一分都冇 羅帥恐「過唔到聖誕」
2014/12/14[right]文:黃興桂[/right]

喺地理上、擁躉狂熱度、最多奪冠次數嚟計，今晚英超曼聯對利物浦絕對係矚目對決，不過呢兩支名牌近年水準每況愈下，現時英超已非「雙紅」天下，就算另一「紅軍」阿仙奴都要企埋一邊，而係「雙藍」──曼城同車路士嘅世界！「雙紅」要奪冠，機會只有兩個：渺茫及冇機會！曼聯進攻核心迪馬利亞因傷續抖，守將基斯史摩寧、戴利白蘭特、勞基梳爾皆缺陣，經常要搵通天老倌卡域克串演中堅，雖然佢近五次出場助紅魔全勝，連領隊尹戈爾亦大讚佢靠得住，但其實幾場都贏得好險。

雙紅防守弱 入球偏多

至於利物浦現時一籌莫展，啱啱喺歐聯悲壯出局，主帥羅渣士開始聞到魷魚香，「紅軍」今晚作客奧脫福，如果連和波一分都攞唔到，你話佢過唔過到聖誕亦屬未知之數。由於兩隊今季水準極不穩定，後防又弱過藥煲，尹戈爾一時踢三後衞，一時又用番四人防線，至今都未搵到適合球員嘅陣式，「紅軍」就爛船尚有三斤釘，「神奇隊長」謝拉特死球威力猶在，但其他球員喺控球在腳戰術下，始終格格不入，今仗勝負難料，但雙方後防不穩下，相信入球會偏多。

金句：雙紅名牌宿敵聯賽初會，冠軍機會只有兩個：渺茫及冇機會