曼聯今季有雲高爾接替莫耶斯領軍，又使咗成1.5億鎊去增兵，但係開季成績都仲係慘不忍睹，曼迷就梗係失望啦！啱啱上周賽事，曼聯作客去到李斯特城，有三大前鋒，加上迪馬利亞正選上陣，仲一度領先過對手3:1。點知最後畀對方一個占米華迪搞掂，倒輸返3:5。贏慣嘅曼迷忍咗咁耐，仲點忍到吖！不過好似以下呢位球迷咁就唔係幾好囉。

有網民發現，有位疑似香港曼迷唔知係唔係輸波輸到失去理智，走去占米華迪個Twitter到挑機，爆晒粗問候人哋全家之餘，仲毒到咒呢位李城前鋒斷腳！不過，面就人哋畀，架就係自己丟嘅，占米華迪一下反手抽擊，寸佢得兩個followers，打完啲嘢都冇人睇到，仲畀3位手指公佢，讚佢叻叻豬。呢位球迷咁樣衝出國際，真係情何以堪呀陰公！

呢位咀咒占米華迪嘅疑似香港曼迷，原來已經唔只一次直接向球星挑機，包括利物浦嘅史杜列治，同埋NBA球星D鍾斯、夏登等等，都曾經畀佢鬧過。佢喺3月直接tag史獨，話佢喺一個嘔心嘅插水者，算係比較收歛㗎喇。佢之前亦都咀咒D鍾斯，話後者會喺斷晒腳嘅情況下結束職業生涯，仲話佢係一個心理同生理都有障礙嘅人㖭！真係好過份。其實做球迷，睇吓波啫，使唔使下下都去到咁盡。不過，之前占米華迪未話佢得兩個followers嘅，家睇返，佢嘅followers數目已經暴升到去32人喇！唔知同占米華迪幫佢手「宣傳」有冇關係呢？

http://hkm.appledaily.com/detail.php?guid=52942942&category_guid=7032049&category=instant&issue=20140925



抵咁多人反曼