嗨，我叫阿朗，二十五歲。
接下來，我會同你地講我嘅一段神奇經歷，但首先...

「喂，廁所用完未呀！」

等我同門另一面嘅麻煩女人嘈完先。

「未呀！煩！」

「快少少啦，大小姐，我仲要趕去考試架！」

「趕考試就早啲起身啦！白痴！」

「我等左足足半個鐘有多啦！」

「你都係刷牙洗臉之嘛，一日半日無問題啦！」

「我要洗頭呀！」

「你個頭洗唔洗都係咁架啦！吖，你搞到我劃花咗個妝啦！」

我冷笑一聲，無止境嘅對罵令我喉嚨開始覺得痛，
當我轉身諗住拎杯水飲，突然注意到腳底多咗隻嘢。
「佢」突然跳上我身上，我立即抱住佢。

「喵。」

呢一聲喵，令我岩岩嘅怒氣一掃而消。

「早晨。」

眼前呢隻貓女，係我之前喺群貓會領養返黎。
但就係為左佢，我原本平淡嘅生活先會突然變得相當奇怪。