我阿爺住喺廣州，同我阿嫲一齊住
佢成日偷偷地去跟D「教授」去聽D保健講座
跟住就會買一大堆保健品返屋企

屋企人當然同佢傾過無數次，
但佢都聽唔入耳，
因為，喺佢心目中，佢D「教授」係專業嘅，而我地係唔識野嘅

幾個月前，我老豆就一臉自信，一副「睇我點秒殺你」嘅表情，問咗阿爺一個問題
「老豆，你去咗咁多次嗰D講座，聽嘅人有幾多係後生仔、有幾多係大學生、有幾多係老人家？」
我諗只要唔係智障，都會明白佢想表達乜野

冇錯，最容易被利用、最容易被蒙在鼓裡、最容易被呃、最容易被「煽動」嘅，
就係思考能力退化、以「人生經驗」凌駕於理性思考嘅一群老年人

「老豆，你諗下，點解你D「教授」唔搵D大學生去聽佢地嘅講座？」
冇錯，大學生係諗野最critical、最肯思考、最願意自己求證嘅人
D騙子又點會向哩班人落手，根本呃唔到

我同老豆嘅政見一向都唔同，
平時我喺屋企係唔會講咩政事
就算佢話「六四係中共做得最啱嘅一件事」，我都只會一笑置之

早前，我響應廣大市民嘅號召，參與街頭運動，出嚟去camp
我老豆同我講，話美國俾錢肥佬黎，肥佬黎再俾錢泛民，雙學嘅人一樣從中得到利益，叫我唔好被煽動，被利用
我就將當日佢同阿爺講嘅說話講返俾佢聽
佢笑一笑：「係囉，真係奇怪」
自始，雖然我地之間都會有野拗，但佢就再冇話唔俾我出嚟