「Donut」九位成員今日去到西九龍中心，為佢哋本寫真進行發佈會，更即場舉行簽名會，但性感程度令人大失所望。

問佢哋會唔會好似AD2咁以三點式上台，佢哋話：「我哋宣傳唔及佢哋露咁多，我哋唔係靠露o架，我哋嚟緊都會有好多活動。我哋係比較健康，我哋個樣靚過其他組合，係我哋嘅優勢，唔需要靠露，露點同流M超核突，其實佢哋咁少布都好替佢哋擔心，怕佢哋又再出醜。」

其中成員Katrina更衝口而出話：「叫佢哋去影龍虎豹同砵蘭街街招，啱佢哋又可以露點。」身旁Victoria直言不如露埋第四點，即係後面嗰點。

佢哋公司嘅o靚模趙詠瑤自言其寫真集銷量拋離Donut，佢哋話：「我哋同公司，但佢係自己集資出，銷量同佢所講嘅唔一樣，我哋噚日響書展睇到我地本書都所剩無幾，成績都好理想。」至於係咪對方講大話，Katrina又搶住講：「人哋cheap啲嘛，我指本寫真，有人鐘意買啲平嘢，我哋嗰本貴過佢，質數都好過佢，佢都係搵我哋博宣傳。」Elke補充：「我哋無淘汰佢，係佢只為利益所以自己出，唔加入我哋，係佢自己揀o架。」