同三五知己去茶樓飲茶 嗌啲乜野食先至係最好?
計我話 識食既一定係食雞扎
點解? 我假設你地有五個人
蝦餃 燒賣 一籠得個三四粒你點樣分比五個人食呢?
反之 雞扎就完全唔同
一件雞扎滿足左你五個願望
雞件 火腿 魚肚 芋頭 仲有 腐皮
樣樣都係世界級
之不過當你嗌左雞扎
正常人一定係爭住件雞件黎食
正如好多既球迷都會去捧C朗 美斯
我唔會話呢班人唔識食
之不過 喺一件雞件唔可以同時分比五個人既情況下
我教你一個方法
可以唔駛再同呢班無知既人爭餐懵
就係主動去食精華中既精華 - 芋頭
芋頭 - 可能係雞扎五樣主要材料入面最唔受注目
佢實而不華既程度 有如利物浦既軒達臣 阿根廷既馬斯查蘭奴
之不過 將芋頭放係雞扎入面
你就會發現呢舊芋頭升值百倍:

一件雞扎好唔好食
只要食一啖芋頭就知
芋頭本身煮得唔夠耐就會硬
太耐就會融
一件恰度好處既雞扎 一定就會有一件恰度好處既芋頭
恰度好處既芋頭會吸收晒其餘四樣材料係蒸煮時候既精華
一咬落去 所有既雞汁 火腿汁 魚肚汁
全部都融入晒係芋頭入面
再加上芋頭原來獨有既平實 而唔令人覺得花巧既獨特味道
簡直就係一隊足球隊踢得好唔好既重要指標
食左佢既話 你就會發現 其他既材料都變得唔再重要
球王就算企定定 都影響唔到比賽

講到呢度 相信大家都會明白 去茶樓飲茶
識嗌既 一定係嗌雞扎
識食雞扎既 一定係食芋頭