http://hk.on.cc/hk/bkn/cnt/entertainment/20140521/bkn-20140521030230569-0521_00862_001.html







【on.cc東網專訊】 謝安琪（Kay）身穿大露膊Tube Dress出席音樂會，騷歌喉之餘，更多次烏身大晒事業線，向觀眾發射女神導彈。對於本報披露自她所屬的台灣金牌大風被華納收購後，Kay的大中華區唱片合約將會以七位數賣身給華誼兄弟？Kay直認華誼有自動搵上門，並搞GAG說：「愛是懷疑（華誼）？其實我同華誼好多歌手都認識，例如張靚穎、陳楚生，大家都好有誠意接洽過，佢哋亦係一間可以好好合作嘅公司，其他嘢交畀公司處理，so far我同陳楚生合作過，都傾得好好。」問到近年積極發展華語市場的Kay是否放棄香港市場？她說：「唔係，我好快出廣東歌。」
而Kay今次可謂雙喜臨門，因她宣布與經理人夏森美自組新香港唱片公司邁亞音樂，意思是邁向亞洲。Kay笑言夏森美送了股份給她，令她榮升謝老闆，現階段旗下還有師弟goldEN，並歡迎其他歌手加盟。問到會不會不簽其他女歌手，獨坐一姐之位？Kay笑言：「唔會唔簽。（賺兩份糧？）錢好其次。（簽老公張繼聰？）佢好搶手，我未必搶到佢，依家佢多線發展，又電視，又司儀，又電影，都唔夠時間，我哋都未傾過。」
今次有歌手自組唱片公司，Kay承認香港屬罕見情況，亦算是大膽做法，謝老闆又笑言：「以前小小嘅公司，好有家庭feel，好開心，大家好有默契，好溫馨。」唔通暗寸緊前年鬧不和嘅舊東家環球唱片唔夠溫馨？