http://youtu.be/LIaJoLj4smU

上個月Mandy Lieu（劉碧麗）同太陽娛樂老闆周焯華（洗米華）密會斷正，高調發聲明承認兩人發展中，又暗示唔清楚對方婚姻狀況，由於Mandy Lieu之後潛水去咗台灣，加上有傳佢自爆戀情，辣㷫洗米華被飛甩，所以就傳佢去台灣係療情傷。


■Mandy下周將要出席公開活動，到時難逃傳媒追問戀情。資料圖片

經理人：冇回應

不過，事發後1個月有新發展，有雜誌今個月1號再影到Mandy Lieu同洗米華密會，洗米華搵兩個助手做掩護，帶埋Mandy Lieu飛去紐約公幹，直到今個月7號凌晨先返港。報道仲話Mandy Lieu唔單止冇俾洗米華飛甩，得寵指數仲上升咗，但洗米華今次帶Mandy Lieu出埠全程保持高度警戒，但係最終都俾記者影咗。
密會再斷正，Mandy Lieu今次並冇火速解畫，噚日本報記者多次透過短訊聯絡佢都唔覆，經理人公司負責人就話：「藝人私生活嘅嘢，公司冇回應。」不過Mandy Lieu下周四（18號）要出席香港一間新酒店嘅開幕活動，相信佢到時都要面對傳媒，講吓係咪已經了解清楚洗米華嘅婚姻狀況喇！
另外，雜誌話洗米華太太陳慧玲為確立「正印」身份，最近頻頻喺社交網站上載一家人合照，最近一次就係洗米華同Mandy Lieu去紐約公幹前一日。
撰文：馮仁昭