先表明立場：對而家個名冇意見，亦唔介意巴絲改個好名。
睇咗咁多名，留意到幾樣嘢。

1. 可以有意義，但不要煞有介事
論壇唔嚴肅，要畀人感覺 casual、可以放鬆講嘢嘅感覺。意義可以有，但唔需要立意深遠，否則人哋會記唔起，又會覺得呢度好嚴肅。畢竟而家唔係題辭，「寧靜至遠」、「止於至善」、「光電效應」、「私有產權」呢類名可以收埋。

2. 唔需要過分解讀
世界上好多嘢都有意義，但唔需要過分解讀，更加唔駛作啲意義出嚟。人在變，呢度都變，就算改一個立意深遠嘅名，都難保第日唔會脫離呢個名嘅意義。
演譯過分解讀：
「膠」字：「膠」顧名思義即係「鳩」，其實係嘲笑緊自己係戇鳩仔。問此刻世上敢認自己係膠佬嘅有幾個？能夠自嘲嘅人，先係真正心胸廣闊。所以「膠」字好。

3. 有即係冇，冇即係有，論壇係自由、百花齊放嘅，唔好畀一個「好有意義」嘅名箍住。
有即係冇：個名好有意義，個名就會冇意義
例如「寧靜至遠」，好有意義，但論壇從來都唔寧靜，因此呢個名失去意義。又例如近排興討論「中醫係唔係科學」，咁「科學論壇」呢個名好唔好？如果幾日之後巴絲鍾意討論跑車呢？

冇即係有：個名冇乜深意，個名就永遠唔會脫離現實。
例如「千六米頭馬」、「三串一」、「一蚊雞」、「鐵金鋼生痔瘡」等，呢啲名本身冇乜深意，即使論壇點變，個名都唔會脫離現實，因為個名只係純粹一個名。