有兩樣野講明先：

一﹑我唔係針對隔離講故台
之前出過書既，我都覺得至少係題材上有突破
好似紅van，仲有一堆毒撚女神故
都可以話係表現到香港網絡文化

二﹑我唔係妒忌。
我寫過故，亦有facebook page，的確係無乜人睇，但我從來唔當自己係作家，亦唔打算以出書為目標
競爭心態就一定有，但只限寫個陣，寫完個故有咩評價我控制唔到（況且依家已經無寫）
今次我只係出於一個讀者／觀眾既心態去評論

好啦，講番正題
我會開依個post，亦因為facebook有個fd share 依本《野比大雄》
起令我諗番起，我係曾經睇過依個故

無錯，我係睇過，但只係睇左少少，大概係大雄整到叮噹收左皮咁上下
我既第一個感覺係：寫乜鳩呀？

唔係內容有問題，反正網絡故既野，題材天馬行空，乜撚都得
而係作者既文字，真係太堪不入目
我唔係咩書面語主義者，我覺得粵語一樣可以寫得有味道
但依個故既作者寫既，係極低劣，低劣到有如小學三年級生係作文堂上面，一隻一隻字思考出黎咁生硬
個感覺又好似一個岩岩識講野既細佬，同你口upup講緊一個佢ff出黎既故仔
作為一個成年人，無論故事後續幾有趣都好，你會聽落去咩？
我真係唔會

你話，文筆唔係問題丫，個故事好睇咪得囉
拿，依個就係問題所在

我出依個post，唔係要遣責個故既作者，因為佢既文字係我眼中幾有問題都好
佢有佢發言，表達，存在既自由

但點解佢會比人追捧，甚至捧到出書？

一個創作者，無論從事邊邊一方面，失敗有好多野理由（技巧唔好，公關不足，自我放稟等等）
但一個創作者既成功，一定只有一個原因，就係「受到觀眾團體既追捧」

而依家網上竟然有一班人，佢地既口味係可以接受到咁樣既文字
甚至罔顧文字最基本，應有既骨格，結構，但求「可以解釋」就照單全收
仲要睇到話好過癮，然後捧到作者出書

無錯，佢個故上網有曬，印出黎至多咪浪費幾斤紙，唔會點
但既然作為網絡故，點解就唔由佢係留係網絡入面？
以後人地去書局，見到排行榜上面竟然有依本「書」
我真係覺得成間書局﹑出版界，香港讀書比佢污染曬

可能你會覺得點解我要講到咁誇張
但作為一個鐘意睇書，幾窮都會比錢買書，亦鐘意睇小說，文學既人
我真心無辦法接受咁既文字質素可以稱之「作品」，甚至「書」

再重申一次，孤掌難嗚
作者一個人，係拍唔響成個潮流
到底係咪受歡迎就等於有價值都可以張佢實體化
甚至有價值可以擺係書局入面作為「書」依一種「貨品」去銷售
我真係好想知到底出版界，香港讀者出左咩事，先會造成令咁既現象

但我明白，米已成炊，書都已經出左，就實有人會賣
已經成為香港出版界既歷史
而我依篇食完早餐，食緊事後煙寫既野，亦只會令人覺得我針對緊依個故事

但我發自內心講多次，我唔係針對作者，亦唔係針對故事
而係疑惑緊香港某部分讀者同出版人既口味係低到一個咩地步