民地就開始種甘蔗 煙草 咖啡 棉花
好快佢地又遇到另一個問題

唔夠人

死剩個班印第安人本身就體弱多病再加埋係歐洲過黎既西班牙人都唔足以耕到幅賺到錢既田
呢個時候 係西班牙本土既西班牙人又諗到另一招

非洲咩都冇有既剩係人
美洲咩都冇有既剩係地
歐洲咩都冇有既剩係野心
結果顯而易見

首先係佢地係歐洲徵召軍隊上船去非洲
軍隊去到非洲捉奴隸上船再運去美洲
奴隸係美洲耕田將原產品運返歐洲
然後再將原產品係歐洲銷售賺到既錢黎請軍隊去非洲
完美既自給自足經濟!!
呢招就叫三角貿易啦!!

三角貿易

從此呢一門唔再係小生意
西葡兩國既殖民地利益吸引全歐洲走上海洋之路
首先1606年4月10日英國商人約翰·史密斯得到王家特許狀成立維珍尼亞公司 授予從東岸到西岸全個北美洲既發展權
佢地第一批108個殖民者係第二年1607年5月出發前往北美洲建立英國係北美既第一個殖民地詹士敦
慢慢維珍尼亞公司發展成遍佈東岸既北美十三殖民地
而英國另一批探險家就沿巴芬灣尋找前往亞洲既北方水道
與此同時法國既探險家同殖民者從聖勞倫斯河登陸經大湖區沿密西西比河到達加勒比海
截斷英國北美殖民地西進道路 壟斷當地既皮毛貿易

法國北美殖民地 東面除西班牙既佛羅里達外係英國北美殖民地

歐洲人係全世界不斷探索尋找新既人口 新既土地 新既資源 新既殖民地
直至到十八世紀 歐洲人終於行世界既盡頭
佢地既經濟亦都行到盡頭啦

歐洲人開始認識到一套理論
市場規模=貨幣(黃金)流通量
一個國家擁有愈多黃金佢可以買既野就愈多
而佢擁有既商品種類愈多佢就可以係愈多既國家身上賺取更多既黃金
當然最理想既緊係自己可以生產一切商品成為國際間唯一既出口商
不過呢種目標代表你要搶盡世上每一吋殖民地
係你達到呢個目標之前你總有必須入口既商品
咁又返返去原點 當你入口商品就代表你黃金既流出
黃金既流出就代表市場既委縮
要唔影響自己市場規模既條件下維持自己既國際貿易順差 方法只得一種
短期既 增加關稅
長期既 搶奪競爭對手既殖民地
結果歐洲同佢地係全世界既殖民地都變成一座座既大軍營
而係佢地既邊境 稅吏比軍隊仲要多
呢D就係重商主義
呢個就係今集故事既背景

返到奧地利王位繼承戰爭未期既1747年大西洋對岸法國北美殖民地
當地既法軍組織左支部隊入侵俄亥俄河谷希望驅逐英國毛皮商人拉攏印第安人從而壟斷毛皮貿易
英國商人見到大軍當然落荒而逃 但進駐俄亥俄河谷後既法國佬驚異當地既印第安人早就英國化左
佢地每個都講流利英文 普遍都唔願意加入法國 最重要既原因係英國願出更高價同佢地做生意
到1748年10月18日簽署第二亞琛和約奧地利王位繼承戰爭結束
英法間關於北美殖民地條款只限於英國歸還係奧地利王位繼承戰爭中佔領既路易斯堡同新斯科舍
俄亥俄河谷問題懸而未決 英法雙方都宣稱自己擁有俄亥俄河谷

起先1749年英國維珍尼亞俄亥俄公司帶100戶人進入俄亥俄河谷定居同修建堡壘
回應維珍尼亞公司既行動1752年法軍開始襲擊英國既貿易營地同親英既印第安人
然後從大湖區沿俄亥俄河修建一連串既堡壘壓止英國既擴張
1754年維珍尼亞公司下令一個廿一歲既民兵中校出兵突破法軍防線
佢個名叫佐治·華盛頓

青年華盛頓

係北英殖民地之間既武裝衝突早就係日常茶飯
雖然佢地遠係歐洲既宗主國唔會因為咁而爆發全面戰爭 但無疑已經挑動左佢地既神經

自三十年戰爭結束以黎英國一直奉行權力均衡既外交政策 防止任何國家坐大至足以威脅英國既利益
係奧地利王位繼承戰爭英國利用漢諾威選侯既身份試圖減弱奧地利係德意志地區既影響力
選舉既結果就係引黎全歐洲對奧地利既圍攻 呢個時候英國先驚醒自己玩大左急急加入奧地利陣營
英軍係西線獨力支撐法國西班牙圍攻 但背後傳黎既係奧地利被普魯士節節敗退既消息
係佢地英國老家既民意亦對呢場戰爭愈黎愈反感

呢場不過係佐治二世要保住佢個漢諾威領地既戰爭姐!!
為首既係同首相亨利·佩勒姆同樣係輝格黨既騎兵軍官下議院議員威廉·皮特 一個印度鑽石商人既仔
因為威廉·皮特對內閣既嚴厲批評惹黎佐治二世反感令佢係政壇上一直不得志
即使輝格黨長期執政佢都只可以成為執政黨內既反對黨亦因為咁而令佢係議會外贏得民意
不過係歐陸東線戰場普魯士兩次擊敗奧地利 加上首相亨利·佩勒姆既內閣總辭
最後佐治二世亦不得不面對現實退出戰爭

威廉·皮特

1754年3月6日亨利·佩勒姆過身在野既托利黨密謀反撲
托利黨因有支持詹士黨既傾向而一向不得王室喜愛 但為應對托利黨既挑戰輝格黨屬意受民眾歡迎既威廉·皮特出任首相
但又到佐治二世唔老黎囉喎 最後佐治二世交出一個折衷既方案
OK亨利·佩勒姆既啊哥第一代紐卡素公爵湯馬斯·佩勒姆-霍利斯做首相 佢個內閣點組我由你

就咁威廉·皮特進入內閣成為下議院領袖 成為首相紐卡素公爵湯馬斯·佩勒姆-霍利斯背後既實權者
佢上任後既首要工作就係重整外交政策
雖然自大同盟戰爭以黎奧地利一直係英國長期既盟友用黎軒制法國既威脅
但係奧地利王位繼承戰爭中奧地利已經証明左佢地既軍力再唔足以保護英國係歐陸既利益
特別係新入主英國王室既漢諾威選侯佢既土地正正夾係法國普魯士中間
佢地絕對唔會希望普魯士成為自己既敵人
而且威廉·皮特正謀求一個擁有更可靠陸軍既國家去做佢地既後盾
普魯士之外不作他選

對普魯士而言
係奧地利手上搶走富裕既西里西亞既仇恨加上同樣新興既俄羅斯西進既壓迫
呢個新興既國家都急需可靠既盟友應付隨時降臨既戰爭
對於盟友既渴求 佢已經饑不擇食
當英國大使搵到上門兩國一拍即合1756年1月16日英普簽訂白廳條約 兩國承諾確保對方領土完整

威廉·皮特既外交革命

英國佬你冇可能食兩家茶禮既 既然你歸左邊我都會表態
對奧地利而言
奧地利王位繼承戰爭後 係隔離街法國既威脅已經比唔上門口既普魯士
白廳條約簽訂後奧地利都急需成立自己既陣營對抗英普既威脅
奧地利第一個搵到既係有普魯士呢個共同敵人既俄羅斯
第二個雖然同哈布斯堡長期敵對但而家係同英國係殖民地上唯一既競爭對手法國
跟手仲有因為唔夠俄國佬打但至少希望可以係普魯士手上搶返瑞屬波美拉尼亞既瑞典
再加埋後面個班自動歸邊既西班牙 薩伏伊 巴伐利亞 薩克森 那不勒斯
1756年5月1日簽訂凡爾賽條約締結攻守同盟
奧地利團結全個歐洲將普魯士重重包圍

知驚既就交返西里西亞出黎啦 死基佬

藍色英普聯盟 綠色法奧俄聯盟

5月18日法國海軍突襲英國梅諾卡島 法奧同盟對英普同盟正式宣戰
鎮守梅諾卡島既海軍上將約翰·拜恩不敵逃回直布羅陀被處決

哇哇哇出事啦開拖啦 連地中海既春袋梅諾卡島都失守啦 威廉·皮特我地快D徵召陸軍掟去歐洲打獲法國佬唔係就扑街啦
ON9冷靜D湯馬斯 冇左地中海既春袋梅諾卡島姐 地中海既屎眼直布羅陀仲係我地手
只要我地仲守得住直布羅陀法國既地中海艦隊同大西洋艦隊都冇辦法會合 相反我地一支大西洋艦隊就打晒全世界
仲有我地珍貴既英國同胞點可以送入歐洲大陸呢部碎肉機到呢 送死既工作就交比普魯士啦唔係我地同佢結盟做咩
海軍!!北美洲係我地大不列顛未來最大利益 我地只需要海軍就夠
但係冇陸軍 歐陸戰場輸晒 得堆木板浮係大西洋中心冇意義個喎?
你唔明既睇我表演啦

梅諾卡戰役後既漫畫 法國公雞咬住英國海軍旗 英國獅子比人斬左隻手(梅諾卡)

8月29日腓特烈二世亦帶住佢既軍隊離開普魯士
佢既戰略係係奧法攻入西里西亞前攻佔門口既薩克森 然後再帶住薩克森既降兵佔領波希米亞
係波希米亞過冬之後再從摩拉維亞進入奧地利結束戰爭

最初進展順利普軍用一個月就佔領左薩克森
但10月1日係羅布西茨遭到三萬五奧軍反撲
由於普軍大部分係到包圍薩克森最後據點皮爾納
腓特烈二世只係勉強湊夠三萬人去迎戰

三萬五奧地利軍坐落羅布西茨村西面 北面係易北河 從北向南面向西面展開戰線 大炮同騎兵放係左翼
普魯士軍地形差得多 佢地被夾係兩坐山中間只能勉強展開一條好短既戰線
因為戰場比大霧濃罩 腓特烈二世冇辦法確認山口外奧地利軍既布置
但奧地利軍大炮不斷向山口方向掃射重挫普魯士軍

朝早5點奧地利軍兩翼步兵開始前進 從普魯士軍左右兩坐大山上包圍普魯士軍
兩軍係兩坐高地上展開攻防不分高下
到11點腓特烈二世決定沽諸一擲下令右翼既胸甲騎兵穿過奧軍戰線摧毀奧軍炮兵陣地

普軍既胸甲騎兵穿過一層層既奧軍戰列終於衝到奧軍大炮面前 勝利在望
但係個到等緊佢地既係奧軍騎兵主力

普軍騎兵雖被奧軍騎兵擊退但又無法穿過奧軍步兵返回普軍陣地
結果戰場南方演變成普軍步兵 奧軍步兵 普軍騎兵 奧軍騎兵四層大混戰
對住呢一塌既糊塗腓特烈二世都有D心灰意冷準備下令撤退

今次既奧地利人有D唔同...

不過佢姐夫布倫瑞克-沃爾芬比特公爵斐迪南即刻出黎阻止佢
如果你呢到撤退左奧法俄就會打到去你門口 你呢世都只可以匿係屋企入面 到時你想打都冇得打
呢場仗你唔識打既我打比你睇!!

布倫瑞克-沃爾芬比特公爵斐迪南

晏晝11點大霧散去布倫瑞克-沃爾芬比特公爵斐迪南親自帶領左翼普軍反攻
咪撚再射啦全部同我上刺刀!!衝啊!!
戰列兵既掃射變成白刃戰 普軍步兵化作後面炮兵既肉盾 掩護大炮前進
直至炮兵前進到羅布西茨村進入佢地射程範圍 普軍炮兵用榴彈將羅布西茨村炸成一片火海
駐紮係羅布西茨村入面既奧地利軍紛紛逃出
係村口既普魯士軍再次發揮斯巴達精神以一當百
兩軍各死三千 普軍險勝
10月16日皮爾納投降

羅布西茨戰役

得到薩克森既財富 軍隊 仲有英國每年67萬磅既援助普魯士已再無後顧之憂
1756年冬天過後普魯士出兵波希米亞1757年5月6日到達布拉格城外
守城既係大家好耐冇見既老朋友卡爾·亞歷山大
出現了...出現了...腓特烈又出現了...

雖然絕望但場仗硬住頭皮都要打
卡爾·亞歷山大將佢個六萬三人駐紮係城東既高原上面希望可以靠地形離補指揮上既不足
山下既普魯士軍開始發動進攻 但係普軍左翼既前進路線上竟然踩上左片沼澤到
普軍左翼陷於苦戰 就連當年莫爾維茨會戰中既老將施維林亦當場戰死
好彩錯有錯著奧地利右翼因追擊普軍潰散既左翼令奧軍戰線出現缺口
腓特烈二世帶中路插入兩軍中間截斷佢地既支援再派隊驃騎兵兜到奧軍後方
到呢個形勢奧軍亦不得不退入布拉格城中
雖然戰術上普軍係贏左 但奧軍以八千死亡換黎普軍萬五損失
卡爾·亞歷山大總算為奧軍爭取左個有利既守城條件

布拉格戰役

係當年奧地利王位繼承戰爭中卡爾·亞歷山大連場敗仗無論係查圖西茨 霍亨腓特堡定索爾
係卡爾·亞歷山大庸碌既背後都有對眼目睹呢一切
佢叫利奧波德·約瑟夫·馮·道恩人稱道恩元帥 軍人世家出身 金羊毛騎士團成員
親歷奧地利王位繼承戰爭深知腓特烈二世戰爭風格同奧地利既軍事缺陷
戰後成立軍事學院改組奧地利軍隊
當卡爾·亞歷山大被普魯士軍圍困於布拉格城中道恩受命帶兵北上解圍

利奧波德·約瑟夫·馮·道恩

6月18日係布拉格城外既腓特烈二世得知奧地利趕到就留底二萬人繼續圍城自己就拖三萬人出去迎戰
哼 瑪麗亞·特蕾西亞我就知道你冇咁好死比布拉格落我手既
不過你咁珍惜布拉格既只要比我贏埋呢場仗你就自然乖乖地向我投降 就好似當年查圖西茨會戰咁

腓特烈二世既三萬普軍經一條東西向既大馬路去到布拉格以東既科林村外
普軍沿住呢條大馬路向南布陣 南面係一坐東西向既小山 奧軍係上面布陣
腓特烈二世心知奧軍匿係山上面布陣係想靠地形爭取優勢 佢地係唔敢落黎同自己決戰既
普軍就沿住條大馬路大搖大擺既向東前進 直到隊頭超越奧軍既右翼 普軍向南轉對山上既奧軍發動攻擊
普軍用佢既隊尾姐係而家既右翼拖住奧軍既左翼同中路 而隊頭姐係而家既中路同左翼就包圍奧軍既右翼
又一場腓特烈二世既拿好戲側翼包圍
但神奇既係一般側翼被擊退後成條戰線都會崩潰 但今次奧軍無論被擊退幾多次都不斷有預備隊出黎重建防線
係山下既腓特烈二世不斷將更多既預備隊推上山頭 然後係山腳留低更多普軍既屍體
無可能架!!打極都有既!?山上面究竟有幾多人!?
等我話你知啦...係五萬人啊!!
到夜晚8點腓特烈二世終於帶佢死剩既萬幾人撤出戰場連埋布拉格城外既圍城軍退返普魯士
科林戰役 普軍死萬四 奧軍死九千
面對自己兩倍有多既敵人 普魯士不敗傳說終於破滅 腓特烈二世人生第一場敗仗
而且係最致命既


科林戰役

腓特烈二世返都未返到普魯士 東面俄羅斯七萬五大軍壓境東普魯士 西面六萬法軍踩平漢諾威
全歐洲既軍隊從四方八面直逼柏林

等腓特烈二世返到普魯士 佢開始度橋解救佢既王國啦
東線好彩俄軍打完大獵村戰役之後就停左落黎 南線道恩仲有排未殺到上黎可以等下
問題係西線既法軍
西北腓特烈二世派佢手下第一猛將布倫瑞克-沃爾芬比特公爵斐迪南去收復漢諾威
西南有五萬法軍同親哈布斯堡神聖羅馬帝國諸侯向薩克森進逼 呢線由腓特烈二世親自對付

11月5日兩軍到達羅斯巴赫沿薩爾河北岸對峙 五萬法軍係西 二萬二普軍係東
普軍以北有坐小山 普軍左翼同薩爾河中間有片大平原
朝早11點法軍留底左翼係原地準備包抄普軍 而剩底大部分轉身打橫形勢準備直插普軍南方既平原
法軍目標係搶佔普軍南方既平原 利用開揚既空間發揮法軍人數既優勢
先用騎兵行頭纏住普軍既左翼 等步兵到達後普軍就只有撤退一途

係北方小山上觀察緊戰場既腓特烈二世 睇見法軍既行動心中暗喜
今次我終於可以試下斜線戰術啦

腓特烈二世下令將大炮布置山頂 右翼匿係山後 然後係大炮既掩護下普軍騎兵突襲法軍先頭騎兵
唔洗消滅佢地 為我爭取時間就得啦
爭取時間?做咩?

下晝3點法軍先頭騎兵進入平原 接照計畫預定普軍炮兵開始射擊騎兵緊隨突襲
一輪短暫撕殺後普軍騎兵接照計畫預定撤退
唔只騎兵 一如法軍既預計普軍左翼既步兵都開始撤退啦
睇下!!都話左佢地唔敢打架啦!!兄弟們追啊!!
法軍見獵心喜不顧隊形全軍向北衝鋒
但法軍都仲未衝出片大平原 係佢地北而個坐小山突然響起普軍軍樂 原原整整二萬二人一字排開出現係山上
點會咁架!!唔係走左啦咩!?

原來普軍左翼佯裝撤退實際係同山後既右翼會合重組陣形
先用弱既一翼吸引敵人進攻 敵人進攻後用弱既一翼誘敵深入 然後用強既一翼粉碎敵人既側翼
呢D就係斜線戰術!!我終於試到啦!!

而家重新出現係山上既普軍打靶一樣掃射係山下零零碎碎散佈係平原上冇遮冇掩既法軍
到4點片平原上只剩底三千死屍五千降兵 普軍只死五百人其中大部分係騎兵
面對兩倍既敵人打出廿倍既戰果
無論係腓特烈二世一生定當代戰場 即使係人類史上都係最偉大既勝利

羅斯巴赫會戰

羅斯巴赫會戰後腓特烈二世凱旋返到老家柏林
但迎接佢既唔係歡樂既子民或熟悉既親人
而係眼前既一片廢墟
我打勝仗返黎點會咁架...
原來係11月22日道恩攻佔西里西亞首都布雷斯勞 其後派五千騎兵奔襲柏林洗劫一日一夜後揚長而去
仆街道恩...條數我實同你計...唔係!!我而家就同你計!!

12月5日寒冬正隆西里西亞邊境既洛伊滕
比道恩係布拉格解救出黎既卡爾·亞歷山大靠家族關係壓過道恩再次成為戰場既最高指揮
卷縮係火爐旁既卡爾·亞歷山大口中念念有詞不斷安慰自己
冇事既...冇事既...腓特烈都要過冬既...冇咁快打黎既...
報!!普魯士軍係西北面出現!!
出現了!!又出現了!!大嫂我唔想打啦!!

由卡爾·亞歷山大同道恩帶領駐紮係洛伊滕村既六萬奧軍以洛伊滕村為中心面向西面從南至北展開戰線
奧軍右翼前方有坐小山 背脊有條河流 普軍從奧軍西北面而黎
卡爾·亞歷山大首先派左隊騎兵去試探下普軍實力
一輪戰鬥後奧軍騎兵退回陣地 普軍則佔領山頭
放心啦將軍 普魯士好少人咋 我估得萬零人 將軍你再廢都唔會輸既
嗯聽你咁講我就放心啦 而家普軍係我地右前方加強右翼人數左翼前進全軍轉向普魯士所在山頭!!

睇左咁耐見過咁多坐山相信大家都好清楚山係點用
係普軍駐紮既山頭後方有另一隊人默默前進緊 佢地係腓特烈二世帶領二萬幾人既本隊
當奧地利軍轉向完成面向山上既普魯士軍時 腓特烈二世既本隊都到左奧軍最薄弱既左翼

下晝1點腓特烈二世既本隊向奧軍左翼發動奇襲 奧軍左翼被殺個措手不及
到3點鐘普軍已經攻佔洛伊滕村但被人數佔優既奧軍包圍兩軍相持不下
呢個時候奧軍已經又再完成轉向 而家面向西南既奧軍係右翼組織一支騎兵發動攻擊
點知冇行幾步就比山上普軍既騎兵截擊
腓特烈二世睇準機會親領係南方普軍既騎兵兜到奧軍右翼後方
奧地利軍全線崩潰
四萬普軍對六萬奧軍 普軍死一千 奧軍死三千降萬二
普魯士收復西里西亞
從科林之敗後腓特烈二世短短半年間從亡國邊緣中拯救左佢既國家
普魯士以極低既損失消滅左奧地利六萬征普主力



進入洛伊滕村既普魯士軍

卡爾·亞歷山大返到奧地利之後叔仔都冇情講就比瑪麗亞·特蕾西亞炒左
而家奧地利最高統帥由道恩接手
多謝你啊大嫂我終於唔洗再對住腓特烈啦

清理晒門口既威脅腓特烈二世急不及待又再發動新一輪進攻 1758年當冬天一過普軍就圍攻摩拉維亞既奧洛穆茨
但坐城都圍左冇耐就比道恩襲擊普軍後方截斷左補給線 就係呢個時候東線又出事
係東普魯士五萬俄國大軍壓境 腓特烈二世只好撤出摩拉維亞迎擊俄軍
雖然8月25日腓特烈二世帶三萬六普軍係曹恩道夫擊退四萬四俄軍
但自己都損失左萬三人 抖都未抖南線道恩就帶住八萬奧軍沖上黎
10月14日腓特烈二世係霍克齊再次被道恩擊敗

雖然西線布倫瑞克-沃爾芬比特公爵斐迪南對法國守得好搵陣
但由腓特烈二世睇既東線奧地利同南線俄羅斯已經分別打到入薩克森同東普魯士門口
1759年7月23日俄軍以人海戰術衝破普軍防線東線告急
係南線同道恩對峙緊既腓特烈二世得知即刻北上親自領兵迎敵
知道腓特烈二世走左道恩亦派二萬人北上支援俄軍
8月12日三軍係庫勒斯道夫會合
今次佢地要係到一次過打沉普魯士

腓特烈二世帶領六萬普軍從東面而黎 對面六萬俄奧聯軍就駐紮起伏縱橫既山谷上
吸收長年同腓特烈二世打交道既經驗知佢喜好側翼包圍 俄奧聯軍放棄傳統既長戰線改為擺深縱深陣形
每個山頭都擺一個軍團 弱既擺前面主力擺後面 首先吸引普軍包圍側翼然後全面反攻

11點普軍係炮兵支援下首先發動進攻 打法依然係腓特烈二世自豪既斜線戰術
普軍少數右翼向俄奧左翼發動佯攻 然後普軍左翼本隊向俄奧右翼發動正式強攻
唔洗一個鐘俄奧第一線全面崩潰 普軍攻佔第一個山頭
不過你攻佔左一個山頭後面仲有千千萬萬個
腓特烈二世望住一層層山頭一層層俄奧戰列 佢先知道戰爭而家先開始
腓特烈二世首先下令騎兵突擊為後面既步兵爭取時間爬山
但騎兵一衝落山就插左入沼澤入面
趁普軍騎兵食死係沼澤入面 俄奧騎兵從乾涸既地形衝上普軍所在既山頭
普軍一衝即散
咪走!!企定!!冷靜D!!臨陣逃亡仲係普魯士人黎既!?
陛下!!你打左咁多年仗普魯士人早就死晒啦 呢班係薩克森同奧地利降兵黎架
咩話!?
亂戰中突然一粒流彈將腓特烈二世打落馬
最後腓特烈二世係愴惶中隻身逃回柏林
俄奧聯軍死萬五 普軍死二萬


庫勒斯道夫戰役

返到柏林 佢既皇宮 係佢台頭只係得返一疊疊前線送黎既戰報 封封都慘不忍睹
只有一封例外

一封佢唯一既盟友英國威廉·皮特寄黎既信
如果你冇辦法扭轉劣勢既我對你既援助都到此為止
不如趁俄佬將你五馬分屍拎去西伯利亞堆肥之前幫自己買定副棺材啊?當然你自己出錢

係對面海 威廉·皮特日子都唔好過
佢既重海輕陸既戰略結果就係陸戰全敗
係歐洲大陸英王老家漢諾威都一度失守要靠普魯士獨力支撐
係北美 英軍對俄亥俄河谷同聖勞倫斯河法軍據點既進攻只係將維珍尼亞公司寶貴既人力白白推晒落地獄
唯一可以稱上叫成功既就係摧毀左法國同西班牙係美洲既艦隊封鎖晒佢地既港口
之所以講左咁耐都冇提過半場英軍既戰役係因為 英國政府每年大筆大筆錢倒落黎 英軍無論贏定輸都未打過半場有意義既戰爭
而家無論佐治二世 托利黨定輝格黨都日日比面色湯馬斯·佩勒姆同威廉·皮特睇
如果佢地而家想玩內閣總辭既話全英國包括佢地既德國國王都會好歡迎

轉機係1758年8月來臨
英國海軍擊敗守係聖勞倫斯灣門口既法國艦隊攻佔係新斯科舍既路易斯堡
1759年英軍沿聖勞倫斯河而上到達新法蘭西既首都魁北克
9月13日英軍係亞伯拉罕平原戰役擊敗法軍攻佔魁北克 然後繼續沿聖勞倫斯河攻陷埋蒙特利爾 英軍勢力到達大湖區
咁樣英軍就可以重走當年法國探險家既路線沿俄亥俄河谷到密西西比河係路易斯安那出加勒比海
全個新法蘭西將無險可守

亞伯拉罕平原戰役

普魯士係庫勒斯道夫戰敗後法奧俄聯盟垂手可得既勝利被英軍粉碎
就算比佢將普魯士炸成廢墟新法蘭西都唔會返返黎
好彩法國趁普魯士虛弱 路易十五決定建造一支十萬人海軍艦隊
將保護係法國入面詹士二世既後人查理·愛德華·斯圖亞特送返英國立為新既英國國王
路易十五已經唔希罕一條可以奪回新法蘭西既和約 佢而家要既係整大不列顛王國

但係佢要執行呢個計畫之前佢首先要問准佢係全歐洲都卷入戰爭時唯一保持中立既鄰居荷蘭
荷蘭既回應係 你打英國可以 但如果你夠膽迎立斯圖亞特家族既我一定開你拖!!
就咁法國出兵英國本土既計畫就傳左入英國耳中
英國海軍突襲左法國係勒阿弗爾既造船廠 然後係拉各斯同基伯龍灣擊敗法國主力艦隊 粉碎法國入侵英國既計畫
一年間扭轉英國長期劣勢
如果威廉·皮特呢個時候話要彈出既 佐治二世真係自貼賓州都要哎你返黎

基伯龍灣海戰

不過英國輸時普魯士贏
英國贏時就到普魯士輸啦
1762年俄奧已經打到去柏林門口

玩完啦 乜撚都玩撚完啦
腓特烈二世寫埋遺囑比佢家姐煩惱緊應該要自殺定戰死時
前線突然傳黎喜信
奧俄退兵啦!!
奧地利後邊補給線被截而家退回波希米亞
更重要既係俄羅斯女皇葉莉扎韋塔·彼得羅芙娜過身由佢個姪彼得三世繼位
彼得三世本身係荷爾斯泰因·戈托普公爵係德國人而且佢仲對腓特烈二世非常崇拜
佢一上台就下令俄軍停火然後1762年5月5日同普魯士簽訂聖彼得堡條約
俄羅斯放棄全部從普魯士佔領既土地 俄羅斯廢除凡爾賽條約改為同普魯士結成攻守同盟
竟然有咁反高潮!?呢D簡直係勃蘭登堡既奇蹟!!

機會難得呢個係最後既反攻機會
腓特烈二世即刻摷均全國最後既士兵反攻
7月21日係博克施道夫戰役擊敗道恩收復西里西亞

回本啦!!回本啦!!普魯士又返返去戰前狀態啦!!我有今日都多得你咋彼得三世
咦?彼得三世呢?
死左
邊個做架?
佢老婆 都係德國佬索非亞·奧古斯塔·腓特烈卡
佢俄名叫葉卡捷琳娜·阿列克謝耶芙娜
俄羅斯女皇葉卡捷琳娜二世

葉卡捷琳娜二世

一年間俄羅斯換左三個皇帝政局大亂退出戰爭
英國包圍法國北美殖民地 普魯士重奪西里西亞
二世祖路易十五 肥師奶瑪麗亞·特蕾西亞
家陣要投降個個係你地啊

1763年2月10日大不列顛聯合王國 葡萄牙王國同法蘭西王國 西班牙王國簽署1763年巴黎條約
各國交還係戰爭中佔領既土地
法國拆除敦刻爾克海岸要塞 從印度撤出 將整個加拿大同密西西比河東岸割讓英國 西班牙將佛羅里達割讓英國

1763年2月15日普魯士同奧地利簽署胡貝爾圖斯堡和約
普魯士撤出薩克森 奧地利承認西里西亞屬於普魯士

經過奧地利王位繼承戰爭同七年戰爭多年既窮兵黷武普魯士由神聖羅馬帝國其中一個諸侯一躍成歐洲強權
以前神聖羅馬帝國境內就只有一個國王就係神聖羅馬帝國皇帝既波希米亞國王
就算卡爾六世升普魯士為王國佢地都只係普魯士"入面既"國王
係腓特烈二世兩場大戰之後哈布斯堡帝國被打成二流國家被普魯士取代佢係東歐既地位
而家腓特烈二世夠膽堂堂正正稱自己為普魯士國王同神聖羅馬帝國皇帝平起平坐

係腓特烈二世登基前普魯士被歐洲人戲稱為神聖羅馬帝國既斯巴達
普魯士人成為粗野士兵既代名詞
腓特烈二世呢個愛好文藝既死基佬入主之後係全國各地興建華麗而優雅既巴洛克式建築
鼓勵宗教自由 資助文藝創作 伏爾泰亦曾經係佢既坐上客
佢一句神聖羅馬帝國既唔神聖亦唔羅馬更唔係帝國就係呢種時代環境下講既
腓特烈二世在位四十六年將呢座東歐軍營改做成個個能文能武既紳士士兵
呢個時候全歐洲人都稱讚普魯士人日頭斯巴達夜晚雅典

晚年腓特烈二世

再到1772年腓特烈二世連同俄羅斯既葉卡捷琳娜二世第一次瓜分波蘭
曾經係威係勢既神聖羅馬帝國皇帝......既啊媽瑪麗亞·特蕾西亞多方斡旋亦無力阻止
奧地利國際威望掃地
瑪麗亞·特蕾西亞死後佢個仔約瑟夫二世亦加入瓜分波蘭既一分子
到1795年第三次瓜分
經過一百年既大洪水 波蘭終於壽終正寢
到我地呢個系結束既一日我地都唔會再見到呢個國家出現

第一次瓜分

第二次瓜分

第三次瓜分

而英國 威廉·皮特係七年戰爭中確立海權呢個戰略概念
邊個得到海洋邊個得到世界
對英國陸戰全勝既法國反而成為戰敗國
從東印度到西印度 從北美洲到非洲
大不列顛聯合王國都成為無可爭辯既壟斷者
繼西班牙之後成為第二個日不落帝國
憑佢既自信 佢而家要開埋世界上最後一個市場成為重商主義下最大既壟斷者
1792年9月26日馬戛爾尼出使大清帝國

不過短短七年間既戰爭 用小小一個英國係世界打全歐洲
大不列顛聯合王國都打到山窮水盡
對住當時個幾千萬磅既負債
令佢都行上左上一任日不落帝國既老路

夠鐘收稅啦

下集美國獨立戰爭

1770年4月瑪麗亞·特蕾西亞最後一個女瑪麗·安托瓦內同路易十五既王太孫路易-奧古斯特成婚

btw有咩書局多歷史書買 中文洋文皆可

毛語錄

btw有咩書局多歷史書買 中文洋文皆可

毛語錄

睇一睇
又想玩返EU4

巴打你真係寫得好好睇
睇左開頭就忍唔住睇到最後

LM

好多集冇追

一鍵留名

自貼賓周

下集孤軍雄心

留名學嘢

睇一睇
又想玩返EU4

我寫完想玩返cossacks同american conquest
如果想玩18世紀歐洲戰場就玩cossacks


想玩美洲殖民史就玩american conquest
佢英國劇情有亞伯拉罕平原戰役
不過西班牙劇情最好玩
打阿茲特克印加以一當百

睇一睇
又想玩返EU4

我寫完想玩返cossacks同american conquest
如果想玩18世紀歐洲戰場就玩cossacks


想玩美洲殖民史就玩american conquest
佢英國劇情有亞伯拉罕平原戰役
不過西班牙劇情最好玩
打阿茲特克印加以一當百

正,有無SEED

睇一睇
又想玩返EU4

我寫完想玩返cossacks同american conquest
如果想玩18世紀歐洲戰場就玩cossacks


想玩美洲殖民史就玩american conquest
佢英國劇情有亞伯拉罕平原戰役
不過西班牙劇情最好玩
打阿茲特克印加以一當百

戰場指揮我覺得好難玩
不過望落又幾正

下集美國獨立戰爭大家話擺時事台好定學術台好?

下集美國獨立戰爭大家話擺時事台好定學術台好?