前言：小弟閒事中意自己一個入戲院睇戲（一來周庭仲未係小弟女朋友，二來中意一個人靜靜咁欣賞一套戲），希望係度搵到同路人。個人中意睇港產警匪片，周星馳笑片，懸疑片，超級英雄片，喜劇，荷里活動作片同pixar卡通，唔中意韓式愛情片，大陸合拍電影同靈異片。

第一次寫影評，請見諒。

如果大家知少少霍金既生平，都知道霍金結過兩次婚，而呢套戲既資料其實係由佢第一任妻子提供（套戲最後有寫）。如果用一個傳記角度去睇既話，佢對霍金既描述大致上算公正，有少少刻意凸顯霍金係天才既特質（雖然佢係）。

成個故事以霍金每個階段不同經歷/挑戰作為主軸（訂論文題目，發現患病，結婚，成名，失聲之類），而霍金個老婆就係個旁觀者/照顧者既角度去睇成件事。套戲係往往係當霍金開始順利既時候，就會有壞事接踵而來。所以成套戲有一個好大既msg就係要堅持到底，唔好放棄，人有希望。

作為傳記，個人覺得寫得有D太平鋪直敘，未能真係將霍金傳奇既一生突顯到出黎。如果作為愛情傳，霍金同佢老婆既關係又有D平淡，只係能夠寫到佢地兩個有濃轉淡既因果，相比之下個人覺得太過普通，直情能夠predict到劇情係乜。

不得不讚做霍金果個男主角，小弟非常有興趣佢點模仿霍金既神髓同點樣整到個ALS病人既造型。

如果問小弟好唔好入場睇，小弟會話可以一睇，但別抱大期望，並且唔好同女朋友睇，有好多physics/cosmology 既 term未比會明，到時麻煩到自己就唔好啦。呢套戲小弟比75分。