http://hk.apple.nextmedia.com/enews/realtime/20140630/52644602

是咁的，亞洲電視股東查懋聲及查懋德兄弟，聲稱承擔咗一筆價值兩億元嘅可換股債券，作為對亞視貸款，但亞視拖欠貸款連利息近三億元，兩人於今年4月申請亞視清盤，案件喺本月25日喺高院提訊。

打官司都算，最慘係一班員工吖嘛！今日有人爆料話亞視今個月冇糧出，仲影埋張聲稱係「人力資源科」通告，通告內容表示因為查氏兄弟入稟高院，申請公司清盤，令到銀行賬戶被凍結，所以暫時出唔到糧，話因為銀行戶口被凍結，所以「無法及時發放本月薪金」。

唉，月尾一日接啲咁嘅消息真係慘慘豬，都係打份工啫！呢張聲稱係內部通告亦表示：「力爭於下周一(即7號)前解決，並盡快安排發放薪金。」希望可以盡快解決到啦﹗

至於亞姐出身嘅張家瑩，接受電話訪問時亦承認冇糧出：「有睇新聞，確係有咁嘅事，今日收到通知，自己都係第一次遇到啲咁嘅事，公司話搞緊，最快下個禮拜一會出番糧畀員工。」