http://youtu.be/BQO7D_3Ocpk

【恒Yu家暴之挽救婚姻】周永恒（Roy）背妻偷食兼涉家暴陷婚變，昨日他公開讀悔過書自插人渣，認大前日才飛小三劉依靜（Ruby），懇求老婆趙頌茹（阿Yu）原諒。雖然他邊讀邊喊聲聲內疚，但谷到盡都只流數滴淚，神情時凝重時突凶狠陰陰笑，說話九唔搭八，甚至指落街仍會見到太太推住BB車，似浮游在現實與幻想之間。


■周永恒昨日承認跟小三劉依靜大前日分手，自認人渣衰賤格、鹹濕、貪玩，戴着婚戒的他向老婆求原諒。

現年30歲的周永恒涉家暴被控傷人罪，今早要到屯門裁判法院出庭。昨日他到柴灣接受now節目訪問，表情變幻莫測，由凝重到凶狠，由仰天大嗌到陰陰笑，其間他谷淚說：「知道做咗唔能夠令老婆原諒嘅嘢，好多內疚同責罵。」接着讀悔過書：「今日我喺全香港人面前，向你—阿Yu趙頌茹好誠懇咁道歉同埋認錯，我真係一時受唔住誘惑偷食，仲呃住你，畀着我係你都會好嬲，唔會原諒周永恒呢個人渣。」
他邊讀邊谷出幾滴眼淚，並說：「諗起奇洛李維斯一套電影，最後對住塊鏡返番以前，我每日都諗我係咪發夢呢。」他又仰天哽咽說：「代表兩個女同媽咪講『好想你返屋企，對唔住。』」他強調沒影過慾照，並招供已跟小三Ruby分手：「我哋有聯絡，但星期二分咗手。」但就拒答是否曾跟Ruby上床。


■周永恒昨日數度谷淚，表情豐富，凝重、凶狠、陰陰笑、仰天大嗌、嘆氣乜都齊。


■承認受唔住誘惑偷食的周永恒，在公開的悔過書中向老婆公開道歉和認錯。

幻想太太湊女

他亦拒回應阿Yu曾持刀自殺的傳聞，問跟太太有冇聯絡？Roy點頭唞大氣，攞紙巾拭沒淚的面說：「我同佢WhatsApp有少許對話，佢問個女點，太太仲話啲衫已經乾咗，幫佢搞搞。佢同我講做生意，無啦啦同我講做嘢嘅嘢。」阿Yu提出離婚？他說：「從來冇直接聽過佢呢個選擇，佢話暫時唔能夠原諒我。」對於有指家暴並不是第一次，他支吾說：「兩公婆好激，都係激進年輕夫妻。」
問他昨早在fb留言「大家想我死，還是坐牢」，Roy九唔搭八說：「今朝情緒好差，落街仲會見到太太推住BB車，流晒汗，搞到咁瘦。」他再哽咽說：「娶你返嚟點解對你咁嘅，仲整到你多撻疤嘅，仲要俾人鬧，總之越嚟越多傳媒報道，令我掛住太太能力越低。」有指他只給$140作數日家用，他說：「我櫃桶有超過5cm嘅100蚊人民幣現金，佢用完會再攞。」而曾有吸毒前科的他，否認現時還有濫藥。


■今日就傷人案上庭的周永恒，昨仍頻撲到柴灣接受訪問，被大批記者包圍。

諗過三人同床

另Roy在節目中自認衰賤格和鹹濕，曾試探太太可否接受多個女人，問是否想三人同床？他坦言：「有幻想過。」並對小三道歉，主持還爆他有自殺念頭，事後Roy竟笑笑口說：「唔知係咪好多人想我死？太太係咪咁諗？如果係我可以死畀佢睇。」記者昨晚聯絡阿Yu，她表示不回應。
採訪：卓寶花
攝記：陳慧安


■周永恒承認曾幻想三人同床。資料圖片


■周永恒在寓所樓下幻想到太太推着BB車。
資料圖片