http://youtu.be/Z7i2fnYSssM

【偲嫣ＢＢ世紀絕食第2日】
「正義聯盟」召集人李偲嫣前日下晝開始，喺政府總部公民廣場展開無限期絕食，聲言要直到政府官員回應反暴力示威為止，更寫下絕筆遺書。事件震驚網絡界，網民紛紛全力支持，祈求偲嫣BB一言九鼎，唔好中途而廢。


■噚日有四個網民真係響應號召嚟政總野餐，「激勵」偲嫣BB，場面好「感人」。李展翹攝

向記者大發雷霆兼報警

有好事之徒喺facebook號召「支持偲嫣BB無限期絕食政總無限期擇日野餐行動」活動。噚日晏晝真係有四名網民，買咗老麥去政總外野餐，仲專登喺閘外高舉薯條同零食，向偲嫣BB揮手致敬，搞到在場警員一度緊張。
唔知係咪俾班網民激親，《蘋果》記者晏晝探望絕食偲嫣時，佢大發雷霆，問完「又係蘋果呀」，就先用「肉」手擋住鏡頭，再嚟出動報紙，話未得佢同意唔可以影佢喎。大姐呀，政總係公眾地方喎，但佢依然致電999報警，聲言話「我要告佢騷擾我」。
不過佢身邊兩位同伴仲激，斥記者「黑社會」、「垃圾」；其中一人貼住鏡頭伸脷，有碼頭工人向《蘋果》爆料，話「伸脷男」就係工聯會屬下貨櫃碼頭關注組發言人邱美光。
八方都好驚偲嫣BB撐唔住，下晝再去探下佢時，佢態度唔同晒，接受八方專訪5分幾鐘。當時已絕食咗20幾個鐘嘅佢話：「（身體）還可以，熱啲啦，好多蚊！」對於有網民嚟挑機，佢話唔驚有衝突，「你話畀我聽點解會有衝突？……如果入到（絕食範圍內）就嚟！」
佢話未定絕食到幾時，但重申前日講咗只係絕食到「身體捱唔住」，唔係網民一廂情願以為佢會犧牲自己。佢話有「朋友」噚日帶水嚟畀佢，八方睇到枱上有好多糖份含量高的寶礦力水特同忌廉飲品。偲嫣BB你要堅持下去，絕食到底呀！