財經專題
中環人佔領中環

長實主席李嘉誠說，佔領中環每一個小時都對香港有損害。會德豐主席吳光正指，佔中是與中央爭權。所謂國際都會金融中心，從來認錢不認人，股票及基金市場交易每分每秒幾千萬上落，要一班保守怕變的金融既得利益者「拋頭露面」講公義？很有難度。
雖然叫不醒裝睡的人，但亦有一班政治醒覺的中環人正悄悄起革命，要跟共產黨插手香港內政說不。他們有人是公認的打工皇帝，有人剛從港交所的高職退下來，有人自稱幸福的中產，連前共青團成員也是其中一員。由捐錢支持佔中行動，到準備走在中環最前線公民抗命，他們願意脫下西服套裝作出犧牲。
「我哋呢一代，好怕廿年後仔女走嚟問我哋，點解香港咁唔公平，你後生時做過啲乜？我希望我不枉此生咁講，我係有份為民主抗爭過。」

劣幣驅逐良幣

中環人通常被視作上等人，以家庭收入劃分， Edward更加「係全港 top 5%」。站在記者鏡頭前大談支持佔中和真普選，對高薪厚職的他來說絕不容易。「佔中，話冇影響份工就假嘅。如果公司唔鍾意，我要作出一個好大嘅決策，究竟真普選重要，定份工重要？我坐落條街度，就唔係講玩。」他簽署佔中意向書前，就向律師朋友查詢入罪機會，一旦被拘捕，亦會作出抗辯。
金融界與政府究竟發生了什麼事，讓育有年幼子女的他，義無反顧爭取民主？原來近年有太多紅色甚至黑色資金從北方湧入香港，加上中國式管治文化令金融和政治制度逐漸崩壞，在金融界打滾廿年的他，無法坐視不理。
「依家入金融業，你要有中資背景，家人係某地方或中央官員，或你自己本身係共產黨員。投資銀行一定請你，因為你識到好多大陸財金界或政府比較重要嘅人物，可以介紹好多交易。大型國際投資銀行嘅 corporate finance（企業融資）部門，百分之八十有大陸背景。近呢兩年，嚟香港開業嘅對沖基金、私募基金，差唔多百分之七十係大陸資金。」
靠攏中央拉關係，金融界處處皆是， Edward何以如此在意？「金融界嘅管理文化好大改變。大型中資或投資公司，會好人治，老闆認為係咁做，下面嘅所謂規範部門，都需要作出『協調』。金融機構有白紙黑字嘅守則同程序，但中資唔會跟到足，例如一單交易，要開一個戶口，客戶要提供十樣文件，個客淨係俾五樣，不過個客係老闆轉介，就有特別批准。中資機構經常發生，外資行唔敢咁離譜。」

紅黑資金湧港

中港兩地近年積極融合，表面上有助金融發展，但衍生來歷不明的紅黑資金問題，「洗黑錢，全世界都有……以前睇過大陸客戶過往嘅交易，佢話俾你知佢係一個普通紡織商人，但可以有單交易係幾十億人民幣，我會質疑，錢喺邊度嚟？我哋做 due diligence（謹慎性調查），會發現佢間公司有幾個合作伙伴，係控股公司，啲錢就係咁走入嚟，但追查上去，你根本搵唔到源頭，好多時我哋會停止，搵唔到筆錢邊度嚟，我哋冇可能做呢單投資。」
這些故事，在金融界是公開秘密，但有人做得特別核突，例如香港交易所行政總裁李小加，「佢係『海歸派』，係一個好進取嘅人，不惜一切想做大港交所個餅。早幾年中國高精密嚟香港上市，竟然可以用國家機密為理由，冇喺賬目列出所有文件，停牌後港交所又俾佢復牌，搞到證監出手勒令停牌。港交所做得好肉酸，李小加嘅想法好中資，做好生意就得，細節唔使太理會，過到骨就算。」
近月阿里巴巴不滿香港「同股同權」制度，決定棄港赴美上市，李小加的一番言論，更叫陳漢輝氣憤，「佢話同股同權唔係普世真理，唔係本港核心價值，要檢討呢個制度。佢可以為咗生意，放棄制度。但佢忘記咗港交所唔係純粹一個私人機構，佢有社會責任。」

人治取代制度

最新鮮熱辣的融合例子，莫過於上週公布的港滬股票市場互聯互通機制，「好多香港投資者擔心大陸嘅證監未到國際水平，你睇民企，冇人買，招股書話有廿間廠投入運作，查實得兩間，行內個個都知。你夾硬聯繫，我驚劣幣驅逐良幣。」
中資機構人治，或大陸「海歸派」話事，關香港政府什麼事？「呢個人治文化同中國政府一脈相承，引伸出嚟，金融界係香港嘅縮影。董建華同曾蔭權年代，中方都未必係插手，最多指指點點，但你見到 689梁振英上場，就好似奴才一樣，去做啲嘢為搏主子開心，用人唯親，不過可惜佢同佢啲朋友能力非常一般。李嘉誠話齋，有能力嘅人唔出聲，冇能力嘅人就爭住做。」
「係咪有真普選或民主制度，世上嘅唔公平或洗黑錢情況就冇咗？絕對唔係。不過民主係最公平、透明度最高嘅政治制度。你可以用選票踢一個好差嘅特首落台，有監察性，冇一個人或政黨擁有全部權力。」
六四燭光集會、七一遊行、反高鐵集會， Edward都有參加，下一站，是佔中，「佔中係一個手段，有真普選，咪唔使佔中囉。」

Edward說大陸人最愛用人唯親，在港交所工作十七年、本年初退休的 Bill叔，在李小加治下四年，有否目睹甚至接收一些不合資格或能力不足的人，靠大陸背景進入港交所？

必要的沉默

「呢個問題好難答，我唔能夠講冇，哈哈，但我唔可以話有……牽涉好多嘢。有啲嘢，過唔到良心，咪唔做囉。不過呢個唔係我退休嘅原因，我係做夠，可以休息。（有否出聲阻止呢類事件？）呢個……真係必要嘅沉默。其實有啲咁嘅情況，出聲都冇用，任何決定都係最高層嗰個決定，出聲都唔會改變到。依家退咗休，好自由。」 Bill叔，原來有點意興闌珊。
接受訪問前， Bill叔講明不想談及金融界內幕，皆因他沒證據，怕惹來官非。不過講討好「阿爺」的文化，他毫不吝嗇。
「如果香港金融界一啲決定摻入中國政治決定，係高危。以港交所為例，高價買 LME（倫敦金屬交易所），市場認為係有阿爺祝福，但佢可能係大白象。我哋吓吓都希望同中央政府接軌攞着數，呢種文化，慢慢將金融界競爭力摧毀。你只會去討好阿爺，以為配合佢就會發達，呢個係好二世祖嘅諗法。」

最強擦鞋仔

Bill叔又說，北京提出的意見未必正確，「當年起赤鱲角新機場，（時任港澳辦副主任）魯平高度不滿，認為英方會將香港豐厚嘅儲備用完，但睇番依家，好彩有起到。咁究竟佢嘅觀點係咪一定對香港好？唔一定。如果香港唔起新機場，仲會唔會係國際都會？唔好吓吓用一個敵對嘅目光去睇反對意見。」
討好阿爺， 689特首應是最強者。為怕再有梁振英之流的人出任特首， Bill叔退休後全力推動金融界佔中，爭取真普選，「中央依家係覺得，你同佢唔同意見，即係反對佢，於是就會發動好多親中媒體去搞事，咁樣係好不智，冇胸襟。」

公平競爭不再

下週三，佔中金融界組別會召開記者會，向中共提出十項訴求。區麗莊負責行政工作，集資在中外報章刊登廣告，又找人將內容翻譯成英文、法文、德文、日文，把普選議題推向國際。
「我喺金融界十幾年，做生意，點都有唔公道嘅地方，但你要有機會、有渠道出聲，有法治去改善個制度。金融界嘅功能組別立法會議員，我自己都冇得揀，我就會懷疑，佢究竟會唔會為我或者其他冇得投票嘅金融界從業員去做嘢。」
香港人最想有得揀，但北京偏偏篩選過後才給香港人揀選。「你會睇到香港人好多怨氣，有人連飯都冇得食，地方都冇得住，港人港地都冇埋，（梁振英）講嘅嘢都唔兌現……我都係普通市民，唔可以話見義勇為，但見到社會有不公義，覺得要出聲。」

上高登討論區

一向是「乖乖女」的麗莊，直言近年參加愈來愈多遊行示威，「反國教、撐港視、撐李慧玲等等，就快個個禮拜都行。」為免金融界佔中太「離地」，她留意更多社會聲音，「我以前未上過高登討論區，我特登睇吓佢哋會講啲乜，原來佢哋會講政治，講台灣學運。」
不少金融人仍未公開表態支持佔中，她已身先士卒，「我唔覺得今次開名撐佔中有咩問題，唔覺得係衰嘢。」

腐敗黨員南湧

金融人大談紅黑資金來港，香港廉潔地位動搖。八年前來港的 Sophie，曾任股票經紀，更有不少優秀共產黨員朋友，在香港開公司密密搵錢。
「我朋友，嘩，神通廣大。啲大陸客以個人名義嚟香港買股票，上晝啲錢一入咗地下錢莊，幾個鐘就匯到香港，一次幾百萬。我朋友點解要運啲資金嚟？佢買資產、股票、保險，又會將資金轉去瑞士呢啲安全啲嘅國家，或歐美國家。」
港官恐被同化

說到這些黨員朋友如何拉攏關係， Sophie相當不屑。「我親眼見過，太古廣場買名錶，幾廿萬開單，買十幾萬名牌手袋唔使眨眼，吓，咁都得？內地貪官嚟香港，去鯉魚門食餐飯都萬幾蚊，如果你食一、兩千蚊，佢睇唔起，你想喺大陸開公司、投資煤礦？冇可能。你要帶佢哋周圍玩，住高級酒店，去高級商場，要貼身服務佢，但佢只係普通一個縣官。佢好明目張膽提出有咩要求，有清單列出嚟，毫不客氣。我朋友仲話，香港啲官都係咁，你睇起上嚟好廉潔，但背後你又知啲咩？」
「你唔發聲，呢啲人就永遠都會騎喺你頭上，你永遠做奴隸。我以前喺大陸未見過選票，嚟到香港覺得好自由。以前我以為共產黨好好，依家我覺得係一種覺醒，唔應該為咗賺錢而喪失基本嘅核心價值。」
撰文：袁慧妍
[email protected]

http://hk.next.nextmedia.com/article/1258/17242150

雖然我估佔中都係和理非非收場, 但係我諗都應該支持用任何方式爭取民主