彭定康在任港督時經常落區，更不時到餅店幫襯他最愛吃的蛋撻。

近年遊行示威都見到龍獅旗飄揚，反映唔少港人對殖民地年代嘅留戀，而結束香港殖民嘅標誌性人物，末代港督彭定康又重臨香江喇。話說海事博物館周五有個展覽開幕，展品由牛津大學博德利圖書館借出，有10件中國珍貴航海文物，包括鎮館之寶，明代手抄海道針經《順風相送》；為隆重其事，目前身任牛津大學校監嘅肥彭，將會連同校長賀慕敦出席揭幕禮。

除此之外，肥彭本周六仲會出席香港牛津校友會研討會，屆時會發表演說。肥彭訪港，唔知會唔會順道去食件佢最愛嘅蛋撻解饞呢？八方反而想知，佢會唔會順道搵埋舊部、老友如陳方安生等聚吓舊呢？