「票投國民黨，台灣變香港」
呢句唔係形式上嘅口號，而係一個切實嘅警告
口號下最後締造嘅結果係國民黨大敗，喺台灣稍為見到重回正軌嘅可能性

講返香港，我喺FB發覺有人真心以為香港下次選舉會好似台灣咁，親中共陣營會喺連串社會運動嘅影響下敗陣
老老實實，唔好發夢[/size=5]
第一、而家已經唔係2003/04年，當年中國殖民仲係起步狀態，97到04先剛好7年，因為民怨引發嘅選舉效果唔會再出現，建制派嘅票唔會再減少，只有可能增加。你諗返上次12年選舉，建制+隱形建制拎咗足足77萬票，比對上一屆高出十幾廿萬票，而且當時中聯辦港澳辦甚至可以喺鎂光燈下高調指示香港政府，亦喺五區公投之後，12雙普選爭取失敗，10政改有退冇進。當時亦有一種聲音，有一班人終於醒覺，但係咁嘅情況下建制派依然大勝，而民主派得票卻係同8年前，即係2004年相近，意思係8年黎民主意識加一減一，近乎冇進展過。如今期望經國民教育同而家呢役會帶黎劇變，未免太天真，冇受歷史教訓。

第二、就算民建聯點受挫都好，中國都可以派新民黨甚至其他利益勢力參選，支持中國佔領香港嘅人點轉軚都唔會轉到去民主派、本土派。

第三、唔好嘗試將台灣同香港做類比，台灣早就有政黨輪替嘅經驗，台灣人始終係心向台灣，佢哋有唔少都唔係只睇陣營去揀人，否則無政黨無可能拎八十幾萬票(縱使民進黨啲票都會落咗佢手)，唔似香港有人條心去咗中國，再加上中國未殖民台灣，對台灣選票嘅影響力同香港相比差太遠，香港嘅票受控就已經係受控，不受控嘅唔見得比例上會有增進，香港人對民主人權嘅冷待態度，喺安於現狀呢類放棄腦袋嘅思考模式下去到最終亦只會令佢哋投票畀建制派，到最終，幻想獨裁係民主、幻想獨裁會變民主同支持獨裁嘅人係會多過支持民主嘅人，唔遠，我預期呢樣野將會最遲喺2020年達成。

時間唔會等我哋，唔會返轉頭，到香港人發現只有恢復主權先可以拎返治權嗰刻，香港人已經係絕對少數，想像唔到？你可以睇睇澳門，今日澳門明日香港，呢個先係最貼切嘅推斷。