[陶傑 Channel] 三罷爭普選

一邊準備佔中，一邊反佔中，一定流血收場。
不如咁樣：中間落墨，改為罷課、罷工、罷巿。
咁樣如同行動公投，「三罷爭普選」之下，唔使阻礙中環運作，但如果夠力，可以癱瘓全港。
外國勢力支持：美國迪士尼宣佈，凡罷課學生，可以免費入迪士尼玩。罷幾耐，玩足幾耐。著校服上課時間幫襯美國麥當勞的小朋友，一律三折。
而且仲有度好：壹傳媒帶頭罷巿，主動無限期停刊，直到真普選為止。
佔中未必暴動，但全港巿民冇蘋果睇，冇得宣洩，就一定暴動。
到時，反而係習總由北京打電話落香港與肥黎談判，請求早日復刊，繼續倒梁反共。解放軍進駐將軍澳，用枝槍監住印報紙添！
咁就好笑咯。