(圖右就係我衣加個樣。)

「救命啊，屌你！邊個可以幫我除左個面罩佢，好辛苦啊！啊……我暈啦。」說時遲那時快，我就已經暈左喺間玩具店入面。

如果你問我發生咩事，我諗可以play back番去一個鐘之前。話說我自己就喺元朗一間玩具店入面做part-time既(如果你問我邊間就唔講啦，廢時自爆，不過比小小提示啦，門口有部遊戲機既。)一個鐘之前，天都就快黑曬，正正夠鐘放工，點知老闆之前訂既果批新玩具咁岩就送到去門口，所以咪要ot點埋批貨先走囉。點點下就發現有件新既超人變身器唔對路，咪拎去比老闆睇。(唔好問我係咩變身器，我只係識超人迪加架姐，衣加果啲新既香蕉，蘋果，橙我一個都唔識。)

「仆你個街啊！夠膽比件強國貨我，個logo仲要寫住殘體字！啊吉你同我處理左佢！」老闆佢望左望就當堂嬲到爆，順手拋左盒野比我。

咁我都唔係白痴既，緊係拎住盒野衝出去扮搵下送貨條友啦。其實衣啲情況都唔算第一次發生架啦。好似又係因為衣隻超人既變身器無啦啦變左山寨貨，我又新嚟唔識死，就比佢指住嚟鬧左成粒鐘。所以以後一收到咩唔對路既貨，我就會扮晒野出去搵送貨條友，實情就係去附近間玩具鋪買番件正貨等老闆下火。(雖然咁做好白痴，但係我唔想比人當街當巷指住嚟話，好彩件貨唔算貴既……)

今次我又去番同一間玩具鋪搵，都好快咁買番件正貨。但係今次我唔諗住咁快番，因為我真係好肚餓，所以就穿過左個小巴站，去m記到買野食醫下肚，反正照計鐘出糧比我。我買左個21蚊餐就坐低食左陣，對對錶我都差唔多出左嚟成半個鐘，計埋行番去既時間都唔洗五分鐘，則係仲可以dum多幾個字波鐘。我見無聊，咪開左盒山寨既變身器出嚟，仲帶埋去上腰到，size岩岩好。

等等！唔係比細路玩架咩？點會岩我帶既？

「henshin！」

做乜勁無啦啦條腰帶會自動發聲既，仲識發光既？

我合埋對眼頂住條腰帶既強光，直到幾秒後，我發現本來著住製服既我換左套西裝，仲帶埋對閃閃發光既手套，個頭仲重重地。當我摸下佢果陣我發現自己帶左個頭盔，更重要既係成間m記既人都靚晒望實我。衣一刻，我連冷氣入面啲機械聲都聽到。

過左陣，啲成日踢人入會既麥當奴姐姐走上前打算啪我膊頭，仲好大聲咁話：「先生，麻煩你……」

點知佢野都未講完就比我一手撻佢落地，個麥當奴姐姐就梗係痛到喊出嚟。其他旁觀者就齊齊指實我
話：「哦！」
「嘩！一個大男人咁樣對個姐姐仔。」
「佢真係好鬼仆街！」
「著成咁成個變態佬咁既。」
「佢痴線架。」

唔知點解，佢地講野好似好細聲，但係聽在我耳邊就大聲到不得了，而且我覺得佢地既動作變得好慢。所以我留意到有人正正想拎部手機影我，基於小毒毒心理，我就即刻拎番起我帶嚟個兩盒變身器番鋪頭。

點知都唔洗一秒老闆就出現係我面前。啊，唔係！係我已經跑到番去。

「你……邊位啊？」下左火既老闆比我嚇到彈起。

我比左盒正貨老闆話：「岩岩我追左勁耐先換到番嚟架。」

直到聽到我把聲，老闆先擺番佢個格出嚟，話：「頂你咩！去咁耐，仲要換套咁既衫！嚇死人咩！」我一日就知老闆佢講野大聲，所以我用隻手琴住隻耳仔個位。

老闆見我咁做仲唔嬲到爆炸！佢一野就拎開我隻手，仲要係我耳邊大叫：「我講野好大聲咩！」


嗯……我知道我可以去伸請工傷。