http://youtu.be/srXwE5CPoak

終於結婚結束20年愛情長跑的古巨基，昨日首度以人夫身份攜老婆陳英雪（Lorraine）隆重登場，雙雙出席名下甜品餅店開張，基仔大手筆豪送股份冧老婆，好友起哄要基仔錫錫基嫂，緊張到狂標汗的他扭擰親吻Lorraine秀髮和額頭，拒絕當眾表演嘴對嘴，下月42歲的基仔笑言開火箭趕造人，還口甜舌滑冧老婆：「甜品當然唔夠我哋咁甜啦！」

下月18日踏入42歲的古巨基，與現年44歲的助手女友Lorraine相戀20年，上周二基仔在微博公告喜訊，兩人終於在7.12假美國拉斯維加斯註冊結婚。昨日兩人首度以人夫和人妻身份亮相，到中環為名下的Alice Wild Luscious甜品餅店主持開幕禮，據知愛妻號的基仔豪送股份給Lorraine，她和另一股東各佔3,500股，基仔則只有3,000股。


■基嫂捧着霍汶希送用麵包造的龍鳳鈪，甜絲絲望實老公。攝影：仇志德


【飄移吻妻】
■基仔三度親吻老婆Lorraine，頭兩次只錫秀髮，第三次就咀低些錫額頭，怕醜的基嫂雙目緊閉表現尷尬。


【尷尬交杯】
■眾人起哄要基仔和Lorraine合巹交杯，但一對新人卻碰杯了事。


婚後開火箭造人

昨日基仔穿着St Laurent的便服登場，基嫂則穿上Sacai的白色裙子，一對新人的左手戴簡約婚戒，接受好友周慧敏和老公倪震、傅明憲、經理人霍汶希（Mani）、同門英皇藝人鍾舒漫、衛詩雅等祝福。基仔笑到四萬咁口說：「開心又興奮，尤其係成家立室，蛋糕店今日開張，雙喜臨門，麵包西餅任飲任食。」司儀森美問是否當擺婚宴？基仔坦白說：「應該出年搞，今年自己較忙。」森美取笑問洞房是否都要延遲？基仔尷尬說：「時間會分配好啲。」甜品都不及你們甜？基仔口甜舌滑冧妻說：「當然唔夠我哋咁甜啦！」
眾人起哄要基嫂現身，Lorraine千呼萬喚始出來，怕醜的她躲在老公身後，擾攘一輪才肯站在基仔旁邊，經理人Mani帶頭叫兩人錫錫，基仔扭擰下敷衍錫老婆秀髮兩次，表現尷尬，大家唔收貨再起哄，基仔才輕吻Lorraine額頭，始終不肯表演嘴對嘴，合巹交杯更只以碰杯代替。
向來大汗的基仔首度以人夫身份現身，接受訪問時緊張到狂標汗，否認三喜臨門有BB，問婚禮籌備多久？基仔說：「都係一個好突然嘅念頭，想畀驚喜佢（Lorraine），自己要扮放假出埠，拉斯維加斯可以即刻註冊。」至於生BB就交給上天安排，問是否開緊turbo進行？基仔笑說：「開火箭呀！」

全副身家送老婆

基仔謂婚禮在小教堂舉行，由外國人致辭，他倆都聽到眼紅紅。為甚麼忽然決定結婚？基仔說：「我哋嘅默契同共識都覺得，簽紙唔係太重要，最重要係兩人喺對方旁邊，但突然自己想畀驚喜佢。」問是否送全副身家給老婆？基仔笑說：「?家我成咗家，所有嘢都係兩個人嘅。」問周慧敏會否提醒基仔不要出軌？她說：「呢啲唔使提啦。其實佢哋都互相造就。」
採訪：卓寶花


【好友齊賀】
■好友周慧敏、倪震、傅明憲等到賀，衷心祝基仔和基嫂新婚快樂。


■基仔豪送餅店股份給老婆，笑言要開火箭趕造人。


■霍汶希率英皇藝人恭喜師兄基仔，鍾舒漫（中）親手畫漫畫祝福。