每個人係中學時期總會有一個暗戀對象，我亦不外如是。係個個名為「青春」既班房入面，我遇上左一個足以令我魂繫夢牽三年既女仔。

然而，佢平日冷漠既形象加上眾多既追求者，一直使我為之卻步。我仲好記得第一次同佢講野既時候，我地已經同班超過一年半。

要講既野實在太多，不如就由我地第一次見面講起啦。

*

「喂，肥軒你今日咁遲既？」我成個人扒左係張枱上面，無黎精神咁揮左揮手。

「係你又早左昨…你睇下啦，依家先七點鐘，八點半先點名阿大佬。」肥軒唔知係邊到拉左一張櫈埋黎我隔離坐低，之後隨手撕開左包薯片。

「又食。」我翻左一下白眼。

「唔食多啲野邊到有力減肥阿？」肥軒已經食到成口薯片碎。

「唉，我出去兜翻轉先。你慢慢食…」我伸左個懶腰，慢慢向外走去。

七點幾既走廊上依然係空空如也，一如既往咁清靜。我一邊靠住矮牆，一邊望住校門既方向。

唔知今年會唔會有靚女轉校生呢？

「如果有就好啦。」熟悉既聲音突然係我右邊響起。

「咦，好少見你咁早喎。」令我意外既係，身為上年度遲到次數總冠軍既王逸希竟然罕有咁係八點前出現。

「我同你諗既野都一樣，唔洗扮啦。咁早翻到黎咪又係睇女。」佢擺出一副完全了解我諗緊咩既樣。

「哇真係知我者莫若王兄你啦。」我既笑容暗地裡帶著一絲嘲諷…可惜自認了解我既阿希完全睇唔出。

「超，唔係你估。」王逸希伸手一撥額上既流海。

*

「同學，班房入面係唔可以食野架…」遠處既班房傳黎一把清澈既女聲。

而呢把女聲既主人，正正就係本故事既女主角。

佢叫做文佩詩，係今年既轉校生。